Kanzhi vhathu vha ṱoḓa u vha na mulalo, u fulufhedzea na vhuthu. Nga zwenezwo, ndi ngani kanzhi ri tshi vhona vhuvemu, u farwa luvhi na tshiṱuhu? Tshifhinga tshoṱhe ri pfa mivhigo ya mafhungo a shushaho. Naa hu na muthu ane a khou lingedza u ita uri vhathu vha ite vhuvhi?—Vhalani 1 Yohane 5:19.

Naa Mudzimu o sika vhathu vhe na nḓowelo ya u ita vhuvhi? Hai, Yehova Mudzimu o sika vhathu a tshi ḓifanyisa, vhe na nḓowelo ya u edzisa lufuno lwawe. (Genesi 1:27; Yobo 34:10) Fhedzi Mudzimu o dovha a ṋea vhathu mbofholowo ya u ḓikhethela. Musi vhabebi vhashu vha u thoma vha tshi ita vhuvhi, vho landula tsumbo ya Mudzimu nahone vha vha vhathu vha songo fhelelaho. Ro mamela tshivhi khavho.—Vhalani Doiteronomio 32:4, 5.

Mudzimu u ṱoḓa ri tshi iledza nḓowelo dzashu mmbi. (Mirero 27:11) Ngauralo, u ri gudisa u iledza zwithu zwo khakheaho na nḓila ine ra nga wana ngayo dakalo ḽa vhukuma. Naho zwo ralo, zwino ri nga si kone u edzisa lufuno lwa Mudzimu nga ho fhelelaho.—Vhalani Psalme ya 32:8.

Naho vhuvhi ho ḓala zwino, Mudzimu u khou vhu tendela lwa tshifhinganyana u itela uri vhoṱhe vha vhone masiandoitwa a ṱungufhadzaho a vhuvhi. (2 Petro 3:7-9) Naho zwo ralo, hu si kale shango ḽi ḓo ḓala nga vhathu vho takalaho vhane vha thetshelesa Mudzimu.—Vhalani Psalme ya 37:9-11.