Come che te te senti quando un amigo el te dà un presente? L’è sicuro che te resti tanto contento e che te vol mostrar che te dè valor a quel che el te ga dato. Geovà e Gesù i ne ga dato el meio presente che ghen’è, che l’è stà el sacrifìssio de Gesù. Come che podemo mostrar che ghe demo valor a questo presente?

1. Come podemo mostrar che ghe demo valor a quel che Geovà e Gesù i ga fato par noantri?

La Bìblia la dise che tuti quei che i mostra che i ga fede in Gesù i pol viver par sempre. (Gioani 3:16) Alora, ghemo de far de pi che sol gaver fede, ghemo anca de mostrarla. Mostremo la nostra fede par meso de quel che femo e de quel che parlemo. (Tiago 2:17) Cossita, femo pi forte la nostra amicìssia con Gesù e col so Pare, Geovà. — Ledi Gioani 14:21.

2. Quando podemo mostrar che ghe demo valor a quel che Geovà e Gesù i ga fato par noantri?

Nela note vanti de morir, Gesù el ga dito ai so dissìpoli come che i podaria mostrar che i ghe dea valor al so sacrifìssio. Lu el ga dito che lori i gavaria de riunirse par far la Selebrassion dela so morte, o dela Sena del Signor. (1 Corinti 11:20) Gesù el volea che i so apòstoli e quei che i ndesse drio a lu i fesse questo. Par quela che lu el ga dito: ‘Seité a far questo in ricordo de mi.’ (Luca 22:19) Cossita, quando te vè ala Selebrassion, te mostri che te ghe dè valor al amor che Geovà e Gesù i ga par ti.

 IMPARA DE PI!

3. Altre maniere de mostrar che ghe demo valor a quel che Geovà e Gesù i ga fato

Proa imaginar che te sì drio negarte e qualchedun el te salva. Sarà che te ndarissi desmentegarte de quel che lu el ga fato, o te ndarissi mostrar che te ghe dè tanto valor?

Geovà el ne ga dato la speransa de viver par sempre. Ledé 1 Gioani 4:8-10, e dopo, parlé sora questo:

• Parché che el sacrifìssio de Gesù l’è el meio presente che ghemo ricevesto?

• Come te te senti par causa de quel che Geovà e Gesù i ga fato par ti?

Come che podemo mostrar che ghe demo valor a quel che Geovà e Gesù i ga fato par noantri? Ledé 2 Corinti 5:15 e 1 Gioani 4:11; 5:3. Dopo de leder cada testo, parlé sora questo:

• Cossa che podemo far par mostrar che ghe demo valor?

4. Proa far compagno a Gesù

Noantri anca mostremo che ghe demo valor a quel che Geovà e Gesù i ga fato quando proemo far compagno a Gesù. Ledé 1 Piero 2:21, e dopo, parlé sora questo:

• De che maniere te pol far compagno a Gesù?

• Cossa che sucede nela Selebrassion dela morte de Gesù?

 COSSA CHE TE GHÈ IMPARÀ?

Ghe demo valor al sacrifìssio de Gesù quando mostremo che ghemo fede in lu e quando ndemo ala Sena del Signor.

Sito bon de ricordarte?

• Come mostremo che ghemo fede in Gesù?

• Cossa che te piaseria far par mostrar che te ghe dè valor a quel che Geovà e Gesù i ga fato?

• Parché che l’è tanto importante ndar ala Selebrassion dela morte de Gesù?