Muṱangano wa tsimu ndi ndugiselelo ya Yehova u fana na miṅwe miṱangano ya tshivhidzo. Yeneyi miṱangano i ri ṱuṱuwedza uri ri funane na u ita mishumo mivhuya. (Hev 10:24, 25) Muṱangano wa tsimu u tea u fhedza mimunithi miṱanu u ya kha ya sumbe. U amba uri nnyi u ḓo tshimbila na nnyi, tsimu i ḓo shumiwa ngafhi na u rabela zwi tea u itwa nga tshenetshi tshifhinga (Arali muṱangano wa tsimu u tshi khou tevhela muṅwe muṱangano, u tea u vha mupfufhi u fhira henefha.) O faraho muṱangano wa tsimu, u tea u lugiselela mafhungo ane a ḓo vhuyedza vhane vha khou ya tsimuni nga ḽeneḽo ḓuvha. Sa tsumbo, nga Mugivhela zwi nga thusa u haseledza nga ha zwine zwa nga ambiwa na ṋemuḓi samusi vhunzhi ha vhahuweleli vha tshi ḓo vha vha songo ya tsimuni vhukati ha vhege. Ndi zwifhio zwiṅwe zwine zwa nga haseledzwa?

• Tsumbo dza u thoma nyambedzano dzi re kha Tshibugwana Tsha Muṱangano Wa Vhutshilo Na Vhuḓinḓa Hashu Ha Vhukriste

• Nḓila ya u thoma nyambedzano ri tshi shumisa zwithu zwine zwa khou bva u itea kana zwo ambiwa kha mafhungo

• Nḓila ya u fhindula muthu ane a khou ḓa na zwiitisi zwa sa ṱoḓa u thetshelesa

• Nḓila ya u fhindula muthu a sa tendi uri Mudzimu u hone, muthu ane a tenda uri zwithu zwo sokou bvelela, ane a amba luṅwe luambo kana ane a dzhena kereke i songo ḓoweleaho tsimuni yaṋu

• Nḓila ya u shumisa zwithu zwi re nga jw.org, JW Library^® app kana Bivhili

• Nḓila ya u shumisa tshiṅwe tsha zwithu zwi re kha Bogisi Ḽa Zwishumiswa Zwa U Funza

• Nḓila ya u huwelela nga dziṅwe nḓila, dzi ngaho sa u huwelela nga founu, u ṅwala marifhi, u huwelela fhethu ha vho muthu munzhi, u ita lwendo lwa u vhuyelela kana u guda na mugudiswa wa Bivhili

• U humbudzana nga ha u tsireledzea, u tendelana na zwiimo, u vha na mikhwa, u vha na mavhonele avhuḓi kana zwiṅwe zwi fanaho na zwenezwo

• U vusulusa ngudo kana vidio i re kha bugwana Ḓiṋekedzeleni Kha U Vhala Na U Funza

• Nḓila ya u khuthadza na u thusa muthu ane na khou tshimbila nae tsimuni

• Luṅwalo lune lwa tshimbidzana na mushumo wa u huwelela kana tshenzhelo yavhuḓi i ambaho nga ha tsimu