Naa Mudzimu O Ita Uri Zwithu Zwi Tshilaho Zwi Sokou Bvelela?
Bivhili i a fhindula
Hai. Bivhili i amba uri Mudzimu o sika vhathu na “mifuda” ya zwipuka na zwimela. a (Genesi 1:12, 21, 25, 27; Nzumbululo 4:11) I amba uri vhathu vhoṱhe vha bva kha Adamu na Eva vhane vha vha vhabebi vhashu vha u thoma. (Genesi 3:20; 4:1) Bivhili a i tendelani na mafhungo a uri Mudzimu o ita uri zwithu zwoṱhe zwi tshilaho zwi sokou bvelela. Fhedzi Bivhili i tendelana na vhorasaintsi vho no amba uri hu na mifuda yo fhambananaho ya zwithu zwi tshilaho.
Zwine vhaṅwe vha zwi tenda
Vhathu vhane vha tenda uri Mudzimu o ita uri zwithu zwi tshilaho zwi sokou bvelela vha amba zwithu zwi sa fani nga ha uri o zwi itisa hani. U ya nga Encyclopædia Britannica, vhaṅwe vha tenda uri Mudzimu o ita uri kha zwimela kana zwipuka zwine zwa kona u tshila na u anda kha zwiimo zwo fhambananaho hu vhe na tshithu tshine tsha ita uri hu bve zwiṅwe zwinzhi khatsho.
Zwiṅwe zwine vhaṅwe vha zwi tenda:
Zwithu zwoṱhe zwi tshilaho zwi bva kha tshithu tshe tsha vha tshi hone kale.
Tshithu tshi tshilaho tshi nga shanduka tsha vha mufuda wa tshiṅwe tshithu tshi tshilaho.
Ndi Mudzimu o itaho uri zwithu zwi vhe nga yeneyi nḓila.
Naa pfunzo ya uri zwithu zwo sokou bvelela i a tendelana na Bivhili?
Pfunzo ya uri zwithu zwo sokou bvelela i ita uri zwi nge mafhungo a tsiko o ambiwaho kha bugu ya Genesi a si ngoho. Fhedzi Yesu o amba nga ha mafhungo a re kha Genesi, zwi sumbedzaho uri zwi re kha ysseneyi bugu ndi ngoho. (Genesi 1:26, 27; 2:18-24; Mateo 19:4-6) Bivhili i amba uri musi Yesu a sa athu ḓa kha ḽifhasi, o vha a tshi dzula ṱaḓulu na Mudzimu nahone o thusa Mudzimu kha u ita uri “zwithu zwoṱhe” zwi vhe hone. (Yohane 1:3) Ndi ngazwo mafhungo a uri Mudzimu o ita uri zwithu zwi tshilaho zwi sokou bvelela a sa tendelani na zwine Bivhili ya zwi funza.
Naa vhukoni ha zwimela na zwipuka ha u kona u shanduka na zwiimo zwi sumbedza uri zwo sokou bvelela?
Bivhili a i ambi uri hu nga vha na mifuda mingana kha mufuda wa tshithu tshi tshilaho. Nahone a i hanedzi uri mifuda yo fhambananaho ya zwimela na zwipuka zwe Mudzimu a zwi sika zwi a kona u shanduka kha zwiimo zwo fhambananaho. Fhedzi zwenezwi a zwi ambi uri zwi shanduka zwa vha tshiṅwe tshithu u ya nga zwine vhaṅwe vha zwi tenda.
a Kanzhi musi vhorasaintsi vha tshi vhona mufuda une vha si u ḓivhe wa tshimela kana tshipuka vha amba uri zwi bva kha tshiṅwe tshe tsha vha tshi hone, fhedzi ngoho ndi uri ndi mufuda muthihi wa tshimela kana tshipuka, zwo fhambana na zwine vha zwi ḓivha. Na bugu ya Genesi i sumbedza uri hu na mifuda yo fhambananaho ya zwimela na zwipuka.
You May Also Like
NGUDO DZI RE BIVHILINI
Naa Ḽifhasi Na Ṋaledzi Zwo Tou Sikwa?
Kanzhi vhathu a vha pfesesi zwavhuḓi zwine Bivhili ya zwi amba nga ha tsiko kana vha zwi dzhia sa ngano. Naa ni nga fhulufhela zwine Bivhili ya zwi amba?
MBUDZISO DZINE DZA ANZELA U VHUDZISWA
Naa Ṱhanzi dza Yehova vha a Tenda uri Zwithu Zwoṱhe zwo Sikwa nga Maḓuvha a Rathi a Vhukuma?
Naa ni a zwi ḓivha uri mihumbulo ya vhaṅwe vhane vha tikedza yeneyi pfunzo i lwisana na Bivhili?
BUGU NA BUGWANA
Naa Zwithu Zwi Tshilaho Zwo Tou Sikwa?
Zwine na zwi tenda nga ha mathomo a vhutshilo ndi zwa ndeme.
NGA HA RIṊE
Humbelani U Dalelwa
Haseledzani mbudziso i bvaho Bivhilini kana ni gude zwo engedzeaho nga ha Ṱhanzi dza Yehova.