“NDI NGANI zwi tshi itea kha nṋe? Ndi ngani Mudzimu o tendela zwenezwi zwi tshi itea kha nṋe?” Dzenedzo ndi mbudziso dze Sidnei wa ngei Brazil ane a vha na miṅwaha ya 24 a ḓivhudzisa dzone. Musi a tshi wana khombo bammbeloni ḽa u suvhelela, o huvhala nahone a tshimbila nga tshidulo tsha vhaholefhali.

U shengela hune ha bveledzwa nga khombo, vhulwadze, u felwa nga ane wa mu funa, khombo dza mupo kana dzinndwa zwi nga ita uri vhathu vha ḓipfe vho laṱwa nga Mudzimu. Zwenezwi a si zwithu zwiswa. Yobo musimulalushaka wa misini ya kale o sedzana na maṱungu nga u tou tevhekana. O khakha nga u vhona Mudzimu mulandu, a ri: “Ndi tshi U vhidzelela a U tsha aravha; ndi tshi ima a U ntsedzi tshithu. Wo ntshandukela wa vha wa tshiṱuhu; U lwa na nṋe nga maanḓa a tshanḓa tshau.”—Yobo 30:20, 21.  

Yobo o vha a sa ḓivhi uri thaidzo dzawe dzi bva ngafhi kana uri ndi ngani dzo mu wela kana ndi nnyi o zwi tendelaho. Zwi takadzaho ndi uri Bivhili i a ri sumbedza tshiitisi tsha uri ndi ngani zwenezwi zwithu zwi tshi itea na nḓila ine ra fanela u aravha ngayo.

Bivhili i ri vhudza zwi tevhelaho malugana na Mudzimu: “Á shumá ha khakhi. Dzinḓila dzawe dzoṱhe dzo luga, Mudzimu wa ngoho a sí na mazwifhi, Mululamisi, ha ṱaluli.” (Doiteronomio 32:4) Nga zwenezwo, naa zwi a pfala kana u pfesesea uri Mudzimu ane a vha ‘mululamisi na a sa ṱaluli’ a nga ṱoḓa vhathu vha tshi shengela kana a vha pfisa vhuṱungu u itela u vha kaidza?

Zwo fhambanaho na zwenezwo, Bivhili i ri vhudza uri: “Hu songo vha na ane musi a tshi lingwa a ri: ‘Ndi lingwa nga Mudzimu.’ Ngauri Mudzimu ha lingwi nga vhuvhi na ene muṋe ha lingi muthu.” (Yakobo 1:13) Zwi re zwone ndi uri Bivhilini ri guda uri Mudzimu o sika vhathu vho fhelela. O ṋea Adamu na Eva vhane vha vha vhathu vha u thoma haya havhuḓi, zwithu zwoṱhe zwine vha zwi ṱoḓa vhutshiloni na mushumo wa ndeme we vha vha vha tshi fanela u u ita. Mudzimu o vha vhudza uri: “Bebani ni ande ni ḓadze shango, ni ḽi kunde.” Adamu na Eva vho vha vha si na tshiitisi tsha uri vha pfe u nga Mudzimu o vha laṱa.—Genesi 1:28.

Fhedzi ṋamusi, vhutshilo vhu a konḓa vhukuma. Zwi re zwone ndi uri kha ḓivhazwakale yoṱhe, vhuimo ha vhathu vhu khou ṋaṋa u vha vhuvhi vhu tshi ya. Maipfi a tevhelaho a amba ngoho musi a tshi ri: “Zwivhumbwa zwoṱhe zwi kha ḓi gomela nahone zwoṱhe zwi kha ḓi pfa vhuṱungu u swika zwino.” (Vharoma 8:22) Ho itea mini?

U itela u pfesesa uri ndi ngani ri tshi shengela, ri fanela u thoma ra pfesesa nḓila ye zwa thoma ngayo. Musi Adamu na Eva vha tshi ṱuṱuwedzwa nga muruṅwa wa ḽishandukwa, we nga murahu a vhidzwa Sathane Diabolo, vho landula zwilinganyo zwa Mudzimu zwa u ḓivha zwo lugaho na zwi songo lugaho samusi mulayo wo vha dzivhisa u sa ḽa “muri wa u ṱalukanya vhuḓi na vhuvhi.” Diabolo o vhudza Eva uri a vha nga fi arali vha sa thetshelesa Mudzimu, nga zwenezwo, o vha a tshi khou pomoka Mudzimu sa mudzia mazwifhi. Sathane o dovha a pomoka Mudzimu uri u khou thivhela vhathu u ḓikhethela uri ndi zwifhio zwo lugaho na zwi songo lugaho. (Genesi 2:17; 3:1-6) Sathane o amba uri vha ḓo tshila khwine vha si ho nga fhasi ha vhuvhusi ha Mudzimu. Zwoṱhe zwenezwi zwo ita uri hu vhe na mbudziso ya ndeme ya uri—Naa Mudzimu o vha o tea u vhusa?

Diabolo o dovha a amba nga ha maṅwe mafhungo. O pomoka vhathu uri vha shumela Mudzimu vhe na zwi zwiṱuṱuwedzi zwa tseḓa. Diabolo o vhudza Mudzimu zwi tevhelaho nga ha Yobo a fulufhedzeaho: “Naa a si Iwe we wa mu fhaṱela khura dza u tanga ene, na muṱa wawe, na zwoṱhe zwi re zwawe? . . . Hone, edzou isa tshanḓa tshau U dzhie zwoṱhe zwine a vha nazwo’, U vhone a tshi ḓo U ṱala.” (Yobo 1:10, 11) Naho maipfi a Sathane o vha a tshi khou ambela kha Yobo, o vha a tshi khou amba uri vhathu vhoṱhe vha shumela Mudzimu vhe na zwiṱuṱuwedzi zwa tseḓa.

Ndi ifhio iṅwe nḓila ya khwine ine eneo mafhungo a nga tandululwa ngayo nga ho fhelelaho? Mudzimu o ṱalifhaho vhukuma, u na thandululo ya khwine ine  ya ita uri ri pfe ri songo laṱedzwa ngae. (Vharoma 11:33) O tendela vhathu vha tshi ḓivhusa lwa tshifhinganyana nahone a ita uri masiandoitwa a sumbedze uri ndi vhufhio vhuvhusi ha khwine.

Vhuimo vhu si havhuḓi kha ḽifhasi ṋamusi vhu sumbedza zwavhuḓi uri mivhuso ya vhathu yo kundelwa. Mivhuso ya shango a yo ngo kundelwa fhedzi u ḓisa mulalo, u tsireledzea na dakalo, fhedzi yo ita uri ḽifhasi ḽi ṋaṋe u tshinyala. Zwenezwi zwi tikedza ngoho ya ndeme ye ya ṅwalwa Bivhilini ine ya ri: “Munna hune a ya ha ḓi-isi na̗ u̗ kanda a khwaṱhisa.” (Yeremia 10:23) Ndi nḓila ya Mudzimu ya u vhusa fhedzi ine ya nga ita uri hu vhe na mulalo wa tshoṱhe, dakalo na mvelaphanḓa kha vhathu, ngauri yeneyo ndi ndivho ya Mudzimu.—Yesaya 45:18.

Mudzimu u ḓo ḓadzisa hani ndivho yawe nga ha vhathu? Humbulani uri Yesu o gudisa vhafunziwa vhawe u rabela uri: “Muvhuso wau nga u ḓe. Zwine wa funa nga zwi itwe fhano kha ḽifhasi vhunga zwi tshi itwa ngei ṱaḓulu.” (Mateo 6:10) Vhukuma, nga tshifhinga tsho teaho, Mudzimu u ḓo fhelisa zwithu zwoṱhe zwine zwa ita uri hu vhe na tshengelo a tshi shumisa Muvhuso wawe. (Daniele 2:44) Vhushai, malwadze na lufu zwi ḓo vha zwi si tsheeho. Malugana na vhashai, Bivhili i sumbedza uri Mudzimu u ḓo “lamulela [mushai] a tshi vhidzelela.” (Psalme ya 72:12-14) Kha vha lwalaho, Bivhili i fulufhedzisa uri: “Kha vho dzulaho fhano a huna ane a ḓo ri: Ndi a lwala.” (Yesaya 33:24) Na kha vho faho vhane vha vha muhumbuloni wa Mudzimu, Yesu o ri: “Hu ḓa tshifhinga tshine vhoṱhe vha re mavhiḓani vha ḓo pfa ipfi ḽawe vha bva.” (Yohane 5:28, 29) Ndi mafulufhedziso avhuḓi lungafhani!

Nga murahu ha miṅwaha ya 17 musi Sidnei we a bulwa mathomoni o no wana khombo, o ri: “A thongo vhuya nda vhona Yehova Mudzimu mulandu, fhedzi mathomoni ndo vha ndi tshi vhona u nga Mudzimu o nndaṱedza. Hu na maḓuvha ane nda ḓipfa ndo ṱungufhala vhukuma nahone ndi a lila musi ndi tshi humbula nga ha vhuholefhali hanga. Naho zwo ralo, musi ndi tshi vhala Bivhilini ndo kona u pfesesa uri Mudzimu o vha a sa khou nṱarafa nga khombo ye ya nngwela. Samusi Bivhili i tshi ri, ‘ri sokou ṱangana nazwo nga tshifhinga tshazwo.’ U rabela Yehova na u vhala maṅwe maṅwalo zwo ita uri ndi khwaṱhe nga lwa muya nahone ndi dzule ndi na mavhonele avhuḓi.”—Muhuweleli 9:11; Psalme ya 145:18; 2 Vhakorinta 4:8, 9, 16.

Musi ri tshi dzula ri tshi humbula zwiitisi zwa uri ndi ngani Mudzimu a tshi tendela tshengelo na nḓila ine a ḓo i fhelisa ngayo, zwi ri thusa u kunda u ḓipfa u nga Mudzimu o ri laṱedza. Ri na vhungoho ha uri Mudzimu u “lambedza vhane vha mu ṱoḓa zwi tshi bva mbiluni.” Ane a vha na lutendo kha Mudzimu na Murwa wawe a nga si ḓipfe o laṱedzwa.—Vhaheberu 11:6; Vharoma 10:11.