Ṱhanzi dza Yehova dzi tenda uri “Maṅwalo oṱhe o hevhedzwa nga Mudzimu nahone a a vhuyedza.” (2 Timotheo 3:16) Ri shumisa Bivhili sa vhulivhisi vhu shumaho u itela u guda nga ha Musiki na u tshila vhutshilo vhu re na ndivho.

Bivhili i ri: “U vha ḓivhise zwauri dzina ḽau ḽi pfi Yehova, Wa-Ṱaḓulu-ṱaḓulu. Mashangoni oṱhe ndi Iwe u woṱhe.” (Psalme ya 83:18) Nga zwenezwo, ri gwadamela Yehova Mudzimu fhedzi nahone sa Ṱhanzi dzawe ri lwela u ḓivhadza dzina ḽawe.—Yesaya 43:10-12.

Sa Vhakriste, ri tenda uri Yesu “Murwa wa Mudzimu,” * o ḓa kha ḽifhasi nahone a vha Messia. (Yohane 1:34, 41; 4:25, 26) Musi Yesu o no fa, o vuselwa ṱaḓulu. (1 Vhakorinta 15:3, 4) Nga murahu, o vhewa sa Khosi ya Muvhuso wa Mudzimu. (Nzumbululo 11:15) Wonoyo Muvhuso ndi wa vhukuma, une wa ḓo vusulusa Paradiso kha ḽifhasi. (Daniele 2:44) Bivhili i ri: “Shango ḽi ḓo vha ifa ḽa vho vuḓaho; ndi vhone vha u ḓo takalela muḓalo wa mulalo.”—Psalme ya 37:11, 29.

Ṱhanzi dza Yehova dzi tenda uri maitele a Bivhili a nga vhuyedza vhathu na ṋamusi. (Yesaya 48:17, 18) Nga zwenezwo, ri farelela kha eneo maitele nga vhuronwane. Sa tsumbo, a ri dahi kana u shumisa luvhi zwidzidzivhadzi ngauri Bivhili i ri tsivhudza u iledza maitele ane a tshikafhadza mihumbulo na mivhili yashu. (2 Vhakorinta 7:1) Zwiṅwe hafhu, ri iledza maitele o sasaladzwaho nga ho livhaho Bivhilini, a nga ho vhudakwa, vhupombwe na u tswa.—1 Vhakorinta 6:9-11.