LA BÌBLIA LA SPIEGA
Giugar par soldi
Arquante persone le pensa che giugar par soldi l’è sol par divertirse e che no ghen’è perìcolo, invesse altri i pensa che l’è un bruto vìssio.
Ma sarà che giugar par soldi l’è sbalià?
COSSA CHE LE PERSONE LE DISE
Arquanti i pensa che no l’è pericoloso giugar par soldi, basta che sìpia de acordo cola lege. Par esémpio, arquanti governi i dopera le loterie anca par dar aiuti econòmichi ale persone.
COSSA CHE LA BÌBLIA LA DISE
La Bìblia no la parla drito sora giugar par soldi, ma la ne dà tanti consili che i ne giuta a capir quel che Dio el pensa.
El ogetivo de giugar par soldi l’è guadagnar i soldi che altri i perde. E questa roba la ze contra el consìlio dela Bìblia de ‘star atenti a tuti i tipi de ganànsia’. (Luca 12:15) In verità, le persone che giuga lo fà parché le vol sempre de pi, o sia, le ga ganànsia. Le imprese dei giughi le fà veder che se pol guadagnar tanti soldi, ma le sconde che se ghe ne perde anca tanti, parché i sà che le persone le ga voia de deventar siore. Cossita le persone le giuga tanti soldi nele case de giughi, o cassini. Giugar par soldi no fà evitar la ganànsia, pitosto fà le persone pensar che le pol guadagnar soldi sensa far sforsi.
El ogetivo de giugar par soldi l’è tanto egoista: guadagnar i soldi che i altri i ga perso. Ma la Bìblia la dise che noantri ghemo de ‘ndar in serca nò dei nostri interessi, ma de quei dei altri’. (1 Corinti 10:24) Un dei diese comandamenti el dise: ‘No stà voler gnanca una roba che la ze del to pròssimo’. (Ésodo 20:17) Quando un giugador el vol guadagnar, in verità, el vol che i altri i perda i soldi, cossita che el possa ciaparli lu.
La Bìblia la ne dise de star atenti de nò pensar che la sorte la sìpia un poder misterioso che ne giuta a guadagnar. Nel antigo Israel, arquanti che no i gavea fede in Dio i ga scominsià adorar el “dio dela Bona Sorte”. Ma sarà che Dio lo acetea? Nò. Dio infati el ghe ga dito: ‘Gavé seità far el mal e gavé scoliesto quel che me disgusta’. — Isaia 65:11, 12.
L’è vera che in arquante parte del mondo se dopera i soldi ciapadi de questi giughi par giutar a mantegner le scole, la economia del paese e altre robe che i governi i fà par giutar le persone. Ma anca se questi soldi i ze doperadi cossita, questo no càmbia de ndove i vien, parché i riva de atività che fà vegner la idea che se pol gaver soldi sensa far sforsi. Questo fà sgrandar ganànsia e egoismo.
‘No stà voler . . . gnanca una roba che la ze del to pròssimo.’ — Ésodo 20:17.
Che brute robe pol suceder con quei che i giuga par soldi?
COSSA CHE LA BÌBLIA LA DISE
La Bìblia la ne dise che “quei che i ga tanta voia de deventar siori i casca in tentassion, in tràpola e in tante voie stùpide e che ghe fà dano. Questo el fà i òmini sfondar in destrussion e rovina”. (1 Timòteo 6:9) Giugar par soldi ze una roba che ne fà voler cada volta de pi, e questo ne fà tanto mal, par quela la Bìblia la dise che no ghemo pròpio de far queste robe. — Efesi 5:3.
El giugo el incoraia le persone a voler guadagnar soldi sensa far sforso, cossita che le persone le ga cada volta de pi amor par i soldi. La Bìblia la dise che “el amor par i soldi l’è la radisa de tuti i tipi de cose pregiudissiai”. Voler gaver soldi sensa far sforso fà che la persona la devente ansiosa, sensa forsa e la so fede in Dio la resta fiaca. La Bìblia anca la dise che quei che i ga questo amor par i soldi i casca in tràpole e i se ‘causa tanti sofrimenti’.— 1 Timòteo 6:10.
La ganànsia la fà che la persona no la sìpia mai contenta coi soldi che la ga. Eclesiasti 5:10 dise: “Quel che el ama i soldi no ghen gavarà mai che basta”.
Milioni de persone che se ga fato ciapar par i giughi dopo le se ga nicorte che l’è tanto fadiga cavarse via questo bruto vìssio. In tuto el mondo ghen’è questo problema. Par esémpio, sol nei Stati Unidi, i dise ghen’è milioni de persone che le ga vìssio de giugar par soldi.
Proverbi 20:21 dise: “Un capital che nel scomìnsio se fà con ganànsia nel fin no’l sarà una benedission.” Le persone che le ga vìssio de giugar le pol scominsiar a gaver tanti dèbiti e le pol fin perder tuto quel che le ga. E anca tanti i perde i so amighi, laoro e la fameia. Ma star drio ai consili dela Bìblia ne protege de tute le brute robe che pol suceder col giugo par soldi.
“Ma quei che i ga tanta voia de deventar siori i casca in tentassion, in tràpola e in tante voie stùpide e che ghe fà dano. Questo el fà i òmini sfondar in destrussion e rovina.” — 1 Timòteo 6:9.
