Se te vol cognosser ben una persona, proa saver cossa che ela la ga belche fato e che dificoltà la ze stata bona de darghene fora. Ghemo de far compagno con Dio se volemo cognosserlo ben. Te piaserà saver che Dio el ga belche fato tante robe che ne giuta ancoi e che ne darà un bel futuro.

Geovà Dio l’è el Grandioso Creador, e le so qualità che le persone no le vede, “le ze mostrade de maniera ciara in quel che el ga fato”. (Romani 1:20) La Bìblia la dise che ‘Dio el ga fato el mondo col so poder, la tera col so saver e el cielo cola so comprension.’ (Geremia 10:12) Tute le robe che Dio el ga creà ne mostra le so qualità e che lu el ne vol tanto ben.

Par esémpio, Geovà el ne ga fato de una maniera spessial. El ne ga fato “ala so imàgine”. (Génesi 1:27) Questo vol dir che Dio el ne ga dato la abilità de far compagno le so qualità, de veder le robe come lu el vede e capir quel che l’è giusto e sbalià. Quando femo quel che Dio el ne dise, semo pi felici e ghemo un ogetivo nela vita. E anca Dio el ne ga fato de una maniera che podemo esser so amighi.

Quando vardemo la Tera e tuto quel che Dio el ga creà, capimo che el ne ama tanto. El apòstolo Paolo el ga dito che ‘Dio no’l ga assà de mostrar come che lu l’è. Lu el ne ga mostrà la so bontà quando el ne ga dato le piove, bone racolte e tanto de magnar, parché el volea che noantri restéssino tanto contenti’. (Ati 14:17) Dio el ne ga dato tanto de pi de quel che ne ocore par viver e el ne ga dato tante robe difarente par darne alegria. E tuto questo l’è sol una scianta de quel che el vol che godemo.

 Geovà el ga creà la Tera par le persone viver nela par sempre. La Bìblia la dise che lu “el ga dato la Tera ai fioi dei òmini” e “no la ga creada par gnente, ma par le persone viver nela”. (Salmo 115:16; Isaia 45:18) Ma chi che ndaria viver nela Tera e par quanto tempo? La Bìblia la risponde: “I giusti i sarà paroni dela tera e i viverà par sempre nela tera.” — Salmo 37:29.

Dio el gavea un ogetivo par la Tera e par le persone. Alora, el ga creà Adon e Eva e li ga metesti in un paradiso par viver. (Génesi 2:8, 15) Dio el ghe ga dito anca: “Gàpie tanti fioi. Gavé de impienir la tera e gavé de esser paroni dela tera.” (Génesi 1:28) Adon e Eva i gavea la oportunità de viver par sempre, ma i ga desobedio a Dio. E par quela, no i era pi intrà “i giusti” che i saria “paroni dela tera”. Ma quel che Adon e Eva i ga fato no’l ga cambià quel che Dio el volea. Ndaremo parlar nantra volta sora questo. Ma adesso vedemo nantra roba che Dio el ga fato par noantri.

La Bìblia la ze la Parola de Dio. Ma parché Geovà el ne ga dato la Bìblia? Parché el vol che lo cognossemo. (Proverbi 2:1-5) La Bìblia no la risponde tute le nostre domande sora Dio. In verità, gnanca un libro el risponde a tute lore. (Eclesiasti 3:11) Ma tuto quel che ghen’è nela Bìblia ne giuta a cognosser meio a Dio. Par esémpio, come che lu el trata le persone e cossa che Dio el ghe piase che le persone le fà o nò. (Salmo 15:1-5) Anca la Bìblia la insegna quala religion Dio el aprova, quel che el dise che l’è giusto o sbalià e cossa che Dio el vol che pensemo e femo sora i soldi. Podemo anca imparar sora la personalità de Geovà quando ledemo nela Bìblia quel che Gesù, el Fiol de Dio, el ga dito e el ga fato. — Gioani 14:9.

Geovà el ne ga dato la Bìblia anca par giutarne a esser felici e gaver un ogetivo nela vita. Nela Bìblia, Geovà el ne dise cossa che podemo far par gaver una fameia felice e anca par esser contenti con quel che ghemo e come darghene fora cole preocupassion. Ndaremo veder pi avanti che la Bìblia la ne dà risposte a altre domande come: Parché che ghen’è tanto sofrimento? Cossa che ndarà suceder nel futuro? La Bìblia la spiega anca quel che Dio el ga belche fato par suceder quel che el gavea in mente par la Tera e par le persone.

La Bìblia la ze spessial par altri motivi. La ze stata scrita par 40 òmini, intorno de 1.600 ani. El so assunto prinsipal l’è el medèsimo del scomìnsio al fin, cossita, vedemo che la Bìblia la ze pròpio la Parola de Dio. (2 Timòteo 3:16) Tanti libri del passà i ze stati cambiadi, ma la Bìblia nò. Miliari de manuscriti i prova che quel che l’è stà scrito nela Bìblia mai el ga cambià col passar del tempo. Tanti i ga proà fermar la so tradussion o nò assar che le persone le gavesse una Bìblia o la ledesse. Ancora cossita, in tuto el mondo, el libro che l’è stà de pi tradusio e quasi tute le persone le ga l’è la Bìblia. Alora, questo prova che “la parola del nostro Dio la resta par sempre”. — Isaia 40:8.

Come ghemo visto vanti, Dio el volea che le persone le vivesse par sempre nela Tera. Ma quando Adon el ga desobedio e el ga pecà contra Dio, lu e tute le persone che le saria nasseste dopo le ga perso la oportunità de viver par sempre. Ma Dio el ga fato una roba par far quel che ancora el volea par le persone. La Bìblia la dise: “Par meso de un sol omo el pecato l’è vegnesto al mondo, e la morte par meso del pecato, cossita la morte la se ga spalià a tuti, parché tuti i gavea pecà.” (Romani 5:12) Parea che la desobediensa de Adon ndaria intrigar quel che Dio el volea par la Tera e par le persone. Ma cossa che Geovà el ga fato?

Podemo veder le qualità de Geovà in tuto quel che el ga fato. Lu el ga dimostrà giustìssia nela maniera che el ga tratà Adon e Eva, e amor ale persone che le ze nasseste dopo. E col so saver, el ga dessidio cossa el ndaria far par risolver quela situassion. (Génesi 3:15) Dio el ndaria doperar el so Fiol Gesù Cristo par liberar tute le persone del pecato e dela morte. Ma come el ndaria farlo?

 Par risolver questa situassion, Geovà el ga mandà Gesù qua ntela Tera. Gesù el ga insegnà ale persone cossa che le gavea de far par viver par sempre e ‘lu el ghe ga dato la so vita par salvarle’. a (Mateo 20:28; Gioani 14:6) Compagno Adon, Gesù l’era perfeto. Par quela, lu l’è stà bon de dar la so vita par noantri. Ma difarente de Adon, Gesù el ga obedio a Dio fin la so morte. Come Gesù no’l meritea morir, Dio lo ga ressussità par viver nel cielo. Alora Gesù l’è stà bon de dar a tute le persone quel che Adon no’l ghe gavea dato: la speransa de viver par sempre. La Bìblia la dise: “Parché, come par meso dela desobediensa de un sol omo tanti i ze deventadi pecadori, dela medèsima maniera, par la obediensa de un sol, tanti i deventarà giusti.” (Romani 5:19) Par meso dela morte de Gesù, Geovà el sarà bon de far quel che el ga sempre volesto: che tute le persone le viva par sempre ntela Tera.

Quel che Geovà el ga fato dopo che Adon el ga desobedio ne insegna tanto. Imparemo che gnente pol intrigar Geovà de far quel che el vol. Sicuro che sucederà quel che el dise. (Isaia 55:11) Imparemo anca che Geovà el ne ama tanto. La Bìblia la dise: “Podemo veder pròpio ben el amor de Dio par noantri, parché Dio el ga mandà el so ùnico Fiol al mondo, e cossita podemo guadagnar la vita par meso de lu. El amor el vol dir che no semo noantri che ghemo amà a Dio, ma l’è stà lu che el ne ga amà e che el ga mandà so Fiol come sacrifìssio par i nostri pecati, un sacrifìssio par far pace con lu.” — 1 Gioani 4:9, 10.

Come Geovà “el ga fin dato el so caro Fiol par morir par tuti noantri”, podemo esser sicuri che lu anca el ne darà “tute le altre robe” che el ga prometesto. (Romani 8:32) Ma cossa che Dio el farà par noantri? Vedemo la risposta nel pròssimo artìcolo.