Vhuporofita 2. Nḓala
Vhuporofita 2. Nḓala
“Hu ḓo wa dzinḓala.”—MARKO 13:8.
● Muṅwe munna u shavhela muḓanani wa Quaratadji, ngei Niger nga nṱhani ha nḓala. Vhazwala vhawe, vhakomana, vharathu, na khaladzi dzawe na vhone vho shavhela-vho henefho nga nṱhani ha uri na vhone vha khou sika nga nḓala. Naho zwo ralo, munna onoyo o sokou eḓela fhasi kha thovho e eṱhe. Ndi ngani e eṱhe? Musi Sidi khosi ya henefho a tshi ṱalutshedza, o ri: “Ha koni u livhana zwifhaṱuwo na vha muṱa wawe nga nṱhani ha uri ha koni u vha ṱunḓela.”
MBUNO DZI SUMBEDZA MINI? Shangoni ḽoṱhe muthu muthihi kha vha sumbe ha wani zwiḽiwa zwo eḓanaho zwa u ḽa ḓuvha ḽiṅwe na ḽiṅwe. Vhuimo honoho a hongo tou vhifhesa musi vhu tshi vhambedzwa na ha ngei tshipembe ha Sahara kha ḽa Afurika hune muthu muthihi kha vhararu a fhedza tshifhinga tshilapfu e si na zwiḽiwa. U itela uri ni tou pfesesa zwavhuḓi, edzani u humbula nga ha muṱa u re na khotsi, mme na ṅwana. Arali hu na zwiḽiwa zwo eḓanaho vhathu vhavhili fhedzi, ndi nnyi kha vho ane a sa ḓo ḽa? Naa ndi khotsi? mme? kana ṅwana? Miṱa i re kha vhuimo honoho i fanela u ita phetho yo raloho ḓuvha ḽiṅwe na ḽiṅwe.
VHATHU VHA ANZELA U RI MINI? Shango ḽi bveledza zwiḽiwa zwine zwa nga eḓana muthu muṅwe na muṅwe a re khaḽo. Zwine zwa ṱoḓea ndi uri zwibveledzwa zwa shango zwi langiwe zwavhuḓi.
NAA ZWENEZWO NDI NGOHO? Ndi ngoho uri vhalimi vha nga bveledza na u endedza zwiḽiwa zwinzhi u fhira naho hu lini kha ḓivhazwakale ya vhathu. Zwi re zwone ndi uri mivhuso ya vhathu i fanela u kona u langa nḓila ine zwiḽiwa zwa phaḓaladzwa ngayo kha vhathu u itela u lwisana na vhuleme ha nḓala. Fhedzi, naho ho no fhela mahumi a miṅwaha vha tshi khou lingedza, vha khou kundelwa.
NI HUMBULA MINI? Naa Marko 13:8 i khou ḓadzea? Hu sa londwi mvelaphanḓa kha zwa thekinolodzhi, naa u ṱahela ha zwiḽiwa zwi khou kwama vhathu shangoni ḽoṱhe?
Midzinginyo na nḓala zwi anzela u vha hone musi hu sa athu vha na tshiṅwe tshiga tshine tsha sumbedza uri ri khou tshila maḓuvhani a vhufhelo.
[Maipfi o ṱumbulwaho kha siaṱari 5]
“Vhana vha fhiraho muthihi kha vhararu vhane vha vhulahwa nga vhulwadze ha pneumonia, ha dali na maṅwe malwadze vho vha vha sa ḓo fa arali vho vha vhe na zwiḽiwa zwo eḓanaho.”—ANN M. VENEMAN, EXECUTIVE DIRECTOR OF THE UN CHILDREN’S FUND.
[Ṱhaluso ya Vhubvo ha Tshifanyiso kha siaṱari 5]
© Paul Lowe/Panos Pictures
