TE TE ricordi parché un dei àngeli de Dio l’è deventà Sàtana el Diaol? — L’era egoista e el volea esser adorà. Par quela el se ga metesto contra Dio. Sarà che Sàtana el ga catà altri àngeli che ghe ze ndati drio? — Si, la Bìblia li ciama ‘àngeli de Sàtana’ o demoni. — Apocalisse 12:9.

Sarà che questi àngeli cativi i crede in Dio? — La Bìblia la dise che ‘i demoni crede che Dio esiste’. (Tiago 2:19) Nel di de ancoi i ga paura, parché i sà che Dio li castigarà par tute le robe brute che i ga fato. Quale zele? —

La Bìblia la spiega che quei àngeli i ga assà el posto che i gavea nel cielo e i ze vegnesti qua do nela Tera par viver come i òmini. I lo ga fato parché i volea gaver relassion sessuai cole bele done dela Tera. (Génesi 6:1, 2; Giuda 6) Cossa seto sora le relassion sessuai? —

Un omo e una dona i fà relassion sessuai quando i resta tacadi de una maniera tanto spessial. Fursi dopo, nela pansa dela mama pol formarse un bambin. Cossita, quando nasse un bambin, el sposo e la sposa i pol tenderlo ben. Dio el vol che sol le persone maridade le gàpia questa union tanto spessial. Ma no’l assa gaver questo tipo de relassion ai àngeli.

Dopo che i àngeli i se ga fato corpi umani e i ga bio relassion sessuai cole done, ze nassesti i fioi e i ze cressesti fin deventar giganti. Questi qua i era tanto cativi e i ghe fea mal ale persone. Par questo motivo Dio el ga mandà un Dilùvio, el ga metesto el mondo soto àqua, par finir fora con questi giganti e tute le persone cative. Ma el ghe ga dito a Noè che fesse una arca par salvar le poche persone che fea le robe giuste. El Grando Istrutor el ga dito che l’è importante ricordar tuto quel che ga sucedesto nel Dilùvio. — Génesi 6:3, 4, 13, 14; Luca 17:26, 27.

Cossa che i ga fato i àngeli cativi quando l’è rivà el Dilùvio? — I ga assà de doperar i corpi umani che i se gavea parecià e i ze tornadi al cielo. Ma no i podea esser pi àngeli de Dio. Cossita, i ze deventadi àngeli de Sàtana, o demoni. E cossa ga sucedesto ai so fioi, i giganti? — I ze morti nel Dilùvio, insieme a tuti quei che no obedia a Dio.

Dopo del Dilùvio, Dio no’l ga pi assà che i demoni i se fesse corpi umani. Ma, anca se no podemo vederli, i demoni i seita far de tuto parché le persone le fae robe cative. Nel di de ancoi, i fà vegner pi problemi che mai parché i ze stati butadi do nela tera.

Seto parché no podemo veder i demoni?— Parché i ze spìriti e no i ga un corpo come el nostro. Ma semo sicuri che i esiste parché la Bìblia la dise che Sàtana “l’è drio imbroiar tute le persone dela tera” col aiuto dei so demoni. — Apocalisse 12:9, 12.

El Diaol e i so demoni i pol imbroiarne anca a noantri? — Se no stemo atenti, si. Ma no ghemo de ver paura. El Grando Istrutor el ga dito: ‘El Diaol no’l ga mia poder sora mi.’ Se restemo amighi de Dio, lu el ne darà protession contra el Diaol e i so demoni. — Gioani 14:30.

L’è importante saver quale robe cative i demoni i proa farne far. Proa pensar: che robe cative i demoni i ga fato quando i ze vegnesti qua nela tera? — Vanti del Dilùvio, i ga fato relassion sessuai con done, una roba che no i podea far. Nel di de ancoi i demoni i ze contenti quando le persone no le obedisse ale legi de Dio sora le relassion sessuai. Vedemo se te te ricordi: sol chi pol gaver relassion sessuai? — Te ghè rason, sol un omo e una dona maridadi.

Ancoi, toseti e tosete i fà relassion sessuai, e questo l’è sbalià. La Bìblia la mostra che l’è stà Dio che el ga fato i òrgani sessuai del omo e dela dona. Geovà el ga creà queste parte del corpo con un motivo spessial, par quela sol quei che i ze maridadi pol far relassion sessuai. I demoni i se la gode quando le persone le fà robe che Geovà el òdia. Par esémpio, quando un toseto e una toseta i giuga coi òrgani sessuai intrà de lori. Noantri no volemo far contenti i demoni, mia vera? —

Ai demoni ghe piase anca nantra roba che Geovà el òdia. Seto cossa? — La violensa. (Salmo 11:5) Le persone violente le ze crudele e le fà el mal ale altre persone. Ricòrdate: questo l’è quel che i giganti, i fioi dei demoni, i fea.

Ai demoni ghe piase anca spaurar le persone. Dele volte i fà finta esser una persona che la ze morta e i fà fin compagno la so voce. Cossita i imbroia tanti parché i creda che i morti i seite vivi e che se ghe possa anca parlar insieme. Alora, tante persone le crede che i spìriti, i fantasmi, i esiste.

Par quel che ghemo dito, ghemo de star su cole récie parché Sàtana e i so demoni no i ne imbroie. La Bìblia la ne avisa che ‘Sàtana el fà finta de esser un àngelo bon e quei che i ghe va drio i fà compagno’. (2 Corinti 11:14, 15) Ma, in verità, i demoni i ze cativi. Ndemo veder che maniere i pol doperar parché femo compagno de lori.

Se te ghe pensi ben, ndove che le persone le impara tanto sora la violensa, le relassion sessuai che Dio no’l vol, i spìriti e i fantasmi? — No l’è mia vera che l’è nei programi de television, filmi, giughi eletrònichi, internet e libri de storiete in quadreti? Queste robe ne fà esser pi amighi de Dio o invesse del Diaol e dei so demoni? Cossa pénsito? —

Chi che vol che scoltemo e vardemo robe sbaliade? — Si, Sàtana e i so demoni. Alora, cossa che mi e ti ghemo de far? — Ghemo de leder, scoltar e vardar robe bone e che ne giute a servir a Geovà. Te ne vien in mente qualcheduna? —

Se femo le robe giuste no ghemo de ver paura dei demoni parché Gesù l’è pi forte dei demoni. Lori i ga paura de Gesù parché una volta i ghe ga osà: “Sito vegnesto finirne fora?” (Marco 1:24) Che bel che sarà quando Gesù el finirà fora Sàtana e i so demoni, mia vera? — Intanto podemo esser sicuri che Gesù el ne protegerà de lori se restemo darente de lu e de so Pare.