Naho Milayo ya Mushe i sa vhofhi kha Vhakriste, milayo mivhili mihulwanesa​—u funa Mudzimu na vhahashu—​i kha ḓi ri vhudza zwine Mudzimu a ṱoḓa ri tshi zwi ita. (Mat 22:37-39) A si lufuno lune ra tou bebiwa ri nalwo. Ri tea u lu ṱahulela. Nga nḓila ḓe? Nḓila ya ndeme ndi nga u vhala Bivhili ḓuvha ḽiṅwe na ḽiṅwe. Musi ri tshi humbula nga ha pfaneleo dza Mudzimu dzi wanalaho Maṅwaloni, ri vhona “madzanga a Yehova.” (Ps 27:4) Zwi ita uri ri mu funese na u humbula u fana nae. Zwenezwi zwi ri ṱuṱuwedza u tevhedza ndaela dzawe, u katela na u sumbedza lufuno lwa u ḓikumedza kha vhaṅwe. (Yoh 13:34, 35; 1Yo 5:3) Hu na nḓila tharu dza u ita uri muvhalo wa Bivhili u vhe u takadzaho:

• Shumisani maṱo aṋu a muhumbulo na zwipfi zwaṋu. Ḓivhoneni ni henefho. Ndi mini zwine na zwi vhona, u zwi pfa na u zwi nukhedza? Vhane vha vha henefho vha nga vha vha tshi khou ḓipfa hani?

• Shumisani nḓila dzo fhambanaho. Zwiṅwe zwine na nga zwi lingedza khezwi: Vhalelani nṱha kana ni tevhelele musi no thetshelesa audio. Vhalani nga ha muṅwe muvumbedzwa Bivhilini kana iṅwe thero nṱhani ha u vhala ndima nga u tou tevhekana. Sa tsumbo, shumisani Appendix A7 A, B, C, D, E, F, G, H kana B12 A, B kha New World Translation of the Holy Scriptures u vhala nga ha Yesu. Vhalani ndima yoṱhe ye ndimana ya ḓuvha ya thewa khayo. Vhalani bugu dza Bivhili nga nḓila ye dza tevhekana ngayo.

• Vhalelani u pfesesa. Ndi khwine u vhala ndima nthihi na i pfesesa na elekanya nga hayo nṱhani ha u vhala ndima nnzhi u itela u fhedza. Ṱhogomelani vhubvo na zwidodombedzwa zwa mafhungo. Shumisani mimapa na ndimana dzine dza tshimbidzana na yeneyo ndima. Itani ṱhoḓisiso nga ha zwine na si zwi pfesese. Arali zwi tshi konadzea, musi ni tshi elekanya, fhedzani tshifhinga tshi linganaho na tshe na tshi fhedza ni tshi khou vhala.