LE PERSONE

La Bìblia la dise: Dio no’l ga creà la Tera par gnente ma par le persone viver nela. — ISAIA 45:18.

EL PIANETA TERA

La Bìblia la dise: Persone le nasse, persone le more, ma la Tera la resta par sempre. — ECLESIASTI 1:4.

COSSA CHE QUESTO VOL DIR? La Bìblia la spiega che el mondo mai el sarà finio fora e sempre ghen sarà persone ntela tera. Alora, cossa che l’è el fin del mondo?

PÉNSAGHE SORA: La Bìblia la dise che el fin del mondo sarà come ga sucedesto nei giorni de Noè. In quel tempo, ‘la tera la era piena de violensa’. (Génesi 6:13) Ma Noè l’era un omo giusto. Alora, quando Dio el ga mandà el Dilùvio par finir cole persone rugne, Noè e la so fameia no i ze mia morti. La Bìblia la conta cossa ga sucedesto: “El mondo de quel tempo l’è stà finio fora cola àqua.” (2 Piero 3:6) Questo testo el dise che el mondo l’è stà finio fora. Ma sarà che la Tera la ze stata finida fora? Nò, sol le persone rugne. Alora, quando la Bìblia la parla del fin del mondo, no vol mia dir che la Tera la sarà finida fora. Invesse, sarà el fin dele persone rugne e dele brute robe che sucede nel mondo.

I PROBLEMI E LE BRUTE ROBE

La Bìblia la dise: “Ancora un poco, e i rugni no i ghen sarà pi. Te vardarè ndove che i era, e no te li catarè. Ma i mansi i sarà paroni dela tera, e i gavarà tanta alegria par via dela granda pace.” — SALMO 37:10, 11.

COSSA CHE QUESTO VOL DIR? El Dilùvio dei giorni de Noè no’l ga mia finio coi problemi par sempre. In poco tempo, le persone le ga scominsià a tribolar nantra volta par causa dei rugni. Ma suito, Dio el finirà del tuto cole brute robe, come dise el Salmo 37:10: “I rugni no i ghen sarà pi.” Dio el farà questo par meso del so Regno, che l’è un governo nel cielo. El Regno de Dio el ndarà governar le persone obediente qua ntela Tera.

PÉNSAGHE SORA: Sarà che i governanti ntela Tera i ndarà acetar el Regno de Dio? La Bìblia la dise che nò. Invesse, lori i restarà contra questo governo. (Salmo 2:2) Alora, cossa che sucederà con lori? Ntel posto dei governi dei òmini, ghen sarà sol el Regno de Dio “e sol lu el restarà par sempre”. (Daniel 2:44) Ma parché che toca finir fora coi governi dei òmini?

La Bìblia la dise: “El omo che camina no’l pol gnanca guidar i so passi.” — GEREMIA 10:23.

COSSA CHE QUESTO VOL DIR? I òmini no i ze mia stati fati par comandarse. No i ze mia boni de governar i altri e gnanca finir fora coi so problemi.

PÉNSAGHE SORA: Una ensiclopèdia a la dise che i diversi governi che ghen’è nel mondo no i ze mia boni de “finir fora coi problemi come malatie, fame, desgràssie nela naturesa, guere, violensa e gnanca de giutar i poareti”. Questa medèsima ensiclopèdia la dise che “arquanti . . . i crede che, se ghen fusse sol un governo in tuto el mondo, lu el saria bon de finir fora con tute queste brute robe”. Magari, stesso che fusse cossita, i òmini no i podaria finir fora con tute le dificoltà parché ghen saria ancora persone imperfete drio governar. Par quela, l’è sol el governo de Dio che el sarà pròpio bon de finir par sempre con tuti i problemi che ghen’è nel mondo.

Alora, de acordo cola Bìblia, no ocore che le persone bone le gàpia paura del fin del mondo. Questa la ze una bona notìssia! No ndaremo pi viver nte un mondo pien de problemi. Invesse, viveremo ntel maraveioso mondo che Dio el ne darà.

Quando che questo ndarà suceder? El pròssimo artìcolo ndarà mostrar la risposta dela Bìblia.