1, 2. (a) Ndi mini zwe na zwi lavhelela Paradisoni? (Sedzani tshifanyiso tsha u thoma.) (b) Ndi mini zwine zwa ḓo ri takadza vhukuma shangoni ḽiswa?

RO LAVHELELA nga maṱo matswuku “vhutshilo vhu sa fheli.” Muapostola Paulo o ṱalusa zwenezwi sa “vhutshilo ha vhukuma.” (Vhalani 1 Timotheo 6:12, 19.) Kha vhanzhi, zwenezwi zwi ḓo amba u tshila tshoṱhe Paradisoni ya kha ḽifhasi. Zwi a konḓa u humbula nga ha nḓila ine zwa ḓo vha ngayo musi u tshi vuwa u na mutakalo wavhuḓi, wo takala na u fushea matsheloni maṅwe na maṅwe. (Yesaya 35:5, 6) Humbulani nḓila ine zwa ḓo vha zwavhuḓi ngayo u fhedza tshifhinga na muṱa na khonani dzaṋu, u katela na vhane vha ḓo vuswa. (Yohane 5:28, 29; Mishumo 24:15) Ni ḓo vha na tshifhinga tsha u guda vhutsila vhuswa na u vha makone kha u ita zwithu zwine na zwi takalela. Sa tsumbo, ni nga guda zwo engedzeaho nga ha saintsi. Kana ni nga guda u lidza zwilidzo kana u fhaṱa nnḓu yaṋu.

² Naho ro lavhelela zwenezwo zwithu zwoṱhe, u gwadamela Yehova zwi ḓo ri takadza vhukuma. Edzani u humbula nḓila ine vhutshilo ha ḓo vha vhu ngayo musi vhathu vhoṱhe vha  tshi dzhia dzina Yehova ḽi ḽikhethwa na u ṱanganedza Yehova sa Muvhusi wavho. (Mateo 6:9, 10) Ri ḓo vha ro takalela u vhona ḽifhasi ḽo ḓala nga vhathu vho fhelelaho, u fana na nḓila ye Mudzimu a ṱoḓa ḽi tshi vha ngayo. Nahone humbulani nga ha nḓila ine zwa ḓo vha zwo leluwa ngayo u khwaṱhisa vhushaka hashu na Yehova musi ri tshi fhelela nga zwiṱuku nga zwiṱuku!—Psalme ya 73:28; Yakobo 4:8.

3. Ndi mini zwine ra fanela u zwi lugiselela zwino?  

³ Ri fulufhela uri Yehova u ḓo ita zwenezwo zwithu zwoṱhe zwavhuḓi, ngauri “zwithu zwoṱhe zwi a konadzea kha Mudzimu.” (Mateo 19:25, 26) Arali ni tshi ṱoḓa u tshila tshoṱhe shangoni ḽiswa, zwino ndi tshifhinga tsha uri ri “farelele [r]o khwaṱha” kha vhutshilo vhu sa fheli. Ri a zwi ḓivha uri vhufhelo vhu khou ḓa hu si kale, ngauralo, ri fanela u tshila nga nḓila ine ya sumbedza uri ro lavhelela uri vhufhelo vhu ḓo swika tshifhinga tshiṅwe na tshiṅwe. Ri fanela u ita zwoṱhe zwine ra nga kona zwino u itela u lugiselela vhutshilo shangoni ḽiswa. Kha ri vhone uri nga nḓila-ḓe.

4. Ri nga lugiselela hani zwino u tshila shangoni ḽiswa? Ṋeani tsumbo.

⁴ Ri nga lugiselela hani zwino vhutshilo shangoni ḽiswa? Arali ro dzudzanya u ya u dzula kha ḽiṅwe shango, ri nga ita zwiṅwe zwithu u itela u ḓilugiselela u tshila kha ḽeneḽo shango. Sa tsumbo, ri nga thoma u guda luambo na mikhuvha ya vhathu vhane vha dzula henefho. Ri nga lingedza u ḽa zwiṅwe zwa zwiḽiwa zwavho. Nga hu fanaho, ri nga ḓilugiselela zwino u tshila shangoni ḽiswa nga u ita zwine ra nga kona, u tshila u nga ro no vha henengei. Kha ri ṱolisise dziṅwe nḓila dzine ra nga zwi ita ngadzo.

5, 6. U guda u thetshelesa vhulivhisi vhu bvaho ndanguloni ya Yehova zwi ḓo ri thusa hani u lugiselela u tshila shangoni ḽiswa?

⁵ Kha ḽino shango, Sathane u ṱoḓa vhathu vha tshi humbula uri vha nga ita zwiṅwe na zwiṅwe zwine vha funa. Vhanzhi vha vhona u nga ndi zwa ndeme u ḓilanga na uri a hu na ṱhoḓea ya u thetshelesa Mudzimu. Ho vha na mvelelo ifhio? Tshengelo nnzhi na u sa takala. (Yeremia 10:23) Fhedzi Yehova ndi Muvhusi wa lufuno. Hu ḓo vha na vhutshilo ha khwine lungafhani shangoni ḽiswa musi muṅwe na muṅwe a tshi mu thetshelesa!

⁶ Shangoni ḽiswa, ri ḓo ḓiphina nga u tevhela vhulivhisi vhu bvaho ndanguloni ya Yehova u itela u thusa uri ḽino ḽifhasi ḽi vhe paradiso ya u naka na u thusa u gudisa vho vuswaho. Yehova u ḓo ri ṋea mushumo munzhi. Fhedzi hu pfi mini arali vhane vha ranga phanḓa vha ri humbela uri ri ite zwiṅwe zwithu zwine ra si zwi takalele? Naa ri ḓo thetshelesa? Naa ri ḓo ita zwoṱhe zwine ra nga kona na u takalela mushumo washu? U itela u lugiselela u tshila shangoni ḽiswa lwa tshoṱhe, ri fanela u thetshelesa vhulivhisi vhu bvaho ndanguloni ya Yehova zwino.

7, 8. (a) Ndi ngani ri tshi fanela u shumisana na vhane vha khou ranga phanḓa? (b) Ndi tshanduko dzifhio dze vhaṅwe Vhakriste vha sedzana nadzo? (c) Ri nga vha na vhungoho vhufhio shangoni ḽiswa?

⁷ Arali ri tshi ṱoḓa u ḓilugiselela u tshila shangoni ḽiswa, ri fanela u ḓigudisa u fushea na u shumisana na ndangulo ya Yehova na vhaṅwe. Ri fanela u dovha ra guda u fushea na u shumisana. Sa tsumbo, musi ro ṋewa mushumo muswa ri shumisana nga u ḓiimisela na u ita zwine ra nga kona  uri ri takale na u fushea. Arali ra guda u shumisana na vhane vha ranga phanḓa zwino, ri ḓo ita zwi fanaho shangoni ḽiswa. (Vhalani Vhaheberu 13:17.) Musi Vhaisiraele vha tshi dzhena Shangoni ḽo Fulufhedziswaho, vho vhudzwa hune vha fanela u dzula hone. (Numeri 26:52-56; Yoshua 14:1, 2) A ri ḓivhi hune muṅwe na muṅwe washu a ḓo vhewa uri a dzule hone shangoni ḽiswa. Fhedzi arali ro guda u shumisana, ri ḓo takalela u ita zwine Yehova a zwi funa huṅwe na huṅwe hune ra dzula hone.

⁸ Edzani u humbula uri zwi ḓo vha zwi ndugelo lungafhani u shuma shangoni ḽiswa ḽa Mudzimu nga fhasi ha Muvhuso! Nga tshenetshi tshiitisi, ri takalela u shumisana na ndangulo ya Yehova zwino na u ita mushumo muṅwe na muṅwe we ra ṋewa. Nga zwiṅwe zwifhinga, mishumo ye ra ṋewa i nga shanduka. Sa tsumbo, miṅwe miraḓo ya Bethele ya ngei United States yo humbelwa uri i ye tsimuni. Nga nṱhani ha miṅwaha kana zwiṅwe zwiimo, vhaṅwe vhalavhelesi vha dalelaho vho humbelwa uri vha vhe vhavulanḓila vho khetheaho. Vho takala mushumoni wavho muswa nahone Yehova u khou vha fhaṱutshedza. Arali ri tshi humbela thuso ya Yehova nga thabelo, u ita zwoṱhe zwine ra nga kona u itela u mu shumela na u guda u fushea kha mushumo muṅwe na muṅwe we ra ṋewa wone, ri ḓo takala nahone Yehova u ḓo ri fhaṱutshedza. (Vhalani Mirero 10:22.) Hu nga itea mini arali shangoni ḽiswa, ra vha ri tshi takalela u dzula huṅwe fhethu, fhedzi ndangulo ya Yehova ya ri humbela uri ri pfulutshele huṅwe fhethu? Nga tshenetsho tshifhinga, zwi ḓo vha zwi si na ndavha uri ri dzula ngafhi kana ri ita mini. Ri ḓo livhuha uri ri khou dzula shangoni ḽiswa.—Nehemia 8:10.

9, 10. (a) Ndi ngani zwi tshi nga ṱoḓea uri ri si fhele mbilu shangoni ḽiswa? (b) Ri nga sumbedza hani uri a ri fheli mbilu zwino?

⁹ Shangoni ḽiswa, zwi nga ṱoḓea uri nga zwiṅwe zwifhinga ri si fhele mbilu. Sa tsumbo, ri nga pfa u pfi vhaṅwe vhathu vho takala vhukuma ngauri mashaka na khonani dzavho vho vuswa. Naho zwo ralo, ri nga fanela u lindela u vuswa ha vhathu vhane ra vha funa. Arali zwenezwo zwa itea, naa ri ḓo takala na vhaṅwe nahone ri sa fheli mbilu? (Vharoma 12:15) Arali ra guda u lindela Yehova ri sa fheli mbilu uri a ḓadzise mafulufhedziso awe zwino, zwi ḓo ri thusa u sa fhela mbilu nga tshenetsho tshifhinga.—Muhuweleli 7:8.

¹⁰ Ri nga dovha ra lugiselela shango ḽiswa nga u sa fhela mbilu musi hu tshi vha na tshanduko kha nḓila ine ra pfesesa ngayo ngoho ya Bivhili. Naa ri guda yeneyi khandiso ntswa, nahone a ri fheli mbilu musi ri sa i pfesesi nga vhuḓalo? Arali zwo ralo, shangoni ḽiswa zwi ḓo leluwa u sa fhela mbilu tshifhinga tshoṱhe musi Yehova a tshi ri ṋea vhulivhisi vhuswa.—Mirero 4:18; Yohane 16:12.

11. Ndi ngani ri tshi fanela u guda u hangwela vhaṅwe zwino, nahone zwi ḓo ri thusa hani shangoni ḽiswa?

¹¹ Iṅwe nḓila ine ra nga lugiselela ngayo u tshila shangoni ḽiswa ndi u guda u  hangwela. Tshifhingani tsha Miṅwaha Ya Tshigidi Ya U Vhusa ha Kristo, zwi ḓo dzhia tshifhinga uri muṅwe na muṅwe a fhelele. (Mishumo 24:15) Naa ri ḓo vha ri tshi funana na u hangwelana? Arali ra guda u hangwela vhaṅwe na u vha na vhushaka havhuḓi navho zwino, zwi ḓo ri lelutshela u ita nga u ralo shangoni ḽiswa.—Vhalani Vhakolosa 3:12-14.

12. Ndi ngani ri tshi fanela u lugiselela zwino u tshila shangoni ḽiswa?

¹² Shangoni ḽiswa ri nga kha ḓi sa wana zwine ra zwi ṱoḓa tshifhinga tshoṱhe kana ri nga fanela u zwi lindela. Ri fanela u livhuha na u fushea kha vhuimo vhuṅwe na vhuṅwe vhune ra vha khaho. Zwi re zwone ndi uri ri ḓo ṱoḓa pfaneleo dzi fanaho na dzine Yehova a khou ri gudisa uri ri dzi sumbedze zwino. Nga u ralo, musi ri tshi guda u sumbedza dzenedzo pfaneleo zwino, ri vha ri tshi khou sumbedza uri shango ḽiswa ndi ḽa vhukuma kha riṋe nahone ri khou ḓilugiselela vhutshilo vhu sa fheli. (Vhaheberu 2:5; 11:1) Zwiṅwe hafhu, ri ḓo sumbedza uri ri ṱoḓa u tshila shangoni ḽine muṅwe na muṅwe a thetshelesa Yehova.

13. Ndi mini zwine ra ḓo zwi vhea u thoma vhutshiloni hashu musi ri shangoni ḽiswa?

¹³ Shangoni ḽiswa, ri ḓo vha na tshiṅwe na tshiṅwe tshine ra tshi ṱoḓa u itela u ḓiphina nga vhutshilo. Fhedzi ri ḓo wana dakalo ḽihulwane nga u vha na vhushaka ha tsini na Yehova. (Mateo 5:3) Ri ḓo vha ro farakanea tshumeloni ya Yehova nahone ri ḓo takalela u mu shumela. (Psalme ya 37:4) Nga zwenezwo, musi ri tshi vhea Yehova u thoma vhutshiloni hashu zwino, ri vha ri tshi khou lugiselela u tshila shangoni ḽiswa.—Vhalani Mateo 6:19-21.

14. Vhaswa vha nga ḓivhetshela zwipikwa zwifhio tshumeloni ya Yehova?

¹⁴ Ri nga takalela hani u shumela Yehova nga ho engedzeaho? Iṅwe nḓila ndi nga u ḓivhetshela zwipikwa. Arali ni muswa, humbulani nga ho dzikaho nga ha u shumisa  vhutshilo haṋu u itela u shumela Yehova. Ndi ngani ni sa iti dziṅwe ṱhoḓisiso kha khandiso dzashu nga ha tshumelo dzo fhamba-fhambanaho dza tshifhinga tsho ḓalaho? Ni nga ḓivhetshela iṅwe ya dzenedzo tshumelo sa tshipikwa. * (Sedzani ṱhaluso i re magumoni a siaṱari.) Ambani na vhaṅwe vhe vha shumela Yehova lwa tshifhinga tsho ḓalaho lwa miṅwaha minzhi. Arali na shumisa vhutshilo haṋu u shumela Yehova, ni ḓo wana ngudo ya ndeme. Yeneyi tshenzhelo i ḓo ni thusa u shumela Yehova shangoni ḽiswa.

15. Ndi zwifhio zwiṅwe zwipikwa zwine na nga ḓivhetshela zwone tshumeloni ya Yehova?

¹⁵ Hu na zwipikwa zwinzhi zwine ra nga ḓivhetshela tshumeloni yashu kha Yehova. Sa tsumbo, ri nga ḓivhetshela tshipikwa tsha u guda vhutsila vhuswa vhuḓinḓani. Kana ri nga lingedza u pfesesa khwine maitele a Bivhili na u guda nḓila ine ra nga a shumisa ngayo vhutshiloni hashu. Ri nga lingedza u khwinisa u vhala khagala kana nyambo na phindulo dzashu miṱanganoni. Mbuno ndi ya uri: Musi ni tshi ḓivhetshela zwipikwa tshumeloni yaṋu kha Yehova, zwi ḓo ni thusa u fhisea nga ho engedzeaho na u lugisela u tshila shangoni ḽiswa.

16. Ndi ngani u shumela Yehova hu nḓila ya khwine ya vhutshilo?

¹⁶ Musi ri tshi shumisa tshifhinga tshashu u itela u lugisela shango ḽiswa ḽa Mudzimu, naa ri khou xelelwa nga nḓila ya khwine ya vhutshilo ṋamusi? Hai! U shumela Yehova ndi nḓila ya khwine vhutshiloni. A ri shumeli Yehova ngauri ri kombetshedzwa nga muṅwe muthu kana u itela u ponyoka maṱungu mahulu. Musi ri na vhushaka havhuḓi na Yehova, vhutshilo hashu vhu vha khwine nahone ri a takala. O ri sika uri ri tshile nga yeneyo nḓila. U  funwa nga Mudzimu na u wana vhulivhisi hawe vhutshiloni hashu zwi khwine vhukuma u fhira naho tshi tshini. (Vhalani Psalme ya 63:1-3.) Roṱhe ri nga pfa ro takala musi ri tshi gwadamela Yehova zwi tshi bva mbiluni. Vhaṅwe vhe vha mu shumela lwa miṅwaha minzhi vha nga amba uri heyi ndi yone nḓila ya khwine ya vhutshilo.—Psalme ya 1:1-3; Yesaya 58:13, 14.  

17. U ḓitakadza na u ḓimvumvusa zwi ḓo vha hani zwa ndeme Paradisoni?

¹⁷ Ri ḓo takalela u fhedza tshifhinga tshashu kha zwithu zwine zwa ri takadza na u ḓimvumvusa Paradisoni. Naho zwo ralo, Yehova ndi ene we a ri sika ri na lutamo lwa uri ri ḓiphine, nahone o ri fulufhedzisa uri “zwoṱhe zwi tshilaho U zwi fusha dakalo.” (Psalme ya 145:16; Muhuweleli 2:24) Ri ṱoḓa u ḓimvumvusa na u awela, fhedzi ri ḓiphina ngazwo nga ho engedzeaho musi ri tshi vhea vhushaka hashu na Yehova u thoma. Zwi ḓo vha zwo tou ralo na shangoni ḽiswa. Ngauralo, ndi vhuṱali u dzula “ni tshi ṱoḓa Muvhuso” na u livhisa ṱhogomelo kha phaṱutshedzo dzine ra dzi wana kha u shumela Yehova.—Mateo 6:33.

18. Ri nga sumbedza hani uri ri khou ḓilugisela u tshila tshoṱhe Paradisoni?

¹⁸ Vhutshilo vhu ḓo vha khwine shangoni ḽiswa u fhira nḓila ine ra humbula ngayo. U nga ri ri nga sumbedza nḓila ine ra ṱoḓa u vha henefho ngayo nga u lugiselela “vhutshilo ha vhukuma” zwino. Kha ri ṱahulele pfaneleo dzine Yehova a khou ri gudisa nahone kha ri huwelele mafhungo maḓifha nga u fhisea. U nga ri ri nga tshenzhela dakalo ḽa u vhea vhurabeli ha Yehova u thoma vhutshiloni hashu. Ri na fulufhelo ḽo fhelelaho ḽa uri shangoni ḽiswa, Yehova u ḓo ita zwoṱhe zwe a zwi fulufhedzisa. Nga zwenezwo, kha ri tshile u nga ro no vha henengei!