Ni nga kona u ḓivha Mudzimu nga u guda nga hae na nga u ita zwithu zwine zwa mu takadza. Ndi hone Mudzimu a tshi ḓo “sendela tsini na inwi.” (Yakobo 4:8) Bivhili i ri khwaṱhisedza uri “u tsini na muṅwe na muṅwe washu.”—Mishumo 17:27.

•  Zwine ra tea u ita u itela u ḓivha Mudzimu

•  Mazwifhi nga ha u ḓivha Mudzimu

 Vhalani Bivhili

•  Zwine Bivhili ya zwi amba: “Maṅwalo oṱhe o hevhedzwa nga Mudzimu.”—2 Timotheo 3:16.

•  Zwine zwa amba zwone: Mudzimu ndi Muṅwali wa Bivhili. O ita uri vhaṅwali vha Bivhili vha ṅwale mihumbulo yawe. Mudzimu o shumisa yeneyi bugu yo khetheaho u itela u ri vhudza nḓila ine ra tea u tshila ngayo. O ita na u ri dzumbululela zwiṅwe nga hae, u katela lufuno lwawe, u haṱula na u khathutshela hawe.—Ekisoda 34:6; Dotoronomio 32:4.

•  Zwine na nga ita: Vhalani Bivhili ḓuvha ḽiṅwe na ḽiṅwe. (Yoshua 1:8) Elekanyani nga ha zwine na zwi vhala, ni ḓivhudzise uri: ‘Aya mafhungo a ngudisa mini nga ha Mudzimu sa Muthu wa vhukuma?’—Phisalema 77:12.

   Sa tsumbo, vhalani Yeremia 29:11 nahone ni ḓivhudzise uri: ‘Mudzimu u ṱoda ndi tshi vha na mulalo kana dzikhakhathi? Ndi Mudzimu o no lifhedza kana u ṱoḓa ndi tshi vha na vhumatshelo havhuḓi?’

 Sedzani nga vhuronwane zwe Mudzimu a sika

•  Zwine Bivhili ya zwi amba: “Ri a kona u vhona zwine [Mudzimu] a vha zwone kha zwe a zwi sika.”—Vharoma 1:20.

•  Zwine zwa amba zwone: Samusi zwithu zwo olwaho zwi tshi dzumbulula zwiṅwe nga ha muthu o zwi olaho kana mutshini wo serekanaho u tshi ri vhudza zwiṅwe nga ha muthu o u itaho, nga hu fanaho na zwithu zwe Mudzimu a zwi sika zwi ri dzumbululela zwiṅwe nga hae. Sa tsumbo, nḓila ye vhuluvhi ha serekana na u kona u humbula zwithu zwinzhi ngayo zwi sumbedza nḓila ye Mudzimu a ṱalifha ngayo. Maanḓa a re kha ḓuvha na dziṅwe ṋaledzi zwi sumbedza maanḓa awe.—Phisalema 104:24; Yesaya 40:26.

•  Zwine na nga ita: Ḓivhetsheleni tshifhinga tsha u sedza na u guda nga ha tsiko. Nahone ni ḓivhudzise uri: ‘Ndila ye zwithu zwa sikwa ngayo i mangadzaho i ri vhudza mini nga ha Mudzimu?’ a Ndi ngoho uri hu na zwinzhi zwine tsiko i si kone u ri vhudza nga ha Musiki washu. Ndi ngazwo o ri ṋea Bivhili.

 Shumisani dzina ḽa Mudzimu

•  Zwine Bivhili ya zwi amba: “Ndi ḓo mu tsireledza nga nṱhani ha uri u ḓivha dzina ḽanga. U ḓo mmbidzelela, nṋe nda aravha.”—Phisalema 91:14, 15.

•  Zwine zwa amba zwone: Mudzimu ane dzina ḽawe ḽa vha Yehova, u na ndavha na vhane vha ḓivha dzina ḽawe na u ḽi ṱhonifha musi vha tshi ḽi shumisa. b (Phisalema 83:18; Maḽeaxi 3:16) Mudzimu o ḓiḓivhadza kha riṋe nga u ri vhudza dzina ḽawe. Mudzimu u ri: “Ndi nṋe Yehova. Ndi ḽone dzina ḽanga.”—Yesaya 42:8.

•  Zwine na nga ita: Musi ni tshi khou amba nga ha Yehova, shumisani dzina ḽawe.

 Ambani na Yehova nga thabelo

•  Zwine Bivhili ya zwi amba: “Yehova u tsini na vhoṱhe vhane vha mu vhidzelela.”—Phisalema 145:18.

•  Zwine zwa amba zwone: Yehova u sendela tsini na vhane vha mu rabela nga lutendo. Thabelo ndi tshipiḓa tsha vhurabeli, i sumbedza uri ri ṱhonifha Mudzimu washu nga maanḓa.

•  Zwine na nga ita: Rabelani Mudzimu tshifhinga tshoṱhe. (1 Vhathesalonika 5:17) Mu vhudzeni nga ha zwine zwa ni vhilaedzisa na nḓila ine na ḓipfa ngayo.—Phisalema 62:8. c

 Ivhani na lutendo kha Mudzimu

•  Zwine Bivhili ya zwi amba: “U nga si kone u takadza Mudzimu arali u si na lutendo.”—Vhahevheru 11:6.

•  Zwine zwa amba zwone: Ri tea u vha na lutendo kha Mudzimu u itela u sendela tsini nae. Musi Bivhili i tshi amba nga ha u vha na lutendo, i vha i tshi khou amba u fhira u sokou tenda uri u hone. Zwi katela na u mu fhulufhela nga ho fhelelaho na u fhulufhela uri zwoṱhe zwe a fhulufhedzisa zwi ḓo itea na uri milayo yawe i a vhuyedza. Uri ni kone u vha na vhushaka havhuḓi na muthu, ni tea u mu fhulufhela.

•  Zwine na nga ita: Ni tea u vha na nḓivho uri ni kone u vha na lutendo lu si lwa muhoyo. (Vharoma 10:17) Nga zwenezwo, gudani Bivhili, uri ni kone u fhulufhela Mudzimu na nyeletshedzo dzawe. Ṱhanzi dza Yehova dzi nga takalela u guda na inwi Bivhili. d

 Itani zwi takadzaho Mudzimu

•  Zwine Bivhili ya zwi amba: “U funa Mudzimu zwi katela u tevhedza milayo yawe.”—1 Yohane 5:3.

•  Zwine zwa amba zwone: Yehova u tsini na vhane vha sumbedza uri vha a mu funa nga u ita zwoṱhe zwine vha nga kona u itela u thetshelesa milayo yawe.

•  Zwine na nga ita: Musi ni tshi khou guda Bivhili, ṱhogomelani zwine Mudzimu a zwi funa na zwine a si zwi fune. Ḓivhudziseni uri: ‘Ndi fanela u tshanduko dzifhio u itela u takadza Musiki wanga?’—1 Vhathesalonika 4:1.

 Vhonani uri Mudzimu u na ndavha na inwi nga u tevhedza nyeletshedzo dzawe

•  Zwine Bivhili ya zwi amba: “Vhonani uri [Mudzimu] u na vhuthu vhungafhani!”—Phisalema 34:8, Bivhili Khethwa.

•  Zwine zwa amba zwone: Mudzimu u khou ni ramba uri ni ḓivhonele nga aṋu uri ndi wavhuḓi. Musi ni tshi vhona nḓila ine a ni funa na u ni tikedza ngayo, ni ḓo sendela tsini nae.

•  Zwine na nga ita: Musi ni tshi vhala Bivhili, tevhedzani nyeletshedzo dzawe, ni kone u vhona nḓila ine na vhuyelwa ngayo nga u ita zwenezwo. (Yesaya 48:17, 18) Zwiṅwe hafhu, ṱhogomelani tsumbo dza vhathu vhe vha thuswa nga Mudzimu uri vha kone u kunda milingo, u khwinisa vhutshilo havho na ha muṱani na u takala zwa vhukuma. e

 Mazwifhi: A zwi konadzei u ḓivha Mudzimu.

 Ngoho: Hu na zwiṅwe nga ha Mudzimu zwine zwa nga ri konḓela u zwi pfesesa, sa uri Mudzimu ndi Muya. Fhedzi zwi a konadzea uri ri mu ḓivhe. Zwavhuḓi-vhuḓi Bivhili i amba uri ri tea u mu ḓivha u itela u wana vhutshilo vhu sa fheli. (Yohane 17:3) Bivhili i shumisa maipfi ane ra kona u a pfesesa u itela u ri vhudza nga ha Musiki washu, zwine a vha zwone, tshipikwa tshawe nga ha vhathu na ḽifhasi na milayo yawe. (Yesaya 45:18, 19; 1 Timotheo 2:4) Nahone samusi zwo no ambiwa, Bivhili i ri vhudza dzina ḽawe. (Phisalema 83:18) Nga zwenezwo, ri a kona u ḓivha Mudzimu na u sendela tsini nae.—Yakobo 4:8.