Gudani Kha Ipfi Ḽa Mudzimu

Ndi Ngani Ni Tshi Fanela U Guda Kha Mudzimu?

Yeneyi thero i ḓo haseledza nga ha mbudziso dze na vhuya na ḓivhudzisa dzone nahone i ḓo sumbedza hune na wana hone phindulo Bivhilini yaṋu. Ṱhanzi dza Yehova vha ḓo takalela u haseledza dzenedzo phindulo na inwi.

1. Ndi ngani ni tshi fanela u guda kha Mudzimu?

Mudzimu o farela vhathu mafhungo-maḓifha. U ri vhudza nga hao Bivhilini. Bivhili i fana na vhurifhi ho ṅwalelwaho riṋe vhu bvaho ha Khotsi ashu wa ṱaḓulu wa lufuno.—Vhalani Yeremia 29:11.

2. Mafhungo-maḓifha ndi mini?

Vhathu vha ṱoḓa muvhuso wavhuḓi. A hu na muvhusi we a vhuya a fhelisa vhuvemu, u shayea ha khaṱulokwayo, vhulwadze, kana lufu. Fhedzi hu na mafhungo-maḓifha. Mudzimu u ḓo ḓisela vhathu muvhuso wavhuḓi une wa ḓo vha vhofholola kha zwithu zwoṱhe zwine zwa ita uri vha shengele.—Vhalani Daniele 2:44.

3. Ndi ngani zwi zwa ndeme u guda kha Mudzimu?

Hu si kale Mudzimu u ḓo fhelisa vhathu vhane vha ita uri hu vhe na tshengelo kha ḽifhasi. Zwa zwino, u khou funza vhathu vha dzimilioni vha mbilu dzavhuḓi uri vha takalele nḓila ya vhutshilo ya khwine, yo thewaho kha lufuno. Vhathu vha khou guda kha Ipfi ḽa Mudzimu nḓila ine vha nga sedzana ngayo na thaidzo, nḓila ine vha nga wana ngayo dakalo ḽa vhukuma, na nḓila ine vha nga takadza ngayo Mudzimu.—Vhalani Tsefanya 2:3.

4. Muṅwali wa Bivhili ndi nnyi?

Bivhili i na bugu ṱhukhu dza 66. Yo ṅwalwa nga vhathu vha 40. Bugu ṱhanu dza u thoma dzo ṅwalwa nga Mushe miṅwahani i ṱoḓaho u vha 3500 yo fhiraho. Ya u fhedzisela yo ṅwalwa nga muapostola Yohane miṅwahani ya 1900 yo fhiraho. Fhedzi vhaṅwali vha Bivhili vho ṅwala mihumbulo ya Mudzimu, hu si yavho. Nga zwenezwo, Mudzimu ndi ene Muṅwali wa Bivhili.—Vhalani 2 Timotheo 3:16; 2 Petro 1:21.

Ri a zwi ḓivha uri Bivhili i bva ha Mudzimu nga ṅwambo wa uri i amba ngoho nga vhuḓalo nga ha vhumatshelo. A hu na muthu ane a nga ita zwenezwo. (Yesaya 46:9, 10) Zwiṅwe hafhu, Bivhili i ri vhudza nga ha pfaneleo dza Mudzimu. I na maanḓa a u shandula vhutshilo ha vhathu nga nḓila ya khwine. Dzenedzi mbuno dzo ita uri vhathu vhanzhi vha tende uri Bivhili ndi Ipfi ḽa Mudzimu.—Vhalani Yoshua 23:14; 1 Vha-Thesalonika 2:13.

5. Ni nga pfesesa hani Bivhili?

Yesu o vha mufunzi wa Ipfi ḽa Mudzimu a re na bvumo. Naho vhathu vhanzhi vhe a amba navho vho vha vho ḓowela Bivhili, vho vha vha tshi ṱoḓa thuso u itela u i pfesesa. U itela u vha thusa, Yesu o vha a tshi vha vhudza nga ha ndimana dza Bivhili nahone a vha ṱalutshedza “uri vha ṱalukanye maṅwalo.” Yeneyi thero ya “Gudani Kha Ipfi Ḽa Mudzimu,” i ḓo shumisa maitele a fanaho u itela u ni thusa.—Vhalani Luka 24:27, 45.

A si zwithu zwinzhi zwine zwa takadza u fana na u guda kha Mudzimu nga ha ndivho ya vhutshilo. Fhedzi vhaṅwe vhathu vha nga kha ḓi sa takalela uri ni vhala Bivhili. Ni songo kulea nungo. Fulufhelo ḽine na vha naḽo ḽa vhutshilo vhu sa fheli ḽo ḓitika nga uri ni ḓivhe Mudzimu.—Vhalani Mateo 5:10-12; Yohane 17:3.

U itela mafhungo o engedzeaho, sedzani ndima ya vhuvhili kha bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.