Zwine Mudzimu a ni tamela zwone ndi uri ni mu ḓivhe, ni vhe khonani yawe, ni mu fune na u mu shumela nga mbilu yaṋu yoṱhe. (Mateo 22:37, 38; Yakobo 4:8) Ni nga guda u ita zwine Mudzimu a funa kha nḓila ye Yesu a tshila ngayo na kha zwe a zwi funza. (Yohane 7:16, 17) Yesu ho ngo sokou amba nga ha zwine Mudzimu a zwi funa, fhedzi o tshila u tendelana nazwo. Musi Yesu e kha ḽifhasi o ri: “Ndo ḓa ndi tshi bva ṱaḓulu uri ndi si ite zwine nda zwi funa, fhedzi ndi ite zwi funwaho nga o nthumaho.”—Yohane 6:38.

Naa hu ṱoḓea uri Mudzimu a ntsumbedze kana u mmbudza nga lwa vhuṱolo uri ndi mini zwine a ntamela zwone?

 Hai, ngauri Bivhili i na mulaedza une Mudzimu a ṱoḓa vhathu vhoṱhe vha tshi u ḓivha. I na zwoṱhe zwine na ṱoḓa u itela uri ni “fanelee nga vhuḓalo u ita mishumo yoṱhe yavhuḓi.” (2 Timotheo 3:16, 17) Mudzimu u ṱoḓa” uri ni shumise Bivhili na “ṱhalukanyo yaṋu” uri ni kone u guda uri ndi mini zwine Mudzimu a zwi ṱoḓa.—Vharoma 12:1, 2; Vhaefesa 5:17.

Naa ndi nga kona u ita zwine Mudzimu a funa?

 Ee ni nga zwi kona ngauri Bivhili i ri: “Milayo yawe a i konḓi.” (1 Yohane 5:3) Zwenezwi a zwi ambi uri u tevhela milayo ya Mudzimu zwo leluwa tshifhinga tshoṱhe. Fhedzi ni ḓo wana malamba manzhi nge na ita honoho vhuḓidini. Yesu o ri: “Hu takala vhane vha pfa ipfi ḽa Mudzimu, vha tevhedza zwine ḽa amba!”—Luka 11:28.