TUTI NOANTRI credemo che in questi ùltimi giorni Geovà l’è drio darne la istrussion che ghemo de bisogno par mantégnerne darente de Lu. (2 Tim. 3:1) Ma cossa che femo e pensemo quando Geovà el ne dà qualche orientassion? La nostra situassion la ze compagna a quela dei israeliti quando i era nel deserto. Quando lori i scoltea sonar la trombeta lori i gavea de far qualcossa.

Geovà el ga mandà Mosè far due trombete de argento bateste col martelo. Le trombete le era doperade par ciamar el pòpolo e anca par giutarli a saver la ora de ndar via del acampamento. (Nùm. 10:2) Le maniere difarente che i sasserdoti i sonea le trombete le ndaria dir quel che lori i gavea de far. (Nùm. 10:3-8) Ancoi anca el pòpolo de Dio el riceve orientassion de tante maniere. Questo ne fà ricordar de quando i sasserdoti i sonea le trombete. Ndemo veder tre maniere che el pòpolo de Geovà ancoi el riceve istrussion: quando semo convidadi a ndar ale grande riunion, quando i ansiani i ze convidadi a ricever trenamento e quando càmbia qualche istrussion par la congregassion.

Quando i israeliti i era nel deserto lori i gavea de meter el so acampamento intorno del tabernàcolo. Lori i era organisadi in quatro grupi intorno del tabernàcolo. Dele volte Geovà el ghe domandea de riunirse nela entrada del tabernàcolo nela banda leste. (Nùm. 10:3) Alora, quando i sasserdoti i ciamea el pòpolo, lori i gavea de sonar due trombete. El pòpolo el savea quel che gavea de far par la maniera che sonea le trombete. Quei che i era de star lì darente i rivea suito, ma quei che i era de star pi distante i ghe metea pi tempo e i gavea de far pi sforso. Ma el importante l’era che tuti i gavea de star insieme par scoltar le istrussion de Geovà.

Anca ancoi el pòpolo de Geovà l’è convidà a riunirse. Par esémpio, se riunimo quando ndemo a congressi e altri eventi spessiai. L’è lì che ricevemo istrussion e orientassion tanto importante. Le istrussion che ricevemo le ze compagne in tuto el mondo. Noantri femo parte de una granda fameia felice. Arquanti i ga de viaiar tanto par ndar a queste grande riunion. Altri i ze de star pi darente de questi posti. Quando ndemo a queste grande riunion, ricevemo tante benedission e ricompense.

Ma e quei che i ze de star pròpio distante dei posti che le sarà fate le grande riunion? Par meso dela tecnologia, anca questi fradei i pol assister a queste riunion. Par esémpio, el Betel de Benin el ga ricevesto la vìsita del rapresentante dela  sede mondial e lori i ga fato la trasmission a una cità de Nìger, che l’è in meso del deserto del Saara ciamada Arlit. Vinte e una persone le ga assistio ala programassion. Intrà lore ghen’era fradei, sorele e anca persone che gavea interesse. Ancora che questi fradei i era de star pròpio distante, lori i ze stati boni sentir che i era insieme dele 44.131 persone che le era riunide in questa riunion. Un fradel el ga scrito: “Gràssie tanto, de tuto el me cuor, par questa programassion! Questo me ga mostrà nantra volta che valtri amé tanto a noantri.”

Quando i sasserdoti i sonea sol una trombeta, i lìderi i gavea de ndar fin ala tenda de riunion. (Nùm. 10:4) Lì, lori i ndaria ricever trenamento e istrussion de Mosè. Le istrussion che i ndaria ricever li giutaria a tender meio del pòpolo. Se ti te fusse un de questi lìderi, sicuro che te farìssito tanto sforso par esser lì.

Ancoi i ansiani dela congregassion no i ze lìderi che i proa mandar nele piégore de Geovà. (1 Pie. 5:1-3) Ma lori i fà pròpio sforso par tender dele piégore de Geovà. Alora quando i ze convidadi par far qualche scola come la Scola del Ministero del Regno, lori i ga pròpio caro de ndar, parché in queste oportunità lori i impara a tender ancora meio dela congregassion. Cossita lori i pol giutar a tuti dela congregassion. Alora, stesso che no te ghè mai fato una de queste scole, l’è sicuro che te sì stà giutà par meso dei ansiani.

Dele volte i sasserdoti israeliti i fea el son dela trombeta tremar. Cossita tuto el pòpolo el savea che Geovà el volea che tuti i ndesse via de lì. (Nùm. 10:5, 6) Quando lori i organisea el acampamento par ndar via, tuto l’era pròpio organisà e ghe volea el sforso de tuti. Ma pol esser che tanti i pensea che l’era tanto fadiga far questi cambiamenti. Parché?

Fursi arquanti i pensea che i sasserdoti israeliti i seitea sonar le trombete par cambiar el posto del acampamento e che l’era massa de colpo. Dele volte la nùvola la restea ferma sol par un giorno e altre volte la nùvola la restea due giorni, un mese o anca de pi tempo. (Nùm. 9:21, 22) Alora quante volte el pòpolo el ga bio de cambiar el acampamento? Nùmeri, capìtolo 33, mostra che i israeliti i ga cambià el so acampamento intorno de 40 volte.

Dele volte i israeliti i catea un posto con ombria par meter el acampamento. La era una roba pròpio bela, anca parché lori i era in meso del deserto. (Deu. 1:19) Questo podaria esser una tentassion par lori parché i podea pensar che se i ndesse via de lì, fursi saria ancora pedo.

Quando le tribo le organisea el acampamento par ndar via, tanti i catea pròpio fadiga de spetar la so ora de ndar. Tuto el pòpolo el scoltea le trombete sonar ma no i podea ndar via tuti al medèsimo tempo. Quando le trombete le sonea nela prima volta, i ndea fora del acampamento le tribo del leste, che l’era Giudà, Issacar e Zebulon. (Nùm. 2:3-7; 10:5, 6) Dopo che queste tre tribo le ndea via i sasserdoti i sonea le trombete nantra volta. Quando i sonea la seconda volta, volea dir che le tre tribo del sud le podea ndar. I sasserdoti i continuea a sonar le trombete fin che tuti nel acampamento i ndesse via.

Fursi l’è stà fadiga acetar tante robe che le ga cambià nela organisassion. Pol esser che te te ghè preocupà parché tante robe le ga càmbia de colpo, o pol esser che te cati che no gavea bisogno de cambiar. Fursi la to passiensa la ze stata quasi finia. Anca parché pol esser che ga metesto tanto tempo par acetar i cambiamenti. Se femo sforso de far quel che l’è giusto, Geovà el ndarà benedirne tanto.

Nei giorni de Mosè, Geovà el ga orientà milioni de persone, intrà òmini, done e toseti nel deserto. Se Geovà no li gavesse tendesto, lori no i saria stati boni de mantegnerse vivi. Anca ancoi Geovà l’è drio orientar el so pòpolo. In questi ùltimi giorni, par causa dela orientassion de Geovà, noantri no sol se mantegnemo vivi, ma anca ghemo una bela relassion con Lu. Alora, quando ti te scolti sonar la trombeta fà compagno ai israeliti: móvete fora e obedisse a Geovà!