Naho Bivhilini hu si na ipfi u “bvisa kana u thutha thumbu,” vese nnzhi dza Bivhili dzi ri thusa uri ri kone u pfesesa nḓila ine Mudzimu a dzhia ngayo vhutshilo ha muthu u katela na ha ṅwana a sa athu bebwaho.

 Vhutshilo ndi tshifhiwa tshi bvaho kha Mudzimu. (Genesi 9:6; Phisalema 36:9) U dzhia vhutshilo hoṱhe vhu ha ndeme, u katela na vhutshilo ha ṅwana a re mbumbeloni. Ngauralo, arali muthu a vhulaya nga khole ṅwana a sa athu bebiwaho, zwi fana na musi o vhulaya muthu.

 Mulayo we Mudzimu a u ṋea Vhaisiraele wo vha u tshi ri: “Arali vhanna vha tshi khou lwa nga tshavho vha huvhadza mufumakadzi o vhifhaho muvhilini, a beba tshifhinga tshi sa athu u swika, fhedzi khombo yeneyo i si vhulaye muthu, u tea u lifha tshinyalelo ine ya ḓo ṱoḓwa nga munna wa onoyo mufumakadzi; u tea u badela tshelede ine ya ḓo ṱoḓwa nga vhahaṱuli. Fhedzi arali a fa, u tea u lifha vhutshilo nga vhutshilo.”—Ekisoda 21:22, 23. a

•  Vhutshilo ha muthu vhu thoma lini?

•  Naa Mudzimu u ḓo hangwela muthu we a bvisa kana u thutha thumbu?

•  Naa zwo khakhea u bvisa kana u thutha thumbu arali vhutshilo ha mme kana ha ṅwana vhu khomboni?

 Musi mufumakadzi a tshi vhifha muvhilini, Mudzimu u dzhia onoyo ṅwana a re mbumbeloni sa muthu ane a khou tshila. Ipfini ḽawe Bivhili, Mudzimu u dzulela u amba uri ṅwana a sa athu bebwaho ndi muthu o ḓiimelaho nga eṱhe. Ṱhogomelani tsumbo dzine dza sumbedza uri Mudzimu u dzhia vhutshilo ha ṅwana a re mbumbeloni vhu tshi fana na ha ṅwana o no bebiwaho.

•   A tshi livhiswa nga muya wa Mudzimu, Khosi Davida o amba na Mudzimu a ri: “Wo mmbona ndi tshi kha ḓi vhumbea.” (Phisalema 139:16) Mudzimu o vha a tshi ḓivha Davida na u mu dzhia sa muthu naho o vha a sa athu bebiwa.

•   Zwiṅwe hafhu, musi muporofita Yeremia a sa athu bebiwa, Mudzimu o vha a tshi vho zwi ḓivha uri u ḓo mu ṋea mushumo wo khetheaho. Mudzimu o amba nae a ri: “Ndo u ḓivha ndi sa athu u u vhumba mbumbeloni, ndo u khetha u sa athu u bebwa. Ndo u ita muporofita wa dzitshaka.”—Yeremia 1:5.

•   Luka muṅwali wa Bivhili we a vha e dokotela, o shumisa ipfi ḽi fanaho ḽa Tshigerika musi a tshi amba nga ha ṅwana a sa athu bebiwaho na ṅwana o no bebiwaho.—Luka 1:41; 2:12, 16.

 Mudzimu a nga hangwela vhathu vhe vha bvisa kana u thutha thumbu. Arali zwino vha tshi vho dzhia vhutshilo nga nḓila ine Mudzimu a vhu dzhia ngayo, a vho ngo tea u ḓivhona mulandu nga nḓila yo kalulaho. “Yehova u a khathutshela na u pfela vhuṱungu . . . Vhutshinyi hashu o vhu laṱa kule, vhunga vhubvaḓuvha vhu kule na vhukovhela.” b (Phisalema 103:8-12) Yehova u ḓo hangwela vhoṱhe vhane vha rembuluwa zwi tshi bva mbiluni kha zwivhi zwavho zwe vha zwi ita tshifhingani tsho fhiraho, u katela na vhathu vhe vha bvisa kana u thutha thumbu.—Phisalema 86:5.

 U ya nga zwine Bivhili ya zwi amba nga ha vhutshilo ha ṅwana a sa athu bebiwaho, muthu u ḓo vha o khakha arali a khetha u bvisa kana u thutha thumbu nga nṱhani ha uri hu na khonadzeo ya uri mutakalo wa mme kana wa ṅwana u nga vha khomboni.

 Kha vhuimo vhu songo ḓoweleaho, hu pfi mini arali ha vha na vhuimo ha shishi vhune ha kombetshedza uri hu khethwe u tshidzwa mme kana ṅwana? Kha vhuimo ho raloho, vhane vha katelwa vha tea u ita phetho ya uri hu tea u tshidzwa vhutshilo ha nnyi.