1-2. Parché che l’è importante tuti noantri capir come sarà la ressuression par viver nel cielo?

QUASI tuti i servi de Geovà ancoi i ga la speransa de viver nela Tera. Ma un pìcolo grupo el ga la speransa de esser ressussità par viver nel cielo. Alora, parché che l’è importante tuti noantri capir come che sarà la ressuression par viver nel cielo? Parché l’è sicuro che i untadi i vol saver come che sarà la so vita nel cielo e parché le altre piégore anca le riceverà benedission par causa de questa ressuression. Alora, l’è tanto importante par tuti noantri capir ben sora la ressuression par viver nel cielo.

² La Bìblia no la parla tanto sora come che sarà la vita dei untadi nel cielo. Ma Geovà el ga dato spìrito santo a arquanti dei dissìpoli de Gesù par scriver sora la speransa de viver nel cielo. Par esémpio, el apòstolo Gioani el ga dito: “Cari, adesso semo fioi de Dio, ma lu ancora no’l ga mostrà come che saremo nel futuro. Savemo che quando lu el se farà veder par noantri, saremo come lu parché ndaremo vederlo come lu l’è.” (1 Gio. 3:2) Alora, i untadi i sa che i ndarà veder a Geovà. El apòstolo Paolo anca el ga dito che i untadi i ndaria giutar el Cristo a finir con tuti i governi, tute le autorità e poderi e anca col ùltimo nemigo, la morte. Alora, Gesù, i untadi e tute le robe le sarà soto Geovà. (1 Cor. 15:24-28) Sicuro che questo sarà un tempo maraveioso! *

3. De acordo con 1 Corinti 15:30-32, come che la fede de Paolo nela ressuression lo ga giutà?

 ³ La fede che Paolo el gavea nela ressuression lo ga giutà a infrontar tante dificoltà. (Ledi 1 Corinti 15:30-32. *) Lu el ga dito ai fradei de Corinto: “Tuti i giorni mi infronto robe che le pol coparme.” Lu el ga anca dito: “Mi go lotà con bèstie cative in Èfeso.” Pol esser che lu el gavesse lotà con “bèstie cative” nte una arena in Èfeso. (2 Cor. 1:8; 4:10; 11:23) O pol esser che lu l’era drio parlar de giudei e altri che i era come “bèstie cative”. (Ati 19:26-34; 1 Cor. 16:9) Paolo el ga infrontà tuto questo, ma el ga bio sempre una forte speransa nel futuro. — 2 Cor. 4:16-18.

4. Come che la speransa dela ressuression la dà coraio par tanti fradei? (Vedi el ritrato dela capa.)

⁴ Noantri semo drio viver nte un tempo de tante dificoltà. Tanti dei nostri fradei i infronta la violensa e altri i ze de star in posti che i sofre tanto par causa dela guera e i ga tanta paura. Altri i ze de star in posti che no i ga libertà par adorar a Geovà. Alora, lori i mete in rìs-cio la so vita o la so libertà. Ma ancora cossita, questi fradei e sorele no i desiste de adorar a Geovà e i ze un esémpio par noantri. Questi fradei no i ga paura, parché se lori i more adesso, lori i sa che Geovà el pol ressussitarli par una vita tanto meio nel futuro.

5. Che maniera de pensar la pol far pi fiaca la nostra fede?

⁵ Paolo el ga dito che arquanti fradei i gavea un pensamento sbalià, lori i pensea: “Ndemo magnar e bever parché doman moriremo.” Vanti de Paolo, tante persone anca le pensea cossita. Come mostra in Isaia 22:13, tanti israeliti i ndea in serca de far quel che l’era bon par lori invesse de far quel che ghe piasea a Geovà. Lori i pensea che i gavea de far tuto quel che i podea nte un giorno, parché no i savea se in quelaltro i saria ancora vivi. Ancoi, savemo che tante persone anca le pensa cossita, ma no volemo mai far come lore. — 2 Cró. 36:15-20.

6. Parché che volemo gaver amighi che i crede nela ressuression?

⁶ I fradei in Corinto i gavea de star atenti par no far amicìssia cole persone che no le credea nela ressuression. L’è par quela che Paolo el ga dito par lori tornar indrio e no far pecati. (1 Cor. 15:33, 34) Queste parole le ne mostra che anca noantri ghemo de star atenti e scòlier amighi che i crede nela ressuression. Parché? Parché, se semo amighi de persone che le vol sol goder la vita ancoi, ndaremo scominsiar a pensar de maniera sbaliada e a far robe sbaliade, fin le robe che Geovà el òdia.

7. Cossa che fursi una persona la parlea?

⁷ Ledi 1 Corinti 15:35-38. * Una persona che no la credea nela ressuression, fursi la parlea: “Ma come che i morti i levarà su?” Ancoi, le persone le parla tante robe sora  quel che sucede dopo dela morte. Ma ndaremo veder cossa la Bìblia la insegna.

8. Che ilustrassion ne giuta a capir la ressuression par la vita nel cielo?

⁸ Quando una persona la more, el so corpo el se smarsisse. Ma Geovà, che el ga creà el Universo e tuto quel che ghen’è, el pol ressussitar la persona e darghe un corpo novo. (Gén. 1:1; 2:7) Paolo el ga fato una ilustrassion par mostrar che Dio no’l ga bisogno de ressussitar la persona col medèsimo corpo che la gavea. Lu el ga doperà el esémpio de un “grano” o una “semensa”, che quando la buta, la deventa una pianta. Sicuro che la pianta la ze tanto difarente dela semensa. Cossita, Paolo el ga fato questa ilustrassion par mostrar che Geovà el pol dar ala persona ressussitada el corpo che lu el vol.

9. Cossa che 1 Corinti 15:39-41 dise sora i difarenti tipi de corpi?

⁹ Paolo el ga dito che Dio el ga creà tanti corpi difarenti. Par esémpio, i corpi dei boi, dele bèstie che zola e dei pessi i ze tanto difarenti un del altro. Ghen’è anca difarensa intrà la Luna e el Sol e “cada stela la ga la so pròpia glòria”. Ancora che no semo boni de veder tute le stele, ghen’è de quele che le ze pi grande, quele pi pìcole, quele rosse, quele bianche e anca quele gialde, come el Sol. Paolo el ga dito che “ghen’è corpi par viver nel cielo e corpi par viver nela tera”. Come cossita? Nela Tera, ghen’è corpi de carne e osso, ma nel cielo ghen’è sol corpi spirituai, come quei che i àngeli i ga. — Ledi 1 Corinti 15:39-41. *

10. Come che l’è el corpo de quei che i ressussita par viver nel cielo?

¹⁰ Paolo el ga anca dito sora la ilustrassion  dela semensa: “Cossita anca ze la ressuression dei morti. Ze semenà in corussion, ze levà su sensa corussion.” Noantri savemo che, quando una persona la more, el so corpo el se smarsisse e el torna ala polver. (Gén. 3:19) Alora, come che el corpo el pol ressussitar “sensa corussion”? Paolo no l’era mia drio parlar de una ressuression par viver nela Tera come le ressuression che Elia, Eliseo e Gesù i ga fato. Paolo l’era drio parlar de una ressuression par viver nel cielo con un “corpo spiritual”. — 1 Cor. 15:42-44.

11-12. (a) Cossa che ga sucedesto con Gesù quando l’è stato ressussità? (b) Cossa che sucede coi untadi quando i ze ressussitadi?

¹¹ Quando Gesù l’era nela Tera, el gavea un corpo de carne. Ma quando lu l’è stato ressussità, l’è deventà “un spìrito che el dà vita” e l’è ndato al cielo. La medèsima roba sucede coi untadi che i sarà ressussitadi. Paolo el ga dito: “Cossita come semo compagni al omo che l’è stato fato dela polver, saremo compagni al omo che l’è vegnesto del cielo.” (1 Cor. 15:45-49) Alora i untadi i saria ressussitadi con un corpo spiritual par viver nel cielo.

¹² Alora Paolo el ga parlà sora una dele parte pi importante sora la ressuression. Lu el ga dito: “Carne e sangue no i pol gaver la eredità del Regno de Dio” nel cielo. (1 Cor. 15:50) Noantri ghemo de ricordarse che Gesù no l’è stato ressussità con un corpo de carne e sangue. Cossita, i apòstoli e i untadi no i podaria esser ressussitadi par viver nel cielo con un corpo de carne e sangue. Ma quando che lori i saria ressussitadi? Paolo el ga dito che questo no sucederia pena dopo dela so morte, ma sol dopo de un tempo. Quando Paolo el ga scrito 1 Corinti, tanti dissìpoli i era belche morti, come el apòstolo Tiago. (Ati 12:1, 2) I altri apòstoli e i untadi ancora i ndaria morir. — 1 Cor. 15:6.

13. Cossa che ndaria suceder quando el Cristo el vegnesse?

¹³ Gesù e Paolo i ga parlà sora la època che el Cristo el vegnaria. De 1914 in qua, noantri semo drio veder questa professia realisarse. Parché che podemo dir questo? Parché come la Bìblia la disea, noantri semo drio veder guere, teremoti, malatie e altre robe rugne in tuto el mondo. Semo anca drio veder le bone notìssie del Regno esser predicade in ‘tuta la tera abitada in testimònio a tute le nassion’ e questo laoro el sarà fato fin ala fin. (Mat. 24:3, 7-14) E Paolo el ga anca dito che ndaria scominsiar la ressuression dei cristiani untadi che i era morti. — 1 Tes. 4:14-16; 1 Cor. 15:23.

14. Cossa che sucede coi untadi che i more de 1914 in qua?

¹⁴ I untadi che i ze morti de 1914 in qua, suito i ze ressussitadi par viver nel cielo. Paolo el ga parlà sora questo in 1 Corinti 15:51, 52: ‘No ndaremo morir tuti, ma Dio el ndarà cambiar tuti noantri, nte un colpo, nte un serar de oci, nela ùltima trombeta.’ Queste parole de Paolo le ze drio suceder adesso! Quando i untadi i ressussita, lori i resta tanto contenti parché i pol viver par “sempre col Signor”. — 1 Tes. 4:17.

15. Cossa che i untadi i ndarà far nel cielo?

¹⁵ La Bìblia la dise cossa che i untadi che i ze ressussitadi ‘nte un serar de oci’ i farà nel cielo. Gesù el ga dito sora lori: “E a quel che obedisse ai me comandamenti fin ala fin e el vinse, mi ghe darò autorità sora le nassion, cossita come me Pare el me ga dato autorità. Lori i governarà le nassion con un baston de fero e le sarà fate a tochi come se le fusse un vaso de  baro.” (Apo. 2:26, 27) I untadi insieme col so Comandante, Gesù, i ndarà governar le nassion con un baston de fero. — Apo. 19:11-15.

16. Parché che la morte no la gavarà pi poder sora i umani?

¹⁶ La morte no la ga pi poder sora i untadi quando lori i ressussita. (1 Cor. 15:54-57) Alora, nel Armagedon, lori i podarà giutar a finir fora con tute le robe rugne de ancoi. Altri milioni de servi de Dio i vegnarà fora dela granda tribolassion par viver nel paradiso. (Apo. 7:14) Lori i podarà anca veder che la morte no la gavarà pi poder parché i ndarà veder la ressuression de bilioni de persone. Sicuro che noantri restaremo tanto contenti! (Ati 24:15) E quei che i sarà leai i vederà che la morte par causa de Adon no la gavarà pi poder sora lori e i viverà par sempre!

17. Cossa che le parole de 1 Corinti 15:58 le ne incoraia a far?

¹⁷ Tuti noantri semo grati par le parole de consolo sora la ressuression che ghen’è in 1 Corinti. Le parole de Paolo le ne ga dato ancora pi forsa par far el nostro meio “nel laoro del Signor”. (Ledi 1 Corinti 15:58. *) Se femo el meio che podemo in questo laoro, gavaremo una vita tanto felice nel futuro, meio de quela che semo boni de imaginar. Alora, tuto el laoro che femo par el Signor no’l sarà par gnente!