1-2. Che granda speransa noantri ghemo?

L’È TANTO importante gaver speransa. Par esémpio, arquanti i speta gaver una fameia felice, slevar i fioi con salute o restar meio de una bruta malatia. Anca noantri, che servimo a Geovà, volemo queste robe. Ma ghemo una speransa meio ancora, che la ze de viver par sempre insieme coi nostri amighi e quei dela nostra fameia che i sarà ressussitadi.

² El apòstolo Paolo el credea nela ressuression parché el ga dito: “Mi go speransa in Dio, che anca questi òmini i ga, che ghen sarà una ressuression tanto dei giusti come dei ingiusti.” (Ati 24:15) Tanto tempo vanti de Paolo, anca Giò l’era sicuro che Dio el se ricordaria de lu e lo ressussitaria. — Giò 14:7-10, 12-15.

3. Come che 1 Corinti capìtolo 15 pol giutarne?

³ La speransa dela ressuression dei morti la ze un dei pi importanti insegnamenti dela Bìblia. (Ebr. 6:1, 2) In 1 Corinti capìtolo 15, Paolo el parla sora la ressuression. Quel che lu el ga scrito, fursi ga fato pi forte la fede dei primi cristiani. Questo capìtolo el pol incoraiarne e far pi forte la nostra speransa anca se noantri belche credemo nela ressuression.

4. Cossa che ghemo de bisogno par creder nela ressuression dei morti?

⁴ La ressuression de Gesù la ne assa sicuri che anca se un amigo o qualchedun dela nostra fameia el more, lu el podarà esser ressussità. La ressuression de Gesù l’era una dele bone notìssie che Paolo el ga parlà ai corinti. (1 Cor. 15:1, 2) Paolo el ga dito che se una persona no la credesse nela ressuression, la so fede no la gavaria valor. (1 Cor. 15:17) Alora, noantri sol ndaremo creder che i morti i sarà ressussitadi se credemo nela ressuression de Gesù.

5-6. Parché che 1 Corinti 15:3, 4 l’è importante par noantri?

 ⁵ Nel scomìnsio del capìtolo 15, Paolo el ga parlà tre robe sora la ressuression: Prima, Cristo “l’è morto par i nostri pecati”. Seconda, l’è stato “metesto nel sepolcro”. Tersa, “l’è stato ressussità nel terso giorno, come dise le Scriture”. — Ledi 1 Corinti 15:3, 4. *

⁶ El profeta Isaia anca el ga dito che el Messia el ndaria morir e el saria metesto nel sepolcro intrà i rugni. Gesù el ga fato questo quando l’è morto par causa dei nostri pecati. (Isa. 53:8, 9, 12; Mat. 20:28; Rom. 5:8) Cossita, la morte de Gesù, esser metesto nel sepolcro e la so ressuression le ze robe tanto importante par noantri. Parché? Parché semo sicuri che podaremo esser lìberi del pecato e dela morte e che anca quei dela nostra fameia e i amighi che i ze morti i podarà tornar a viver.

7-8. Come che podemo esser sicuri che Gesù l’è stato ressussità?

⁷ Noantri sol ndaremo creder che i morti i sarà ressussitadi se credemo nela ressuression de Gesù. Come che podemo esser sicuri che lu l’è stato ressussità?

⁸ Podemo esser sicuri parché tante persone le ga visto Gesù dopo dela so ressuression e i ga parlà sora questo. (1 Cor. 15:5-7) Paolo e tanti dissìpoli i ga dito che Piero (Cefa) el ga visto Gesù dopo dela so ressuression. (Luc. 24:33, 34) Anca i apòstoli i ga visto Gesù dopo dela so ressuression. Lu anca el se ga fato veder a de pi de 500 fradei. Fursi questo ga sucedesto nela riunion che lori i era tanto contenti nela Galilea, come dise Mateo 28:16-20. Gesù el se ga fato veder anca a Tiago, fursi el fradel de Gesù che no’l credea che lu l’era el Messia. Dopo che Tiago lo ga visto, lu l’è stato sicuro che Gesù l’era el Messia. (Gioani 7:5) Nel ano 55, quando Paolo el ga scrito la carta ai Corinti, tante persone che le gavea visto Gesù dopo dela so ressuression, le era ancora vive. Alora, se qualchedun el gavesse dubi sora questo, el podaria parlar con una de queste persone.

9. De acordo con Ati 9:3-5, parché che Paolo l’era sicuro che Gesù l’è stato ressussità?

⁹ Nantra prova che Gesù l’è stato ressussità, l’è quel che ga sucedesto con Paolo. (Ati 26:12-15) Quando Paolo (Saulo) l’era drio ndar a Damasco, lu el ga scoltà una voce e el ga bio una vision de Cristo nel cielo. — 1 Cor. 15:8; ledi Ati 9:3-5. *

10. Cossa che Paolo el ga fato quando el ga scominsià a creder nela ressuression de Gesù?

¹⁰ Paolo el perseghia i cristiani, ma el ga scominsià a creder che Gesù l’è stato ressussità. Alora, lu el ga fato tanto sforso par giutar le persone a capir la ressuression de Gesù e el ga fin metesto la so vita in rìs-cio par difender questo. Par esémpio, lu el ga ciapà bote, l’è stato metesto in preson e la imbarcassion che lu l’era la se ga sfondà. L’è sicuro che tante persone le volea scoltar Paolo. (1 Cor. 15:9-11; 2 Cor. 11:23-27) Quando studiemo sora quel che i altri i ga parlà sora la ressuression de Gesù, noantri semo ancora pi sicuri che la ga sucedesto. Cossita, anca  la nostra fede nela ressuression, che ancora ndarà suceder, la resta pi granda.

11. Parché che arquanti in Corinto i gavea una idea sbaliada sora la ressuression?

¹¹ Arquanti cristiani nela cità greca de Corinto i gavea pensamenti sbaliadi sora la ressuression. Lori i parlea che i morti no i saria ressussitadi. (1 Cor. 15:12) Lori i parlea questo parché in nantra cità greca, che l’era Atena, ghen’era filòsofi che i ridea del insegnamento dela ressuression de Gesù. (Ati 17:18, 31, 32) Ghen’era ancora altri che i disea che la persona la ressussitea quando la se fermea de far quel che l’era sbalià e deventea una cristiana. Alora, se no i credesse nela ressuression, la so fede no la gavaria valor. Parché? Parché quando Gesù l’è stato ressussità, el ga pagà el risgate e ghemo el perdon dei pecati. Cossita, tuti quei che no i credesse nela ressuression, no i gavaria gnanca una speransa. — 1 Cor. 15:13-19; Ebr. 9:12, 14.

12. De acordo con 1 Piero 3:18, 22, parché che podemo dir che Gesù el ga bio una ressuression difarente?

¹² Paolo l’era sicuro che Gesù l’è stato ressussità parché lu lo ga visto. La ressuression de Gesù la ze stata difarente de quele altre parché le persone che le ga ressussità, dopo le ze morte nantra volta. Paolo anca el ga dito che Gesù l’è stato el primo a esser ressussità parché Gesù l’è stato el primo omo a ressussitar con un corpo spiritual e a ndar al cielo. — 1 Cor. 15:20; Ati 26:23; ledi 1 Piero 3:18, * 22. *

13. Che difarensa Paolo el ga dito che ghen’è intrà Adon e Gesù?

¹³ Come che la morte de un sol omo pol dar la vita a milioni de persone? Paolo el risponde a questa domanda quando el parla sora quel che Adon el ga fato e quel che Gesù el ga fato. Paolo el ga dito sora Adon: “La morte la ze vegnesta par meso de un sol omo.” E sora Gesù, lu el ga dito: “La ressuression dei morti la vien par meso de un omo.” Paolo el ga anca dito: “Cossita, par causa de Adon tuti i more, ma par causa del Cristo tuti i riceverà la vita.” (1 Cor. 15:21, 22) Par causa dela desobediensa de Adon, tuti i umani i sofre e i more. Ma par causa dela ressuression de Gesù, noantri ghemo una speransa tanto bona par el futuro!

14. Sarà che Adon el ndarà esser ressussità? Spiega.

¹⁴ Paolo el ga dito che “par causa de Adon tuti i more”. Cossa che lu el volea dir? Che tuti i fioi de Adon i saria pecadori e imperfeti e i ndaria morir. (Rom. 5:12) Ma sarà che Adon el sarà ressussità? Nò, parché lu l’era perfeto e el ga scoliesto desobedir a Dio. Alora, lu no’l pol gaver el perdon dei pecati par meso del sacrifìssio de Gesù. Anca quei che i sarà giulgadi par el Fiol del Omo come cavreti no i gavarà la ressuression. — Mat. 25:31-33, 46; Ebr. 5:9.

15. Chi che sarà ressussità come Gesù?

¹⁵ Paolo el ga scrito le so carte ai cristiani untadi de Corinto che i ndaria esser ressussitadi par viver nel cielo. Paolo el ga dito: “Par causa del Cristo tuti i riceverà la vita.” (1 Cor. 15:22) Questi cristiani “i ze stati santificadi come dissìpoli de Cristo Gesù, ciamadi par esser santi”. Paolo el ga anca parlà che lori “i ze morti come dissìpoli de Cristo”. (1 Cor. 1:2; 15:18; 2 Cor. 5:17) Paolo el ga dito in nantra  carta che ‘quei che i ze stati unidi a Gesù nte una morte compagna ala soa’, anca i sarà “unidi con lu nte una ressuression compagna ala soa”. (Rom. 6:3-5) Alora, i untadi col spìrito santo i sarà ressussitadi come Gesù e i ndarà al cielo.

16. Cossa che Paolo el volea dir quando el ga dito che Gesù el saria el primo a esser ressussità?

¹⁶ Paolo el ga dito che Cristo el saria el primo a esser ressussità. Ma come che lu el saria el primo, se Làsaro e altri i gavea belche ressussità? Paolo el volea dir che, cossita come i primi fruti dela racolta che i israeliti dea a Geovà, Gesù el saria el primo a esser ressussità con un corpo spiritual e a gaver la vita eterna. E quando Paolo el ga dito che Gesù el saria el primo, lu anca el volea dir che ghen saria altri che ndaria viver come Gesù nel cielo. Questi saria i apòstoli e altri cristiani scoliesti par viver con Gesù nel cielo.

17. Quando che i untadi i ga scominsià a esser ressussitadi par viver nel cielo?

¹⁷ Quando Paolo el ga scrito ai Corinti, la ressuression de quei che i ndaria viver nel cielo con Cristo no la gavea ancora scominsià. Lu el ga dito che questo ndaria suceder nel futuro. Lu anca el ga dito che saria ‘cada un nela so ora giusta: el primo l’è el Cristo. Dopo, quando Cristo el vegnaria, i saria ressussitadi quei che i ze soi’. (1 Cor. 15:23; 1 Tes. 4:15, 16) Sol dopo che Cristo ‘l’è vegnesto’, lori i ga scominsià a ‘esser unidi a Gesù nte una ressuression compagna ala soa’. E ancoi, semo ancora drio viver in questo tempo.

18. (a) De acordo con 1 Corinti 15:24-26, cossa che ndarà suceder nel cielo? (b) Parché capimo che ghen sarà una ressuression nela Tera?

¹⁸ “Quei che i ze de Cristo” e che i ze stati belche ressussitadi i sarà nel cielo con Gesù par finir fora coi governi, cole autorità e coi poderi. El ùltimo nemigo che sarà finio fora sarà la morte. E tuti quei che i sarà ressussitadi par viver nel cielo mai pi i ndarà morir. (Ledi 1 Corinti 15:24-26. *) Sarà che quei che no i ndarà viver nel cielo con Cristo i ga una speransa? Si, parché Paolo el ga dito che quei che ndaria viver nel cielo i ndaria esser ressussitadi vanti. Alora, questo vol dir che  ghen saria anca una dopo. (Fil. 3:11) Anca Giò el ga parlà sora una ressuression nel futuro. — Giò 14:15.

19. Che speransa ghen’è par quei che i ndarà viver nela Tera?

¹⁹ Che speransa ghen’è par quei che i ndarà viver nela Tera? Paolo el ga dito: “E mi go speransa in Dio che anca questi òmini i ga, che ghen sarà una ressuression tanto dei giusti come dei ingiusti.” (Ati 24:15) Sicuro che questa ressuression la sarà nela tera, parché nel cielo no ghen’è ingiusti.

20. Come questo stùdio el ga fato pi forte la to speransa nela ressuression?

²⁰ Sicuro che “ghen sarà una ressuression”. Quei che i sarà ressussitadi par viver nela Tera i podarà viver par sempre. Noantri podemo esser sicuri de questa promessa e la pol darne tanto consolo. Se te ghè perso qualchedun dela fameia o un amigo nela morte, lori i pol esser ressussitadi durante i Mila Ani del Regno de Cristo. (Apo. 20:6) La speransa dela ressuression anca la te assa sicuro, che se te mori vanti dei mila ani, te podarè esser ressussità. Questa “speransa no la ne assa disgustà” parché la ne dà pi coraio adesso e la ne giuta a servir a Geovà con alegria. (Rom. 5:5) Nel pròssimo stùdio, ndaremo parlar ancora de pi sora el capìtolo 15 de 1 Corinti.