LESSION 24

Cossa che la Bìblia la parla sora i àngeli?

SONAR

Geovà el vol tanto che imparemo sora la so fameia del cielo. I àngeli i fà parte de questa fameia. La Bìblia la dise che lori i ze fioi de Dio. (Giò 38:7) Cossa che la Bìblia anca la parla sora i àngeli? Cossa che lori i pol far ale persone? Sarà che tuti i àngeli i fà parte dela fameia de Dio?

1. Chi che i ze i àngeli?

Geovà el ga creà i àngeli vanti de far la Tera. Lori i vive nel cielo, e i ga un corpo come quel de Dio, alora, no podemo vederli. (Ebrei 1:14) Ghen’è milioni de àngeli e lori i ze difarenti un del altro. (Apocalisse 5:11) Lori i fà quel che Dio el ghe domanda. (Salmo 103:20) Nel passà, Geovà el ga doperà i àngeli par parlar quel che el volea ale persone, par giutar i so servi e par salvarli quando i gavea de bisogno. Ancoi, i àngeli i giuta i servi de Dio a catar le persone che le vol imparar sora lu.

2. Chi che i ze Sàtana e i so demoni?

El primo àngelo che el ga desobedio a Dio el ga nome Diaol e Sàtana, e lu l’è drio imbroiar le persone qua nela Tera. (Apocalisse 12:9) Sàtana el volea che le persone le servisse a lu, e nò a Dio. Alora, el ga fato che Adon e Eva e altri àngeli i ndesse drio a lu. I àngeli rugni i ze i demoni. Ma Geovà el ga parà via i àngeli rugni del cielo par la Tera, e nel futuro, el ndarà finirli fora. — Ledi Apocalisse 12:9, 12.

3. Come che Sàtana e i demoni i proa imbroiar le persone?

Sàtana e i demoni i vol che noantri ndemo drio a lori. Come Geovà el dise che ndar drio a lori l’è sbalià, lori i proa imbroiarne par meso de arquante robe. Par esémpio, la indovinassion, el oròscopo, le benzedure e i tratamenti de salute che i dopera el poder dei demoni. Sàtana anca el proa far le persone creder che le ze bone de parlar coi morti, ma questo l’è sbalià. Geovà el dise che no ghemo de ndar drio a quei che i parla coi demoni e gnanca a quei che indovina. (Levìtico 19:31) Sàtana e i demoni i ze nemighi de Dio e i vol farne mal. Par quela che Geovà el ne dise de restar distante de lori.

IMPARA DE PI!

Che robe bone i àngeli i fà? Parché che no ghemo de ndar in serca de robe che le vien dei demoni? Come podemo protegerse de Sàtana e dei demoni?

4. I àngeli i giuta le persone a imparar sora Geovà

I àngeli no i parla cole persone. Ma lori i giuta i servi de Dio a catar quele che le vol imparar sora Geovà. Ledé Apocalisse 14:6, 7, e dopo, parlé sora questo:

Parché che ghemo bisogno del aiuto dei àngeli nela predicassion?
Sicuro che l’è bon saver che i àngeli i ne giuta a catar le persone che le vol imparar sora la Bìblia. Parché?

5. Stà distante dele robe che le vien dei demoni

Sàtana e i demoni i ze nemighi de Geovà, e i ze anca nostri nemighi. Ledé Luca 9:38-42, e dopo, parlé sora questo:

Come che i demoni i trata le persone?

Volemo star distante dele robe che le vien dei demoni. Ledé Deuteronómio 18:10-12, e dopo, parlé sora questo:

Come i demoni i proa parlar con noantri? Che robe de queste le persone le fà ndove te sì de star?
Pénsito che l’è giusto che Geovà el ne comande de star distante dei demoni? Parché?

Vardé el VÌDEO, e dopo, parlé sora questo:

VÌDEO: “Meteve contra el Diaol” (5:02)

Nel vìdeo, Paola la ga metesto un mestier nel brasso dela so fiola. Sarà che la ze stata una roba bona? Parché?
Cossa che Paola la gavea de far par protegerse dei demoni?

I veri cristiani no i ze mai ndati drio ai demoni. Ledé Ati 19:19 e 1 Corinti 10:21, e dopo, parlé sora questo:

Parché che ghemo de finir fora con tuto quel che vien dei demoni?

6. Come te pol vinser la lota contra Sàtana e i demoni?

Sàtana el governa i demoni. Ma Mighel, che l’è el àngelo pi poderoso, el governa tuti i àngeli boni. Mighel l’è nantro nome de Gesù. Quanto poder galo Mighel? Ledé Apocalisse 12:7-9, e dopo, parlé sora questo:

Chi che ga de pi poder? Mighel e i so àngeli o Sàtana e i so demoni?
Sarà che i dissìpoli de Gesù i ghe ocore gaver paura de Sàtana e dei demoni?

Semo nte una lota contra Sàtana e i demoni, ma podemo vinserla. Ledé Tiago 4:7, e dopo, parlé sora questo:

Come te pol protegerte contra Sàtana e i demoni?

FURSI TE GHÈ BELCHE SCOLTÀ: “No l’è mia sbalià ndar nte una benzedera o dir su i sequeri. Queste robe le ne giuta.”

Parché che l’è una tràpola pensar cossita?

COSSA CHE TE GHÈ IMPARÀ?

I àngeli che i ze boni i ne giuta. Ma Sàtana e i demoni i ze nemighi de Geovà. Lori i dopera la indovinassion, la strionaria, el oròscopo e tante altre robe par imbroiar le persone.