LESSION 18

Chi che va pròpio drio a Cristo ancoi?

SONAR

In tuto el mondo, bilioni de persone le dise che le ze cristiane, o sia, che le va drio a Cristo. Ma queste persone le crede in robe difarente una del’altra. Alora, come podemo saver chi che va pròpio drio a Cristo?

1. Cossa vol dir esser un cristiano?

Un cristiano l’è un dissìpolo de Gesù Cristo, o sia, l’è una persona che la va drio a Cristo. (Ledi Ati 11:26.) Ma, cossa che la persona la ga de far par mostrar che la ze un dissìpolo de Cristo? Gesù el ga dito che i so dissìpoli i seita a far quel che lu el ghe domanda. (Gioani 8:31) Questo vol dir che la persona che la vol ndar drio a Cristo la ga de far quel che lu el ga insegnà. Tuto quel che Gesù el ga parlà e el ga fato l’è stà de acordo cola Bìblia. Alora, ancoi quei che i vol ndar drio a Cristo i ga de parlar e far tuto quel che l’è nela Bìblia. — Ledi Luca 24:27.

2. Come che quei che i va drio a Cristo i mostra amor ai altri?

Gesù el ga dito ai so dissìpoli: “Mi ve comando che amé un ai altri come mi ve go amà.” (Gioani 15:12) Come Gesù el ga mostrà che el amea i so dissìpoli? Par esémpio, lu el tolea del so tempo par star insieme con lori, par giutarli in quel che i gavea de bisogno e par incoraiarli. Gesù el ga anca dato la so vita par i so dissìpoli. (1 Gioani 3:16) Alora, quei che i va drio a Cristo ancoi i insegna sora el amor, ma anca i mostra che i ama i altri par meso de quel che i parla e de quel che i fà.

3. Che laoro i fà quei che i va drio a Cristo?

Gesù el ga dato un laoro tanto importante ai so dissìpoli. Lu li ga mandà predicar sora el Regno de Dio. (Luca 9:2) I so dissìpoli i ndea parlar cole persone ndove lore le adorea a Dio, nele so case, o ndove i fussi boni de catarle. (Ledi Ati 5:42; 17:17.) Ancoi, quei che i va drio a Cristo i fà la medèsima roba. Lori i va in serca dele persone par parlarghe sora el consolo e la speransa dela Bìblia. Lori i ghe vol tanto ben ale persone, par quela, i resta tanto contenti de doperar el so tempo e la so forsa par far questo laoro. — Marco 12:31.

IMPARA DE PI!

Quala che la ze la difarensa intrà quei che i va pròpio drio a Cristo e quei che no i va?

4. Lori i va in serca de cognosser la Bìblia

I dissìpoli de Gesù i obedia a quel che la Bìblia la dise

Tanti de quei che i dise che i va drio a Gesù no i vol gnanca saver quel che la Bìblia la dise. Vardé el VÌDEO, e dopo, parlé sora questo:

VÌDEO: Come i seghidori de Cristo i se ga fermà de praticar la verità (5:11)

Cossa che arquante religion le ga fato par no assar le persone imparar quel che Gesù el ga insegnà?

Gesù el ga insegnà le verità dela Bìblia. Ledé Gioani 18:37, e dopo, parlé sora questo:

De acordo con quel che Cristo el ga dito, come savemo chi va pròpio drio a lu?

5. Lori i insegna quel che l’è nela Bìblia

I dissìpoli de Gesù i parlea ai altri dele bone notìssie

Vanti de tornar al cielo, Gesù el ga dito che i so dissìpoli i gavaria de far un laoro, e questo laoro l’è fato fin ancoi. Ledé Mateo 28:19, 20 e Ati 1:8, e dopo, parlé sora questo:

Le bone notìssie le saria predicade ndove e par quanto tempo?

6. Lori i fà quel che i impara dela Bìblia

Cossa che ga assà Tom sicuro che el gavea cognossesto quei che i va pròpio drio a Cristo? Vardé el VÌDEO, e dopo parlé sora questo:

VÌDEO: Mi go desistio dele religion (5:20)

Parché che Tom l’era stufo dele religion?
Cossa che lo ga assà sicuro che el gavea catà la verità?

Quel che femo l’è pi importante de quel che parlemo. Ledé Mateo 7:21, e dopo, parlé sora questo:

Cossa che l’è pi importante par Gesù? Dir che credemo nela Bìblia o far quel che la dise?

7. Lori i ga vero amor intrà de lori

I dissìpoli de Gesù i amea un al altro

Sarà che quei che i va drio a Cristo i daria la so vita par salvar i so fradei? Vardé el VÌDEO, e dopo, parlé sora questo:

VÌDEO: Lu el volea morir par salvar el so fradel (2:55)

Parché Lloyd el volea salvar el fradel Johansson?
Te pensi che Lloyd el ga fato come Gesù?

Ledé Gioani 13:34, 35, e dopo, parlé sora questo:

Come che i dissìpoli de Cristo, o sia, quei che i va drio a lu, i ndaria tratar le persone che le ze de altri paesi o rasse?
Cossa che i gavaria de far se sucedesse una guera?

FURSI TE GHÈ BELCHE SCOLTÀ: “Tute le religion le mena a Dio.”