THERO I RE KHA GWATI | NAA MUDZIMU U NA DZANGALELO KHA INWI?
Mudzimu U A Ni Pfesesa
“Yehova, U a nṱalukanya, U a nḓivha.”—PSALME YA 139:1.
“Maṱo au o zwi vhona ndi kha ḓi vhumbea.”—PSALME YA 139:16
NDI NGANI VHAṄWE VHA TSHI TIMATIMA: Vhathu vhanzhi vha vhona u nga Mudzimu u dzhia vhathu sa vhaitazwivhi fhedzi—vha songo kunaho na vha sa fanelei u dzhielwa nṱha ngae. Kendra we a vha o tsikeledzea maḓipfele, o ḓisola vhukuma ngauri o vha a sa koni u swikelela zwavhuḓi zwilinganyo zwa Mudzimu. Nga zwenezwo, o ri: “Ndo litsha u rabela.”
ZWINE IPFI ḼA MUDZIMU ḼA FUNZA ZWONE: Yehova u vhona u sa fhelela hashu na u pfesesa zwine na vha zwone zwa vhukuma. Bivhili i ri: “Ndi Ene a ḓivhaho zwiné ra vha zwone, ha hangwi zwauri ri luruli.” Zwiṅwe hafhu, ha lifhedzi “vhutshinyi hashu,” fhedzi nga nṱhani ha tshilidzi tshawe u a ri hangwela musi ri tshi rembuluwa.—Psalme ya 103:10, 14.
Ṱhogomelani Davida, khosi ya Vhaisiraele we a bulwa kha thero ya u thoma ya wonoyu mutevhe. Musi a tshi khou rabela Mudzimu, Davida o ri: “Maṱo au o zwi vhona ndi kha ḓi vhumbea; buguni yau ho vha hó no ṅwalwa zwoṱhe . . . Itou mphenḓa, Iwe Mudzimu, U ḓivhe mbilu yanga.” (Psalme ya 139:16, 23) Vhukuma, Davida o vha e na vhungoho ha uri naho o ita tshivhi—nga zwiṅwe zwifhinga—Yehova a nga ṱhogomela u shanduka hawe zwi tshi bva mbiluni.
Yehova u a ni pfesesa u fhira muthu naho e ufhio. Bivhili i ri: “Muthu tshawe ndi u vhona zwi re phanḓa ha maṱo awe; Yehova Ene u vhona zwi re mbiluni.” (1 Samuele 16:7) Mudzimu u ḓivha zwine zwa ni ṱuṱuwedza u ita zwiṅwe zwithu—zwe na zwi mamela, nḓila ye na aluwa ngayo, vhubvo haṋu na vhumuthu haṋu vhu itaho uri ni vhe muthu ane na vha ene. U vhona na u dzhiela nṱha muthu ane na lwela u vha ene, naho ni tshi ita vhukhakhi.
Mudzimu u shumisa hani u pfesesa hawe hu hulwane kha ‘zwine na vha zwone’ u itela u ni khuthadza?
