Bivhili i amba uri Mudzimu u ṱoḓa uri vhathu vha “iledz[e] u ḓifara luvhi nga zwa vhudzekani.” (1 Vhathesalonika 4:3) Bivhilini hu tshi ambiwa nga ha “u ḓifara luvhi nga zwa vhudzekani,” hu vha hu tshi khou ambiwa nga ha vhupombwe, vhudzekani vhukati ha vhathu vha mbeu i fanaho na vhudzekani vhukati ha munna na mufumakadzi vha songo vhinganaho.

•  Ndi ngani Mudzimu e na ndavha na uri vhathu vho vhingana kana a vho ngo vhingana?

•  Hu pfi mini nga ha u dzula noṱhe ni sa athu vhingana u itela u vhona arali ni tshi ḓo kona u dzula noṱhe no takala?

•  Vhavhingani vha nga khwaṱhisa hani mbingano yavho?

•   Mudzimu ndi ene muthomi wa mbinganoni. O i thoma musi a tshi ṱanganya vhavhingani vha u thoma. (Genesi 2:22-24) Ha ṱoḓi uri munna na mufumakadzi vha dzule vhoṱhe vha songo vhingana.

•   Mudzimu u a ḓivha uri ndi zwifhio zwo teaho vhathu. O vha o ita uri mbingano i vhe mbofho ya tshoṱhe vhukati ha munna na mufumakadzi. Yeneyo mbofho yo vha i tshi ḓo vhuyedza na u tsireledza muṱa. Kha ri haseledze tshiṅwe tshifanyiso. Samusi vhulivhisi vhu bvaho kha muiti wa fanitshara vhu tshi ni sumbedza nḓila ine na nga ṱumanya ngayo zwipiḓa zwa fanitshara nga nḓila yo teaho, na vhulivhisi ha Mudzimu vhu ri vhudza nḓila ya u ita ngayo uri vhushaka ha muṱani vhu vhe havhuḓi. Vhulivhisi ha Mudzimu vhu vhuyedza vhane vha vhu tevhedza.—Yesaya 48:17, 18.

•   U ita zwa vhudzekani ni sa athu vhingana zwi nga vha na masiandoitwa a si avhuḓi. Sa tsumbo, zwi nga ita uri muthu a vhifhe muvhilini, a vhe na malwadze a phirela na u tsikeledzea. a

•   Mudzimu o ita uri vhanna na vhafumakadzi vha vhe na vhana musi vha tshi ita zwa vhudzekani. Kha Mudzimu, vhutshilo ho khethea nahone tshifhiwa tsha u vha na vhana ndi tsha ndeme vhukuma. Mudzimu u ṱoḓa ri tshi ṱhonifha tshenetshi tshifhiwa nga u ṱhonifha nzudzanyo ye a i ita ya mbingano.—Vhahevheru 13:4.

 A zwi ṱoḓei uri ni thome ni dzule noṱhe lwa tshifhinganyana ni sa athu vhingana uri ni kone u vha na mbingano yavhuḓi. Nṱhani hazwo, vhushaka vhu khwaṱha musi vhathu vho ḓikumedzela nahone vha tshi shumisana kha u tandulula thaidzo. b Mbingano i khwaṱhisa mbofho.—Mateo 19:6.

 Hu a ita hu tshi vha na thaidzo mbinganoni. Fhedzi vhavhingani vha nga vha na mbingano yavhuḓi nga u shumisa vhulivhisi vhu re Bivhilini. Khedzi tsumbo:

•   Mufarisi waṋu u tea u vha wa ndeme u fhira na inwi muṋe.—1 Vhakorinta 7:3-5; Vhafilipi 2:3, 4.

•   Dzulani ni tshi funana na u ṱhonifhana.—Vhaefesa 5:25, 33.

•   Ḓigudiseni u langa lulimi lwaṋu.—Mirero 12:18.

•   Ni songo fhela mbilu, ni ṱavhanye u hangwela.—Vhakolosa 3:13, 14.