Quando che vegnarà el fin del mondo? Cossa che Gesù el ga dito?
Come ghemo visto nel ùltimo artìcolo, quando la Bìblia la parla del fin del mondo no vol mia dir che tute le persone e la Tera le sarà finide fora. Pitosto, sarà el fin dele brute robe che le sucede ancoi e de quei che i ze de acordo con queste. Ma sarà che la Bìblia la dise quando sucederà el fin de questo mondo rugno?
VARDA COSSA CHE GESÙ EL GA DITO SORA EL FIN:
“Seité atenti parché valtri no savé el giorno e gnanca la ora.” — MATEO 25:13.
“Sté atenti, seité desmissiadi parché valtri no savé quando queste robe le ndarà suceder.” — MARCO 13:33.
Dio el ga marcà el giorno e la ora giusta par el fin de questo mondo, ma nissuni sà quando che sucederà. (Mateo 24:36) Magari, Gesù el ga dito ai so dissìpoli de star atenti a quel che ndaria suceder. Cossita podemo saver se semo distante o darente del fin del mondo.
COSSA CHE NDARIA SUCEDER?
Gesù el ga parlà sora quel che ndaria suceder par giutarne a saver quando saria darente el fin del sistema de cose. Lu el ga dito: “Nassion se levarà su contra nassion e regno contra regno. Ghen sarà mancansa de magnar e teremoti in un posto dopo l’altro.” (Mateo 24:3, 7) Lu anca el ga dito che ghen saria “brute malatie” da par tuto. (Luca 21:11) Càtito che l’è pròpio drio suceder quel che Gesù el ga dito?
Ancoi tante persone le tribola par causa dele guere, dela fame, dei teremoti e de tante malatie. Par esémpio, nel ano 2004, un teremoto nel osseano Ìndico el ga fato vegner su una granda onda che la ga copà intorno de 225 mila persone. E in tre ani, 6 milioni e 900 mila persone le ze morte par causa del coronavìrus. Gesù el ga dito che questo ndaria suceder quando el fin del sistema de cose fusse darente.
“I ÙLTIMI GIORNI”
La Bìblia la dise che, vanti de vegner el fin del mondo, noantri viverìano nei “ùltimi giorni”. (2 Piero 3:3, 4) E 2 Timòteo 3:1-5 dise che nei ùltimi giorni le persone no le ndaria viver de acordo con quel che Dio el dise che l’è giusto. (Varda el quadro “ Poco tempo vanti del fin del mondo”.) Càtito che le persone ancoi sol le pensa in lore stesse, sol le va in serca de soldi, le ze violente e sensa amor? Questo anca prova che noantri semo drio viver darente del fin de questo mondo.
Ma par quanto tempo ghen sarà questi ùltimi giorni? De acordo cola Bìblia, sol una “scianta de tempo”. Dopo, Dio el ndarà “finir fora con quei che i rovina la Tera”. — Apocalisse 11:15-18; 12:12.
EL PARADISO NTELA TERA L’È DARENTE!
L’è bel saver che Dio el ga belche marcà el giorno e la ora del fin de questo mondo rugno. (Mateo 24:36) Ma Dio “no’l vol che gnanca un el sia destruto” quando vegnarà el fin. (2 Piero 3:9) Come savemo che Dio el vol che tute le persone le reste vive? Parché lu l’è drio dar a tuti la oportunità de imparar sora lu e obedirlo. Cossita, podaremo viver ntel paradiso qua ntela Tera.
In tuto el mondo, Dio l’è drio giutar tante persone a imparar quel che le ga de far par viver nel Paradiso soto el so Regno. Gesù el ga dito che le bone notìssie del Regno de Dio ‘le saria predicade in tuta la tera’ vanti de vegner el fin. (Mateo 24:14) Le Testimònie de Geovà le ze drio far questo laoro in tuto el mondo. Lore le dopera bilioni de ore par predicar e insegnar ale persone sora el messàgio de speransa dela Bìblia.
Semo darente del fin dei governi dei òmini. Ma la bona notìssia la ze che ti te pol restar vivo qua ntela Tera, nel Paradiso che Dio el ga prometesto. El pròssimo artìcolo el ndarà spiegar cossa te toca far par viver in questo novo mondo.
Quel che Gesù el ga dito sora “i ùltimi giorni” ne dà speransa
Te piaserà de veder anca questo
DOMANDE CHE LA BÌBLIA LA RISPONDE
Quando sarà el fin del mondo?
La Bìblia la parla quando sarà el tempo giusto?
DOMANDE CHE LA BÌBLIA LA RISPONDE
Cossa l’è el segnal dei “ùltimi giorni” o del “fin dei tempi”?
La Bìblia la parla de arquante cose che le ndaria suceder nel stesso tempo e che questo saria “el segnal” de che sarìssino nei ùltimi giorni.
