1, 2. Che domande le persone le se fà?

I TOSATEI i fà tante domande. Te pol proar spiegar qualcossa par lori, ma lori i va domandarte: ‘Parché?’ E quando te proa darghe una risposta, pol esser che te scoltarè nantra volta la domanda: ‘Ma parché?’

² No importa se semo gióveni o veci, tuti gavemo domande da far. Femo domande come: ‘Cossa ndemo magnar, vestir o comprar?’ O fursi gavemo domande pi importanti sora la vita e sora el futuro. Ma quando no catemo le risposte giuste, pol esser che noantri assemo de ndar in serca dele risposte.

3. Parché tanti i pensa che no se pol catar le risposte ale domande pi importanti?

³ Sarà che la Bìblia la ga le risposte ale nostre domande pi importanti? Arquanti i pensa che si, ma par lori la Bìblia la par massa difìcile de capir. Lori i pensa che sol quei che i ze pi studiadi o i preti i ga le risposte. E ghen’è altri che i ga vergogna de dir che no i sa le risposte. E ti, cossa te pensi?

4, 5. (a) Che importanti domande se femo? (b) Parché ti te gavaria de ndar in serca dele risposte?

⁴ Fursi ti te vol le risposte ale domande come: ‘Parché mi son qua? Cossa sucede dopo dela morte? Come l’è Dio?’ Gesù, el gran Maestro, el ga dito: “Seité ndar in serca e  valtri cataré”. (Mateus 7:7) Alora, no stà mia fermarte fin che te cati le risposte giuste.

⁵ Se te ‘vè in serca’ dele risposte, sicuro che te le catarè ntela Bìblia. (Provérbios 2:1-5) Queste risposte no le ze massa difìcili de capir e le te giutarà a gaver una vita pi felice ancoi e una maraveiosa speransa par el futuro. Parlemo adesso sora una domanda che la assa tante persone confuse.

6. Parché tante persone le pensa che Dio no’l fà caso del so sofrimento?

⁶ Tante persone le pensa che Dio no’l fà caso de noantri. Par lore, se Dio pròpio el se importasse, el mondo saria tanto difarente. Noantri vedemo guere, òdio e poareti par tute le bande. Le persone le resta malade, le sofre e anca le more. Par quela, tanti i se domanda: ‘Se Dio el fesse pròpio caso de noantri, ­parché Lu no’l finisse con tuto sto sofrimento?’

7. (a) Come i lìderi religiosi i fà le persone creder che Dio l’è crudel? (b) Come savemo che Dio no’l ga la colpa dele robe rugne che le sucede?

⁷ Quando sucede robe rugne, i preti e i lìderi religiosi i dise che questa la è la volontà de Dio. Quando i dise cossita, i mete la colpa sora Dio e i fà le persone creder che Dio l’è crudel. Ma l’è pròpio vera? Nò, la Bìblia la insegna che el mal no’l vien de Dio e che Lu no’l proa a nissuni. Tiago 1:13 el dise: “Quando soto prova, che nissuni i diga: ‘Dio l’è drio proarme.’ Parché par robe rugne Dio no’l pol esser proà, gnanca el proa nissuni.” Questo vol dir che, ancora che Dio el assa robe rugne  suceder, Dio mai el fà ste robe. (Lesi Jó 34:10-12.) Femo un esémpio.

8, 9. Parché no l’è giusto colpar a Dio par i nostri problemi? Fà un esémpio.

⁸ Imagina un gióveno che el vive insieme coi so ­genitori. El so pupà, che lo ama tanto, lo ga insegnà a far tuto polito. Sol che sto gióveno el se ga rebelà contra el so pupà e l’è ndà via de casa. Lu el ga fato robe brute e el se ga messo in problemi. Elo de chi la colpa de sti problemi? Saria del pupà sol parché el ga assà el so fiol ndar via de casa? Sicuro che nò. (Lucas 15:11-13) Come el pupà, Dio el ga assà i umani rebelarse e far robe brute. Par quela quando sucede robe rugne, no l’è giusto colpar a Dio. Gavemo de ricordarse che no l’è mia Dio che fà ste robe.

⁹ Ghen’è un forte motivo par Dio assar ste robe brute suceder. Ntel capìtolo 11 te ndarè imparar cossa la Bìblia la insegna sora questo. Ma te pol esser sicuro che Dio el te ama e che mai el ga la colpa dei nostri problemi. Par dir la verità, Dio l’è el Ùnico che pol risolver i nostri problemi. —Isaías 33:2.

10. Parché semo sicuri che Dio ndarà indrissar tuto el dano che le persone rugne le ga fato?

¹⁰ Dio l’è santo. (Isaías 6:3) Tuto quel che el ga fato l’è puro, polito e bel. Par quela, noantri podemo fidarse de Lu. Difarente de Dio, i òmini dele volte i fà cose sbaliade. Fin el governante pi onesto no’l ga el poder de indrissar tuto el dano che le  persone rugne le fà. Ma sol Dio el ga sto poder e Lu el finirà fora col mal par sempre. —Lesi Salmo 37:9-11.

11. Come Dio el se sente quando te sì drio sofrir?

¹¹ A Dio no’l ghe piase mia veder le cose che le ze drio suceder ntel mondo gnanca veder el to sofrimento. La Bìblia la insegna che Dio el “ama la giustìssia”. (Salmo 37:28) Alora, podemo dir che el se importa tanto con quel che l’è giusto e con quel che l’è sbalià. Dio el òdia veder le persone drio sofrir. La Bìblia la dise che “el so cuor l’è restà disgustà” quando, nel passà, el ga visto el mondo pien de robe rugne. (Gênesis 6:⁠5, 6) Dio mai el càmbia. (Malaquias 3:6) La Bìblia la dise che Dio el fà pròpio caso de noantri. —Lesi 1 Pedro 5:7.

12, 13. (a) Parché noantri amemo e se importemo coi altri? Come ti te senti quando te vedi el sofrimento ntel mondo? (b) Parché podemo esser sicuri che Dio el finirà fora con tuto el sofrimento e le ingiustìssie?

¹² La Bìblia anca la dise che Dio el ga creà noantri ala so someiansa. (Gênesis 1:26) Questo vol dir che Dio el ga fato noantri cole medèsime qualità che Lu el ga. Alora, se ti te resti triste quando te vedi le persone bone sofrir, imaginarse Dio! Lu el resta ancora pi triste. Come rivemo a questa conclusion?

¹³ La Bìblia la ne insegna che “Dio l’è amor”. (1 João 4:8) Tuto quel che Dio el fà l’è motivà par el amor. Cossita noantri amemo parché Dio el ama. Pénseghe sora: se ti te gavesse el poder de finir fora con tuto el sofrimento  e le ingiustìssie che ghen’è ntel mondo, ti te lo faria? Sicuro che si! Te lo faria parché te ghè amor ale persone. Cossa podemo dir sora Dio? Lu el finirà con tuto el sofrimento e le ingiustìssie parché el ga poder e el ama noantri. Podemo fidarse che tute le promesse de Dio, mensonade nel scomìnsio de sto libro, sicuramente le ndarà ­suceder. Ma vanti de creder in queste promesse, te ocore imparar de pi sora Dio.

14. Qual l’è el nome de Dio? Parché gavemo de doperar sto nome?

¹⁴ Se te vol esser amigo de una persona, quala la è una dele prime cose che te fè? Te dise el to nome. Dio el ga un nome? Tante religion le dise che el so nome l’è Dio o Signor. Ma questi no i ze mia nomi, i ze tìtoli, come “rè” o “presidente”. Dio el ga dito a noantri che el so nome l’è Geovà. Salmo 83:18 el dise: “Che le persone le sàpia che ti, che el to nome l’è Geovà, Sol ti te sì el Altìssimo sora tuta la tera.” I scritori dela Bìblia i ga doperà el nome de Dio de pi de 7 mila volte. Geovà el vol che ti te sàpie e che te doperi sto nome. Geovà el ga dito el so nome parché el vol esser to amigo.

15. Cossa vol dir el nome Geovà?

¹⁵ El nome de Dio, Geovà, el ga un gran significà. Vol dir che Dio el pol far tuto quel che el promete e realisar el so propòsito.  Gnente pol fermarlo. Sol Geovà el pol gaver sto nome. *

16, 17. Cossa vol dir (a) “el Tuto Poderoso”? (b) “Rè dela eternità”? (c) “Creador”?

¹⁶ Come gavemo lesesto, el Salmo 83:18 el dise sora Geovà: “Sol ti te sì el Altìssimo sora tuta la tera.” E Apocalipse 15:3 el dise: “Grande e maraveiose le ze le to òpere, Geovà Dio, el Tuto Poderoso. Giusti e veri i ze i to camini, Rè dela eternità.” Cossa vol dir el tìtolo “el Tuto Poderoso”? Vol dir che Geovà l’è el pi poderoso del universo. E el tìtolo “Rè dela eternità” vol dir che Lu el ga sempre esistio. El Salmo 90:2 el insegna che Lu el esiste dala eternità ala eternità. Questa l’è una roba straordinària!

¹⁷ Sol Geovà l’è el Creador. Apocalipse 4:11 el dise: “Degno te sì, Geovà, nostro Dio, de ricever la glòria, el onor e el poder, parché te ghè creà tute le robe, e par la to volontà le ze vegneste a esister e le ze state creade.” Pénseghe sora: tuto quel che se pol imaginar – i àngeli e le stele del cielo, i fruti su le piante, i pessi del mar – tuto questo esiste parché Geovà l’è el Creador.

18. Parché arquanti i pensa che no se pol mia esser amighi de Dio? Cossa la Bìblia la insegna sora questo?

¹⁸ Arquanti i se sente spaventadi quando i lese cossa la Bìblia la dise sora le grande qualità de Geovà. Lori i pensa cossita: ‘Dio l’è tanto grando, poderoso e anca l’è distante de noantri. Parché Lu el dimostraria interesse par noantri?’ Ma sarà che Dio el vol che pensemo cossita? Sicuro che nò! Geovà el vol rivarse darente de noantri. La Bìblia la dise che Lu “no l’è distante de tuti noantri”. (Atos 17:27) Dio el vol che ti te rivi darente de Lu e el promete che “lu el rivarà darente de valtri.” —Tiago 4:8.

19. (a) Come ti te pol deventar amigo de Dio? (b) Quala dele qualità de Geovà a ti te piase de pi?

¹⁹ Come ti te pol deventar amigo de Dio? Gesù el ga dito: “Questo vol dir vita eterna, che i cognossa a ti, el ùnico vero Dio, e a quel che te ghè mandà, Gesù Cristo.” (João 17:3) Seita imparar, e te ndarè cognosser a Geovà e Gesù. E alora si, te pol gaver la vita eterna. Par esémpio, noantri gavemo imparà che “Dio l’è amor.” (1 João 4:16) Ma Lu el ga anca tante altre bele qualità. La Bìblia la dise che Geovà l’è “misericordioso e compassivo, passiente e pien de amor leal e verità.” (Êxodo 34:6; 2 Pedro 3:9) Geovà l’è “bon e pronto a perdonar”. (Salmo 86:5) Dio l’è leal. (Apocalipse 15:4) Quanto de pi te studi la Bìblia tanto de pi te ndarè imparar sora le bele qualità de Dio.

20, 21. Come ti te pol sentirte darente de Dio se no te pol véderlo?

²⁰ Come ti te pol sentirte darente de Dio se no te pol mia  véderlo? (João 1:18; 4:24; 1 Timóteo 1:17) Quando te lesi sora Geovà ntela Bìblia te pol ­cognósserlo come una Persona real. (Salmo 27:4; Romanos 1:20) Quanto de pi te impari sora Geovà, tanto de pi te lo amarè e tanto de pi te sentirè darente de Lu.

²¹ Ti te ndarè capir che Geovà l’è el nostro Pare. (Mateus 6:9) Dio el ne ga dato la vita e el vol che gavemo la meio vita possìbile, compagno un pare amoroso el vol par i so fioi. (Salmo 36:9) La Bìblia la insegna che ti te pol deventar amigo de Geovà. (Tiago 2:23) Pénseghe sora: Geovà, el Creador del universo, el vol che ti te sìpie el so amigo!

22. Cossa ti te gavaria de far se qualchedun el vol che te fermi de studiar?

²² Arquante persone no le vol mia che ti te studi la Bìblia. Lore le ga paura che te càmbie de religion. Ma no stà mia assar che qualchedun el te ferma de deventar amigo de Geovà. Lu l’è el meio amigo che te pol gaver.

23, 24. (a) Parché te toca continuar a far domande? (b) Cossa ndaremo veder ntel pròssimo capìtolo?

²³ Intanto che ti te sì drio studiar la Bìblia, ghen sarà cose difìcili de capir. No stà mia gaver vergogna de far domande o de domandar aiuto. Gesù el ga dito che gavemo de esser ùmili come i picinini che i fà tante domande. (Mateus 18:2-4) Dio el vol che ti te cati le risposte ale to domande. Alora, stùdia la Bìblia con atension par esser sicuro che te sì drio imparar la verità. —Lesi Atos 17:11.

²⁴ La meio maniera de imparar sora Geovà l’è studiar la Bìblia. Ntel pròssimo capìtolo ndaremo veder parché la Bìblia la è difarente de tuti i altri libri.