Jairo o bebwa e na vhulwadze ha cerebral palsy vhune ha vhidzwa spastic quadriplegia. * Nga zwenezwo, ha koni u langa muvhili wawe nga ho fhelelaho. Vhuluvhi hawe a vhu koni u rumela milaedza zwavhuḓi kha misipha yawe, nga zwenezwo, zwanḓa na milenzhe yawe zwi a shanavhiḓa nga hu sa langei. Nga zwiṅwe zwifhinga, u ḓikhwiḓa ha Jairo a songo zwi lavhelela zwo vha zwi tshi ita uri a ḓihuvhadze. Vhathu vhane vha vha tsini nae vha nga huvhala arali vha songo zwi ṱhogomela. Zwi ṱungufhadzaho ndi uri zwanḓa na milenzhe yawe zwo vha zwi tshi anzela u vhofhwa na tshidulo tshawe tsha vhaholefhali u itela uri a si tsha ḓihuvhadza.

Jairo o aluwa nga nḓila i vhavhaho vhukuma. Musi e na miṅwedzi miraru o thoma u vha na tshifakhole tshe tsha mu ita uri a dzidzivhale. Kanzhi, Mmawe vho vha vha tshi mu hwala nahone vha mu gidimisela vhuongeloni, vha tshi humbula u nga o fa.

Nga ṅwambo wa u shanavhiḓa, nga u ya ha tshifhinga marambo a Jairo o mbo ḓi kombama. Musi e na miṅwaha ya 16, o fhirea shambo ḽa khundu, nahone zwa ṱoḓa uri a itwe muaro kha tshirumbi na khundu. Ndi kha ḓi humbula musi Jairo a tshi lila vhusiku vhuṅwe na vhuṅwe a tshi khou pfa vhuṱungu.

U holefhala ha Jairo ho ita uri a ḓitike vhukuma nga vhaṅwe vhathu u itela u mu ṱhogomela ḓuvha ḽiṅwe na ḽiṅwe, kha mishumo i nga ho u mu kapudza, u mu ambadza na u mu eḓedza. Mma na Baba vho vha vha tshi anzela u ita yeneyo mishumo. Naho Jairo o vha a tshi ṱoḓa thuso tshifhinga tshoṱhe, vhabebi vhashu vho vha vha tshi dzula vha tshi mu humbudza uri vhutshilo hawe a vhu ḓitiki fhedzi nga vhathu, fhedzi vhu dovha ha ḓitika nga Mudzimu.

Vhabebi vhashu ndi Ṱhanzi dza Yehova, nahone vho vha vha tshi dzula vha tshi vhalela Jairo mafhungo a Bivhili u bva vhuṱukuni. Vha a zwi ḓivha uri vhutshilo ndi ha ndeme musi muthu a tshi vha na vhushaka na Mudzimu. Jairo u na muvhili u si na nungo, une wa shanavhiḓa tshifhinga tshoṱhe, fhedzi a nga vha na fulufhelo ḽavhuḓi na ḽo khwaṱhaho ḽa vhumatshelo. Naho zwo ralo, kanzhi vho vha vha tshi ḓivhudzisa arali Jairo a tshi nga pfesesa nḓivho ya Bivhili.

Ḽiṅwe ḓuvha musi Jairo a tshee muṱuku, Baba vho ri: “Jairo, ndi khou humbela uri ni ambe na nṋe.” Vho dovha vha ri: “Arali ni tshi mpfuna zwa vhukuma, ni ḓo amba na nṋe!” Musi Baba vha tshi mu humbela uri a ambe ipfi ḽithihi fhedzi, Jairo a thoma u rothisa miṱodzi. Naho o lingedza u sumbedza nḓila ine a ḓipfa ngayo  nga maipfi, o vha a tshi kona u ita mibvumo fhedzi. Baba vho pfa vhuṱungu nge vha lidza Jairo. Fhedzi u lila ha Jairo zwo sumbedza uri o pfesesa zwe Baba vha zwi amba. Thaidzo yo vha i ya uri ha koni u amba.

Hu si kale, vhabebi vhashu vho ṱhogomela uri nga zwiṅwe zwifhinga Jairo o tshimbidza maṱo awe lunzhi a tshi lingedza u sumbedza mahumbulele awe na nḓila ine a ḓipfa ngayo. Zwo vha zwi tshi tsikeledza Jairo ngauri o vha a sa koni u ita uri vhaṅwe vha mu pfesese. Fhedzi musi vhabebi vhanga vha tshi ṱhogomela zwine a khou ṱoḓa a tshi shumisa maṱo awe na u mu ṋea zwine a ṱoḓa, Jairo o vha a tshi mwethuwa vhukuma. Ho vha hu nḓila yawe ya u livhuha.

Dokotela wa vhathu vha sa koni u amba o eletshedza uri u itela uri ri kone u davhidzana khwine, ri fanela u imisa zwanḓa zwashu nṱha musi ri tshi mu vhudzisa mbudziso i ṱoḓaho phindulo ya ee-kana-hai. Tshanḓa tsha u ḽa tsho vha tshi tshi imela ee, tsha monde tshi tshi imela hai. Nga zwenezwo, o vha a tshi kona u sumbedza zwine a zwi ṱoḓa nga u livhisa maṱo awe kha tshanḓa tsho teaho.

Ṱhanzi dza Yehova dzi fara maguvhangano na mabuthano luraru nga ṅwaha, fhethu hune ha vha hu tshi khou ṋekedzwa nyambo dza Bivhili kha vhathu vhanzhi. Jairo o vha a tshi takala tshifhinga tshoṱhe musi hu tshi ṋekedzwa nyambo ya ndovhedzo. Ḽiṅwe ḓuvha musi Jairo e na miṅwaha ya 16, Baba vho mu vhudzisa uri: “Jairo, naa ni a ṱoḓa u lovhedzwa?” Nga khathihi fhedzi, nḓila ye a sedza ngayo tshanḓa tsha Baba tsha u ḽa, yo sumbedza lutamo lwawe lwa u dzhia honoho vhukando. Nga zwenezwo, Baba vha dovha vha ri: “Naa no fulufhedzisa Mudzimu nga thabelo uri ni ṱoḓa u mu shumela nga hu sa fheli?” Jairo o dovha a lavhelesa tshanḓa tsha u ḽa tsha Baba. Zwo vha zwi tshi tou vha khagala uri Jairo o no ṋekedza vhutshilo hawe kha Yehova.

Nga murahu ha khaseledzo dza Bivhili dzi si gathi, zwo vha zwi khagala uri Jairo o pfesesa ndeme ya ndovhedzo ya Vhukriste. Ngauralo, nga 2004, o fhindula mbudziso ya ndeme vhukuma ye a vhudziswa yone, “Naa no ḓiṋekedza kha Mudzimu u ita lufuno lwawe?” Jairo o fhindula yeneyo mbudziso nga u sedza nṱha. Ho vha hu nḓila ye a vha o i dzudzanya ya uri ee. Nga zwenezwo, musi e na miṅwaha ya 17, o lovhedzwa sa muṅwe wa Ṱhanzi dza Yehova.

Nga 2011, ho vha na nḓila ntswa ya u davhidzana na Jairo—khomphyutha ine ya langiwa nga maṱo. Tshenetshi tshishumiswa tshi kona u vhona tshanga ya iṱo i tshi khou sedza-sedza, zwenezwo zwi ita uri a kone u vula na u khetha zwine a khou zwi ṱoḓa kha khomphyutha. U poidza kana u lavhelesa kha tshikirini zwi fana na u puṱedza mausu wa khomphyutha. Khomphyutha ine ya vha na zwifanyiso zwine zwa sumbedza  maipfi na mibulo yo itwa uri i thuse Jairo uri a kone u davhidzana na vhaṅwe. Musi a tshi poidza kha tshiṅwe tsha zwifanyiso, khomphyutha i kona u ita uri hu pfale ipfi ḽa mulaedza wo ṅwalwaho.

Samusi u pfesesa ha Jairo ho engedzea, ngauralo na lutamo lwawe lwa u thusa vhaṅwe nga lwa muya lwo engedzea. Nga tshifhinga tsha pfunzo ya Bivhili ya muṱa ya vhege iṅwe na iṅwe, kanzhi u lavhelesa khomphyutha yawe a dovha a lavhelesa nṋe. Yeneyi ndi nḓila ya u nkhumbudza uri ndi fanela u ṅwala phindulo dzine a ḓo dzi fhindula musi hu tshi vhudziswa mbudziso miṱanganoni ya Vhukriste tshivhidzoni.

Musi e miṱanganoni, u lavhelesa tshikirini tshawe u itela uri tshi puṱedze fhethu ho teaho, nahone ipfi ḽine ḽa bva kha khomphyutha ḽi pfiwa nga muṅwe na muṅwe. U a mwethuwa tshifhinga tshoṱhe musi a tshi ṱuṱuwedza miraḓo ya tshivhidzo nga yeneyi nḓila. Alex muṅwe wa khonani dza Jairo ane a kha ḓivha muswa o ri: “Zwi a ntakadza tshifhinga tshoṱhe musi ndi tshi pfa phindulo dza Jairo kha thero ya Bivhili.”

Jairo o dovha a shumisa maṱo awe u vhudza vhaṅwe nga ha lutendo lwawe. Iṅwe nḓila ine a ita ngayo zwenezwo, ndi u puṱedza tshifanyiso nga maṱo awe, tshine tsha sumbedza ngade ine ya vha na zwipuka na vhathu vha tshaka dzoṱhe vha tshi khou tshila nga mulalo. Musi zwenezwi zwi tshi vhonala kha khomphyutha, hu bva ipfi ḽine ḽa ri, “Fulufhelo ḽi re Bivhilini ndi ḽa uri ḽifhasi ḽi ḓo vha paradiso ine ha sa ḓo vha na malwadze na lufu, Nzumbululo 21:4.” Arali muthetshelesi a sumbedza u vha na dzangalelo, khomphyutha yawe i dovha ya ri, “Ni nga takalela u guda Bivhili na nṋe?” Zwi mangadzaho ndi uri makhulu washu wa mukalaha vho ṱanganedza yeneyo khumbelo. Zwi a takadza vhukuma u vhona Jairo, a tshi thuswa nga Ṱhanzi ngae u gudisa Makhulu washu Bivhili nga zwiṱuku nga zwiṱuku! Zwi takadzaho ndi uri Makhulu washu vho lovhedzwa kha buthano ḽa ngei Madrid nga August 2014.

Tshikoloni, vhadededzi vha Jairo a vho ngo dzhiela fhasi u ḓiṋekedza hawe kha Mudzimu. Dokotela wa vhathu vha sa koni u amba ane a pfi Rosario o vhuya a ri: “Arali ndi tshi ṱoḓa u vha muraḓo wa vhurereli, ndi ḓo vha muṅwe wa Ṱhanzi dza Yehova. Ndo vhona nḓila ye lutendo lwa Jairo lwa mu ṋea ngayo ndivho ya vhutshilo, hu sa londwi vhuimo hawe vhu konḓaho.”

Musi ndi tshi vhala nga ha fulufhedziso ḽi re Bivhilini, Jairo u sumbedza u takala maṱoni: ‘Wa tshihole u ḓo fhufha vhunga phala; lulimi lwa tshimuma lu ḓo fhululedza.’ (Yesaya 35:6) Naho nga zwiṅwe zwifhinga a tshi kulea nungo, fhedzi u dzula o takala. Zwenezwi zwi a konadzea ngauri u dzula o farakanea nga zwithu zwa Mudzimu na u vha na khonani dza Vhakriste. U dzula hawe o takala na u vha na lutendo lwo khwaṱhaho zwi ṋea vhuṱanzi ha uri u shumela Yehova zwi ita uri vhutshilo vhu takadze hu sa londwi vhuleme.