1. Qual l’è el propòsito de Dio par la umanità?

DIO el ga un maraveioso propòsito par la umanità. El ga creà el primo omo e la prima dona, Adamo e Eva, par viver in un bel giardin. El so propòsito l’era che lori i gavesse fioi, che i fesse de tuta la Tera un paradiso, e che i tendesse i animai. —Gênesis 1:28; 2:8, 9, 15; vedi la Nota Final 6.

2. (a) Come savemo che Dio el farà quel che el ga promesso? (b) Cossa la Bìblia la dise sora viver par sempre?

² Sarà che podemo viver par sempre in un paradiso? Geovà el ga dito: “Mi go stabilio el me propòsito, e cossita lo farò.” (Isaías 46:9-11; 55:11) Lu el farà quel che el ga promesso, e gnente pol fermarlo. Geovà el ga dito che el ga creà la Tera con un propòsito. Lu ‘no la ga creà par gnente.’ (Isaías 45:18) Lu el vol che le persone le viva ntela Tera. Ma che tipo de persone? E par quanto tempo? La Bìblia la dise: “I giusti i gavarà la propietà dela Tera, E i viverà par sempre sora ela.” —Salmo 37:29; Apocalipse 21:3, 4.

3. Che domande se femo quando vedemo le persone restar malade e morir?

³ Ma ancoi le persone le resta malade e le more. In tanti posti lore le ze drio barufar e coparse. Sicuro che questo no l’è mia quel che Dio el gavea promesso. Alora, cossa l’è sucedesto? E parché? Sol la Bìblia la pol risponder.

4, 5. (a) Chi ga parlà con Eva, par meso de una serpente, ntel giardin del Èden? (b) Come un omo onesto el pol deventar un ladro?

⁴ La Bìblia la dise che Dio el ga un nemigo che l’è “ciamà Diaol e Sàtana”. Sàtana el ga doperà una serpente par parlar con Eva ntel giardin del Èden. (Apocalipse 12:9; Gênesis 3:1) El ga fato Eva creder che la serpente la parlea. —Vedi la Nota Final 7.

⁵ Sarà che Dio el ga creà Sàtana el Diaol? Sicuro che nò! Un àngelo, che l’era ntel cielo quando Dio el parecea la Tera par Adamo e Eva, el ga cambià e l’è deventà el Diaol. (Jó 38:4, 7) Come l’è stà possìbile? Pénseghe sora: come sarà che un omo onesto el càmbia e el deventa un ladro? Lu no l’è mia nassesto un ladro. Ma quando lu el vol una cosa che no la è soa e el seita pensarghe sora, sta voia la deventa pi forte. Alora quando el ga una oportunità, el va robar sta cosa. Cossita l’è deventà un ladro. —Lesi Tiago 1:13-15; vedi la Nota Final 8.

6. Come un àngelo l’è deventà un nemigo de Dio?

⁶ Questo l’è quel che l’è sucedesto con sto àngelo. Geovà el ga creà Adamo e Eva e el ga dito a lori che i gavesse fioi par ‘impienir la Tera’. (Gênesis 1:27, 28) Fursi sto àngelo el ga pensà: ‘Tute ste persone le pol adorar a mi invesse che a Geovà!’ Quanto de pi el pensea sora questo, tanto de pi el gavea voia de quel che l’era de Geovà. Sto àngelo el volea che le persone lo adorasse. Cossita el ga dito una busia e el ga inganà a Eva. (Lesi Gênesis 3:1-5.) Alora l’è deventà Sàtana el Diaol, un nemigo de Dio.

7. (a) Parché Adamo e Eva i ze morti? (b) Parché semo drio restar veci e morir?

⁷ Adamo e Eva i ga desobedio a Dio e i ga magnà el fruto.  (Gênesis 2:17; 3:6) Lori i ga pecà contra Geovà e par fin i ze morti, come Geovà el gavea dito. (Gênesis 3:17-19) Anca i fioi de Adamo e Eva i ze morti parché i era pecadori. (Lesi Romanos 5:12.) Ndemo veder un esémpio par capir meio. Imagina che te sì drio far un pan in una forma con difeto. El pan el vien fora col medèsimo difeto dela forma. Quando Adamo el ga desobedio a Dio, l’è deventà un pecador. Come fioi de Adamo, noantri semo pecadori parché gavemo el medèsimo difeto che lu el gavea. Par via del pecà, semo drio restar veci e morir. —Romanos 3:23; vedi la Nota Final 9.

8, 9. (a) In cossa Sàtana el volea che Adamo e Eva i credesse? (b) Parché Geovà no’l ga copà suito quei che i se ga rebelà?

⁸ Quando Sàtana el ga indusio Adamo e Eva a desobedir a Dio, lu el ga scominsià una rebelion contra Geovà. El Diaol el volea che Adamo e Eva i credesse che Geovà l’era un busier, un governante rugno che no’l volea el meio par lori. Sàtana el ga dito che i òmini no i gavea bisogno che Dio el disesse cossa far e che Adamo e Eva i era boni de dessider quel che l’era giusto e quel che l’era sbalià. E adesso, cossa Geovà el podaria far? El podaria gaver copà quei che i se ga rebelà e el podaria gaver finio cola rebelion. Ma cossita Geovà no’l dimostraria che Sàtana l’è un busier.

⁹ Geovà no’l ga copà quei che i se ga rebelà. Invesse, Lu el ga dato tempo ai òmini par comandarse. Questo el dimostraria che Sàtana l’è un busier e che Geovà el sa quel che l’è meio par i òmini. Ndaremo imparar de pi sora sto tema ntel capìtolo 11. Ma ti, cossa te pensi dela dessision de Adamo e Eva? Sarà che  i ga fato ben creder in Sàtana e desobedir a Dio? Geovà el gavea dato tuto par Adamo e Eva: una vita perfeta, un bel posto par viver e un bel laoro. Ma Sàtana no’l gavea mai fato gnente de bon par lori. E ti, cossa te gavaria fato nel posto de Adamo e Eva?

10. Che importante scolia tuti noantri gavemo de far?

 ¹⁰ Tuti noantri ancoi gavemo de far una scolia someiante a de Adamo e Eva. La nostra vita la depende de sta scolia. Podemo scòlier obedir a Geovà come el nostro Governante e giutar a dimostrar che Sàtana l’è un busier. O podemo scòlier a Sàtana come el nostro governante. (Salmo 73:28; lesi Provérbios 27:11.) Poche persone le ze drio obedir a Dio. De fato, Lu no l’è mia el governante de sto mondo. Alora, elo chi?

11, 12. (a) Cossa imparemo dela proposta che Sàtana el ga fato a Gesù? (b) Che verseti dela Bìblia i mostra che Sàtana l’è el governante del mondo?

¹¹ Gesù el savea chi pròpio el governa el mondo. In una ocasion, Sàtana “el ga mostrà a lu tuti i regni del mondo e la so glòria”. Dopo, Sàtana el ga promesso a Gesù: “Mi te darò tute ste cose se ti te indenoci davanti de mi e te me fè un ato de adorassion.” (Mateus 4:8, 9; Lucas 4:5, 6) Pénseghe sora, ‘Se questi governi no i fusse de Sàtana, lu el podaria darli a Gesù?’ Nò. L’è par quel che semo sicuri che tuti i governi i ze de Sàtana.

¹² Fursi ti te pensi: ‘Come Sàtana el pol esser el governante del mondo? No l’è Geovà el Dio Tuto Poderoso che el ga creà el universo?’ (Apocalipse 4:11) Si, l’è vera, ma Gesù el ga identificà Sàtana come “el governante de sto mondo”. (João 12:31; 14:30; 16:11) El apòstolo Paolo el ga ciamà Sàtana el Diaol del “dio de sto sistema de cose”. (2 Coríntios 4:3, 4) E el apòstolo Gioani el ga scrito che “tuto el mondo l’è soto el poder del perverso”. —1 João 5:19.

13. Parché gavemo bisogno de un novo mondo?

¹³ Sto mondo l’è cada volta  pedo. Semo drio veder guere, corussion, ipocrisia e violensa par tute le bande. I òmini no i ze boni risolver sti problemi, no importa quanto lori i proa. Ma presto Dio ndarà finir con sto mondo rugno nela guera del Armagedon, e Lu ndarà cambiarlo par un giusto novo mondo. —Apocalipse 16:⁠14-16; vedi la Nota Final 10.

14. A chi Dio el ga scoliesto par esser el Rè del so Regno? Cossa la Bìblia la ga predito sora Gesù?

¹⁴ Geovà el ga scoliesto Gesù par esser el Rè del so Regno. Tanti ani indrio, la Bìblia la ga predito che Gesù el saria el “Prìncipe dela Pace” e che el so governo mai el finiria. (Isaías 9:6, 7) Gesù el ga insegnà ai so seguidori a far orassion par sto governo: “Vegna el to Regno. Sia fata la to volontà, come ntel cielo, anca ntela tera.” (Mateus 6:10) Ntel capìtolo 8, ndaremo imparar come el Regno de Dio ndarà sostituir i governi del mondo. (Lesi Daniel 2:44.) Alora si, el Regno de Dio el farà dela Tera un bel paradiso. —Vedi la Nota Final 11.

15. Elo cossa la “nova tera”?

¹⁵ La Bìblia la promete: “Ghen sarà novi cieli e una nova tera che semo drio spetar,” e “in questi ndarà abitar la giustìssia”. (2 Pedro 3:13; Isaías 65:17) Dele volte la Bìblia la dopera la parola “tera” par riferirse ale persone che le vive ntela Tera. (Gênesis 11:1) Par quela, la “nova tera” la rapresenta tute le persone che le obedisse a Dio e le ga ricevesto la so benedission.

16. (a) Che regalo maraveioso Dio el darà a tuti quei che i viverà ntel novo mondo? (b) Cossa gavemo de far par ricéverlo?

 ¹⁶ Gesù el ga promesso che quei che i viverà ntel novo mondo i riceverà la “vita eterna”. (Marcos 10:30) Cossa gavemo de far par ricever sto regalo? Par saver, lesi João 3:16 e 17:3. Vedemo cossa la Bìblia la dise sora come sarà la vita in questo Paradiso ntela Tera.

17, 18. Come savemo che ghen sarà pace in tuta la tera e che se sentiremo sicuri?

¹⁷ La perversità, la guera, la criminalità e la violensa le sarà finide fora. No ghen sarà pi persone rugne ntela Tera. (Salmo 37:10, 11) Dio el finirà con “le guere in tuta la tera”. (Salmo 46:9; Isaías 2:4) La Tera ndarà impienirse de persone che le ama e le obedisse a Dio. Ghen sarà pace par sempre. —Salmo 72:7.

¹⁸ El pòpolo de Geovà no’l gavarà paura. Nel passà, quando i israeliti i era obedienti a Dio, i se sentia sicuri parché Dio li protegea. (Levítico 25:18, 19) Ntel Paradiso, no gavaremo pi paura de gnente e de nissuni. Se sentiremo sempre sicuri! —Lesi Isaías 32:18; Miqueias 4:4.

19. Parché podemo esser sicuri che ghen sarà abondansa de magnar ntel novo mondo de Dio?

¹⁹ Gavarà abondansa de magnar par tuti. “Ghen sarà una abondansa de grani ntela tera; su i monti ghen sarà ancora de pi.” (Salmo 72:16) Geovà, “nostro Dio, benedirà a noantri” e “la tera la darà el so prodoto”. —Salmo 67:6.

20. Come savemo che la tera la deventarà un paradiso?

²⁰ Tuta la Tera la deventarà un paradiso. Le persone le gavarà bele case e bei giardini. (Lesi Isaías  65:21-24; Apocalipse 11:18.) Tuta la Tera la sarà tanto bela quanto l’era el giardin del Èden. Geovà sempre el ne darà tuto quel che ne ocore. La Bìblia la dise: “Te verdi la man e te fè la voia de tuti i viventi.” —Salmo 145:16.

21. Come savemo che ghen sarà pace tra i òmini e i animai?

²¹ Ghen sarà pace tra i òmini e i animai. I animai no i ndarà pi far mal ai òmini. I picinini i se sentirà sicuri anca darente dei animai che ancoi i ze pericolosi. —Lesi Isaías 11:6-9; 65:25.

22. Cossa Gesù ndarà far par i maladi?

²² Nissun mai pi restarà malà. Quando Gesù l’era ntela tera, el ga guario tante persone. (Mateus 9:35; Marcos 1:40-42; João 5:5-9) Ma come Rè del Regno de Dio, Gesù ndarà guarir a tuti. Nissun pi dirà: “Son malà.” —Isaías 33:24; 35:5, 6.

23. Cossa Dio ndarà far par quei che i ze morti?

²³ I morti i tornarà a viver. Dio el ga promesso che el ressussitarà milioni de persone che le ze morte. “Ghen sarà una ressuression tanto dei giusti come dei ingiusti.”—Lesi João 5:28, 29; Atos 24:15.

24. Cossa ti te pensi sora viver ntel Paradiso?

²⁴ Gavemo de far una scolia: imparar sora Geovà e servirlo o far quel che gavemo voia. Se scoliemo servir a Geovà, podemo gaver un futuro maraveioso. Quando un omo el ga domandà a Gesù par ricordarse de lu dopo dela so morte, Gesù el ga promesso: “Te sarè con mi ntel Paradiso.” (Lucas 23:43) Ndemo imparar de pi sora Gesù Cristo e come lu ndarà realisar le maraveiose promesse de Dio.