Fin adesso, ghemo imparà arquante robe sora Dio. Ghemo visto nela Bìblia che el so nome l’è Geovà. El amor l’è la so prinsipal qualità. Anca, ghemo visto quel che Dio el ga belche fato e che ancora el farà par noantri. Ma ghen’è altre robe che podemo imparar sora lu. Fursi te te domandi: ‘Parché imparar sora Dio l’è bon par mi?’

Geovà el promete che, “se te vè in serca de lu, te sarà bon de catarlo”. (1 Cróniche 28:9) Alora, se te fè cossita, te ndarè guadagnar un presente: una bela “amicìssia con Geovà”! (Salmo 25:14) Come esser amigo de Dio pol giutarte?

Vera felicità. La Bìblia la dise che Geovà l’è el “Dio felice”. (1 Timòteo 1:11) Esser amigo de Dio e far compagno a lu, te giutarà a gaver la vera felicità e anca te giutarà in quel che te pensi, quel che te senti e in quel che te fè. (Salmo 33:12) Te giutarà a no far quel che l’è rugno, ma a gaver el costume de far bone robe. E te giutarà anca a gaver bone amicìssie cole persone. Cossita, te sarè de acordo con quel che dise el Salmo 73:28: “Rivar pi darente de Dio l’è bon par mi.”

Geovà el ndarà tenderte. Geovà el ga prometesto: “Mi te darò consili coi me oci atenti in ti.” (Salmo 32:8) Geovà el tende de cada un dei so servi e el ghe dà tuto quel che ghe ocore. (Salmo 139:1, 2) Quando te fè una bona amicìssia con Geovà, te vedarè che lu el sarà sempre dela to banda.

Un bel futuro. Geovà el ne insegna quel che ghemo de far par esser felici adesso e anca par gaver un bel futuro. (Isaia 48:17, 18) La Bìblia la dise: “Par gaver la vita eterna, le ga de cognosser a ti, el ùnico vero Dio, e a quel che te ghè mandà, Gesù Cristo.” (Gioani 17:3) In questi bruti giorni che semo drio viver, gaver speransa ne dà forsa e ne fà esser sicuri che ndaremo viver par sempre. — Ebrei 6:19.

Ghen’è tanti altri motivi par cognosser meio a Dio e esser so amighi. Vuto saver de pi? Te pol parlar con una Testimònia de Geovà o ndar rento el site www.dan124.com.