STÙDIO 4
Parché che ndemo ala Selebrassion?
“Seité far questo in ricordo de mi.” — LUC. 22:19.
CÀNTICO 20 Te ne ghè dato el to pressioso Fiol
COSSA CHE NDAREMO IMPARAR? *
1-2. (a) Quando che se ricordemo de pi de qualchedun che l’è morto? (b) Cossa che Gesù el ga domandà che i so dissìpoli i fesse?
L’È BELCHE morto qualchedun che te ami tanto? Anca che fae tanto tempo, sicuro che te te ricordi tanto ben de questa persona, e ancora de pi nela època del ano che la ze morta.
2 Tuti i ani, milioni de persone le va a una riunion par ricordarse dela morte de Gesù. (1 Pie. 1:8) In questa riunion, se ricordemo che podaremo deventar perfeti e viver par sempre par causa del sacrifìssio che lu el ga fato. (Mat. 20:28) Gesù el vol che seitemo a ricordarse dela so morte. Par quela che vanti de morir el ga dito: “Seité far questo in ricordo de mi.” * — Luc. 22:19.
3. Cossa che ndaremo veder in questo stùdio?
3 Arquanti de quei che i va ala Selebrassion i ga la speransa de viver nel cielo, ma quasi tuti i ga la speransa de viver nela Tera. In questo stùdio, ndaremo veder parché che tuti noantri ghemo de ndar ala Selebrassion, e come far questo ndarà giutarne. Prima, ndaremo veder parché che i untadi i ga de ndar ala Selebrassion.
PARCHÉ CHE I UNTADI I VA ALA SELEBRASSION?
4. Parché che i untadi i magna del pan e i beve del vin nela Selebrassion?
4 I untadi che i va ala Selebrassion i magna del pan e i beve del vin. Podemo capir meio parché che i fà questo quando se ricordemo de quel che Gesù el ga fato nela so ùltima note qua nela Tera. Dopo che Gesù e i so dissìpoli i gavea pena fato la festività dela Pàscoa, Gesù el ga fato la Sena del Signor, che ancoi la ze la Selebrassion dela morte de Cristo. In questa Selebrassion, Gesù el ga dato el pan e el vin par i 11 apòstoli fedeli e lori i ga magnà e i ga bevesto. Gesù anca el ga parlà ai so dissìpoli sora el novo acordo e el acordo par un Regno. * (Luc. 22:19, 20, 28-30) Par causa de questi acordi, i apòstoli e tanti altri i pol deventar rè e sasserdoti nel cielo. (Apo. 5:10; 14:1) Sol i untadi che i ze ancora qua nela Tera i pol magnar del pan e bever del vin nela Selebrassion parché i fà parte de questi acordi.
5. Cossa che i untadi i ga de far par ndar al cielo?
5 I untadi i resta tanto contenti de ndar ala Selebrassion anca parché la ghe giuta a pensar sora la bela speransa che i ga. (Tito 2:13) Lori i ga la speransa de viver nel cielo, de mai pi morir, de laorar insieme con Gesù e con tuti i altri untadi e de esser boni de veder a Geovà. (1 Cor. 15:51-53; 1 Gio. 3:2) Ma i untadi i sa che i ga de esser fedeli a Geovà fin la so morte par viver nel cielo. (2 Tim. 4:7, 8) E le altre piégore? Parché che lore le va ala Selebrassion? — Gioani 10:16.
PARCHÉ CHE LE ALTRE PIÉGORE LE VA ALA SELEBRASSION?
6. Parché che le altre piégore le va ala Selebrassion?
6 Le altre piégore le va ala Selebrassion, ma no le magna del pan e no le beve del vin parché le va par vardarla. Nel ano de 1938, l’è stà la prima volta che quei che ga la speransa de viver nela Tera i ze stati convidadi par ndar ala Selebrassion. La Sentinela de 1 de marso de 1938 la ga dito: “L’è bon e giusto che le altre piégore le vae ala Selebrassion e le varde quel che l’è fato in questa riunion. Questa Selebrassion la ze e la ga de esser un giorno tanto felice anca par lore.” Le altre piégore le resta tanto contente de ndar ala Selebrassion, cossita come le persone le resta tanto contente de ndar a un matrimònio.
7. Parché che le altre piégore le ghe piase de ndar ala Selebrassion?
7 Le altre piégore le ghe piase de ndar ala Selebrassion anca parché el discorso le giuta a pensar nela bela speransa che le ga. Questo discorso el parla sora quel che Gesù e i 144 mila i ndarà far nei Mila Ani del Governo de Cristo. Par esémpio, lori i farà dela Tera un paradiso e i giutarà le persone a deventar perfete. Sicuro che tuti i resta maraveiadi de pensar come sarà viver qua nela Tera quando sucederà quel che l’è scrito nele professie de Isaia 35:5, 6, 65:21-23 e Apocalisse 21:3, 4. Pensar sora come sarà bel viver nel Paradiso cola nostra fameia e amighi fà pi forte la nostra speransa e la nostra voia de servir a Geovà par sempre. — Mat. 24:13; Gàl. 6:9.
8. Cossa che le altre piégore le mostra quando le va ala Selebrassion?
8 Le altre piégore anca le va ala Selebrassion parché le vol mostrar che le ama i untadi e che le ga caro de giutarli. La Bìblia la dise che i untadi e le altre piégore i ndaria laorar insieme. Vedemo tre professie che le parla sora questo.
9. Come Zacaria 8:23 mostra cossa le altre piégore le sente par i untadi?
9 Ledi Zacaria 8:23. * Questa professia la parla pròpio quel che le altre piégore le sente par i untadi. Le parole “un giudeo” e “valtri” le ze drio parlar dei untadi qua nela Tera. (Rom. 2:28, 29) I ‘diese òmini de tute le léngue dele nassion’ i ze le altre piégore. La professia la mostra che le altre piégore le ‘tien con forsa’, o sia, le ze leai ai untadi e le adora a Geovà insieme con lori. Par quela che le altre piégore le ze insieme coi untadi nela Selebrassion.
10. Cossa mostra che Geovà l’è drio realisar la professia de Ezechiel 37:15-19, 24, 25?
10 Ledi Ezechiel 37:15-19, * 24, 25. * Cossa mostra che Geovà l’è drio realisar questa professia? La union che ghen’è intrà i untadi e le altre piégore. Questa professia la parla de due bastoni. El baston “de Giudà” (che l’era la tribo che Geovà el scoliea i rè de Israel) el vol dir quei che i ga la speransa de viver nel cielo. El baston “de Efrain” el vol dir quei che i ga la speransa de viver nela Tera. * Geovà el ndaria far i due bastoni deventar sol un, o sia, quei che i ndaria viver nela Tera e quei che i ndaria viver nel cielo i deventaria sol un grupo. E questo l’è pròpio drio suceder ancoi, parché questi due grupi i ze drio obedir e servir insieme al so Rè, Gesù Cristo. Par quela che i untadi e le altre piégore i fà la Selebrassion come un sol grupo con “sol un pastor”. — Gioani 10:16.
11. Come che le altre piégore le ze drio giutar i untadi? (Mateo 25:31-36, 40)
11 Ledi Mateo 25:31-36, * 40. * Chi che le ze le piégore de questa ilustrassion? Lore le ze quei che i serve a Dio nela època del fin e che i ga la speransa de viver nela Tera, o sia, le “altre piégore”. Lore le ze drio giutar i untadi che ancora i ze qua nela Tera. Par esémpio, lore le ze drio giutarli a predicar e a far dissìpoli. — Mat. 24:14; 28:19, 20.
12-13. Che altre robe le altre piégore le pol far par giutar i untadi?
12 Tuti i ani, le altre piégore le giuta i untadi a convidar le persone par ndar ala Selebrassion. Lore le fà questo in tuto el mondo nele stimane vanti dela Selebrassion. (Vedi el quadro “ Sito drio pareciarte par la Selebrassion?”) Le altre piégore le giuta a pareciar la Selebrassion anca se no ghen’è untadi nele so congregassion. Le altre piégore le resta contente de giutar i so fradei untadi, parché le sa che le ze drio giutar anca a Cristo. — Mat. 25:37-40.
13 Parché che l’è bon che tuti noantri ndemo ala Selebrassion? Vedemo ancora altre robe.
PARCHÉ TUTI NOANTRI NDEMO ALA SELEBRASSION?
14. Come Geovà e Gesù i ga mostrà el so amor par noantri?
14Mostremo che semo grati al grando amor che Geovà e Gesù i ga mostrà quando ndemo ala Selebrassion. Geovà el ga belche fato tante robe che le mostra che el ne ama. Par esémpio, el ga mostrà un amor tanto grando quando el ga mandà el so Fiol par sofrir e morir par noantri. (Gioani 3:16) Anca Gesù el ga mostrà che el ama a tuti quando el ga fato questo sacrifìssio de volentiera. (Gioani 15:13) Sicuro che mai saremo boni de amar a Geovà e a Gesù tanto cossita. Alora cossa podemo far? Podemo mostrar che semo grati par meso de quel che femo tuti i giorni. (Col. 3:15) E quando ndemo ala Selebrassion, pensemo nel amor che lori i ga par noantri e mostremo che li amemo.
15. Parché che i untadi e le altre piégore i dà tanto valor al sacrifìssio de Gesù?
15Noantri demo tanto valor al sacrifìssio de Gesù. (Mat. 20:28) I untadi i ga la speransa de viver nel cielo, i ga una amicìssia con Geovà e i deventa i so fioi par causa del sacrifìssio de Gesù. (Rom. 5:1; 8:15-17, 23) Le altre piégore le pol esser amighe de Geovà, servirlo de una maniera che ghe piase e passar con vita par la granda tribolassion par causa del sacrifìssio de Gesù. (Apo. 7:13-15) Alora, i untadi e le altre piégore i dà tanto valor al sacrifìssio de Gesù. Lori i mostra questo quando i va ala Selebrassion dela morte de Gesù tuti i ani.
16. Parché che tuti noantri volemo ndar ala Selebrassion?
16 Noantri anca ndemo ala Selebrassion parché volemo obedir a Gesù. Tuti volemo obedir al comandamento che Gesù el ga dato vanti de morir. Lu el ga dito: “Seité a far questo in ricordo de mi.” — 1 Cor. 11:23, 24.
COME NDAR ALA SELEBRASSION POL GIUTARNE?
17. Parché che la Selebrassion la ne giuta a esser ancora pi amighi de Geovà?
17La Selebrassion la ne giuta a esser pi amighi de Geovà. (Tiago 4:8) Parché? Parché nela Selebrassion pensemo nela bela speransa che Geovà el ne dà e nel amor che el ne ga mostrà. (Ger. 29:11; 1 Gio. 4:8-10) Quando pensemo sora queste robe, amemo de pi a Geovà e deventemo ancora de pi so amighi. — Rom. 8:38, 39.
18. Parché che ghemo de studiar e pensar sora quel che Gesù el ga fato?
18La Selebrassion la ne giuta a gaver ancora de pi voia de far come Gesù. (1 Pie. 2:21) Vanti dela Selebrassion, ledemo nela Bìblia quel che ga sucedesto con Gesù nei giorni vanti de morir. El discorso dela Selebrassion el ne giuta a ricordarse del amor che Gesù el ga mostrà par noantri. (Efe. 5:2; 1 Gio. 3:16) Quando studiemo sora la vita de Gesù e pensemo sora, gavaremo ancora de pi voia de far compagno a lu. — 1 Gio. 2:6.
19. Cossa ghemo de far par seitar a esser amighi de Geovà?
19La Selebrassion la ne giuta a voler esser amighi de Geovà par sempre. (Giuda 20, 21) Seitaremo a esser amighi de Geovà se lo obedimo, femo quel che lo assa contento e parlemo sora lu ai altri. (1 Gio. 5:3; Pro. 27:11; Mat. 6:9) Dopo de ndar ala Selebrassion, gavaremo voia de dir a Geovà: “Mi te amo tanto e vui servirte par sempre!”
20. Parché che tuti noantri volemo ndar ala Selebrassion?
20 Alora, tuti noantri volemo ndar ala Selebrassion. Questo l’è un giorno che se ricordemo dela morte de una persona che amemo tanto, Gesù Cristo. Noantri anca se ricordemo del grando amor che Geovà el ga mostrà quando el ga dato el so Fiol come sacrifìssio. In questo ano, la Selebrassion la sarà fata nela note de vendre, nel giorno 15 de april. Amemo tanto a Geovà e a Gesù. Par quela che la roba pi importante par noantri la ze ndar ala Selebrassion dela morte de Cristo.
CÀNTICO 18 Gràssie par el risgate!
^ paràgrafo 5 Arquanti de noantri ga la speransa de viver nela Tera e altri nel cielo. Ma tuti restemo tanto contenti de ndar ala Selebrassion dela morte de Gesù tuti i ani. La Bìblia la ne giuta a capir parché che ghemo de ndar ala Selebrassion e come far questo pol giutarne.
^ paràgrafo 2 Nela Bíblia Fácil de Ler, questo testo el dise: “Fé questo par ricordarse de mi.”
^ paràgrafo 4 Par imparar de pi sora el novo acordo e el acordo par un Regno, vedi el stùdio “Vocês se tornarão ‘um reino de sacerdotes’” nela Sentinela de 15 de otobre de 2014, pàg 15-17.
^ paràgrafo 9 (Zacaria 8:23) Geovà dei esèrsiti el dise: “In quel tempo, diese òmini de intrà tute le léngue che se parla nele nassion i ciaparà e i tegnerà con forsa la roba de un giudeo. E i dirà: ‘Volemo ndar con valtri, parché ghemo scoltà che Dio l’è con valtri.’”
^ paràgrafo 10 (Ezechiel 37:15-19) Geovà el ga parlà nantra volta con mi. Lu el ga dito: 16 “Fiol del omo, ciapa un baston e scrivi sora lu: ‘Par Giudà e par quei del pòpolo de Israel che i ze con lu.’ Dopo, ciapa nantro baston e scrivi sora lu: ‘Par Giusepe, el baston de Efrain, e par tuti quei dela casa de Israel che i ze con lu.’ 17 Dopo, meti i due bastoni insieme, cossita lori i deventarà un nela to man. 18 Quando le persone del to pòpolo le ndarà domandarte: ‘No te ndarè dirne cossa che le vol dir queste robe?’, 19 te gavarè de risponderghe: ‘Cossita dise el Sovrano Signor Geovà: “Vao ciapar el baston de Giusepe, che l’è nela man de Efrain, e le tribo de Israel che le ze con lu, e vao meterlo col baston de Giudà. Mi vao farli deventar un sol baston. Lori i sarà un sol nela me man.”’
^ paràgrafo 10 (Ezechiel 37:24, 25) “‘“El me servo Davi el sarà el rè de lori, e tuti lori i gavarà un sol pastor. Lori i ndarà obedir ale me lege, e i ndarà obedir del tuto ai me comandamenti. 25 Lori i ndarà de star nela tera che go dato al me servo Giacò, che la ze la tera ndove stea i so antenati. Lori, i so fioi, e i fioi dei so fioi i ndarà de star in questa tera par sempre. E Davi, el me servo, el sarà el so governante par sempre.
^ paràgrafo 10 Par capir meio la professia dei due bastoni de Ezechiel capìtolo 37, varda el libro A Adoração Pura de Jeová É Restaurada!, pàg. 130-135, par. 3-17.
^ paràgrafo 11 (Mateo 25:31-36) Quando el Fiol del omo el ndarà vegner nela so glòria, e insieme de lu tuti i àngeli, alora lu el ndarà sentarse ntel so trono de glòria. 32 Tute le persone dele nassion le sarà riunide davanti de lu, e lu ndarà spartirle in due grupi, come el pastor el spartisse le piégore dele cavre. 33 E el ndarà meter le piégore ala so drita, ma le cavre ala so sanca. 34 El Rè el ndarà dir a quei dela so drita: ‘Vegné valtri, che sì benedidi par el me Pare. Podé ereditar el Regno che l’è stà parecià par valtri del scomìnsio del mondo fin ancoi. 35 Parché go bio fame e valtri me gavé dato qualcossa par magnar. Mi go bio sen e valtri me gavé dato qualcossa par bever. Mi ero un foresto e valtri me gavé ricevesto tanto ben. 36 Mi ero nudo e valtri me gavé dato robe par meter su. Mi son restà malà e valtri me gavé tendesto. Mi ero in preson e valtri sì vegnesti visitarme.
^ paràgrafo 11 (Mateo 25:40) El Rè el ndarà risponder: “Mi ve digo la verità: Quel che valtri gavé fato a un de quei pi cei dei me fradei l’è come se lo gavesse fato a mi.
