1-2. Come le parole de Isaia 65:16, 17 le ne incoraia a perseverar?

“NO STÀ MIA DESISTER!” L’è stà sora questo che el congresso de 2017 el ga parlà. Ghemo imparà sora come perseverar anca coi nostri problemi. Fà belche quatro ani che ghemo bio questo congresso e semo ancora drio perseverar.

² Sito drio infrontar qualche dificoltà? L’è morto qualchedun dela to fameia o un amigo? Sito drio infrontar dificoltà par causa dela età? Sito drio patir par causa dela violensa, perseghission o de qualche desgràssia? Sito drio tribolar par causa de una malatia, come la COVID-19? Noantri semo tanto premosi de viver sensa questi problemi e de gnanca ricordarli! — Ledi Isaia 65:16, 17. *

3. Cossa che ghemo de far adesso, e parché?

³ Noantri semo drio infrontar tanti problemi e ndaremo infrontar ancora de pi. (Mat. 24:21) Alora, ghemo de far pi forte la nostra perseveransa. Parché? Parché Gesù el ga dito: “Par causa dela vostra perseveransa, valtri gavaré vita.” (Luc. 21:19) Veder che altri i ze boni de perseverar ne giuta a infrontar anca le nostre dificoltà.

4. Parché che Geovà l’è el meio esémpio de perseveransa?

⁴ Geovà l’è el meio esémpio de perseveransa che ghen’è. Come cossita? Proemo pensar un pochetin. Sàtana l’è drio governar el mondo e ghen’è tanti problemi. Geovà el podaria finir fora con questi problemi adesso, ma lu l’è drio spetar la ora giusta. (Rom. 9:22) Intanto che el speta, lu l’è drio perseverar. Ndaremo studiar sora nove problemi che Geovà el infronta con perseveransa.

5. Come che el nome de Dio l’è drio esser disonorà, e cossa te pensi sora questo?

⁵ El so nome l’è disonorà. Geovà el ama el so nome e el vol che tuti i lo rispete. (Isa. 42:8) Fà sei mila ani che el so nome l’è disonorà. (Sal. 74:10, 18, 23) Questo el ga scominsià a suceder nel giardin del Èden quando el Diaol (che vol dir “Caluniador”) el ga dito che Dio no’l volea dar a Adon e Eva quel che i gavea de bisogno par esser felici. (Gén. 3:1-5) E anca ancoi tanti i ze drio dir questa busia contra Dio. Gesù l’è restà tanto preocupà par causa de questo che el ga insegnà i so dissìpoli a pregar: “Pare nostro che te sì ntei cieli, santificà sia el to nome.” — Mat. 6:9.

6. Parché che Geovà l’è drio spetar par provar che el ga el dirito de governar?

⁶ Tanti i ze restadi contra Dio e el so governo. El Diaol el ga proà imbroiar àngeli e anca umani par farli pensar che Dio no’l ga el dirito de governar. Ma sol Geovà el ga el dirito de governar i cieli e la Tera, e sol lu el sa la meio maniera de farlo. (Apo. 4:11) Ma ghe volaria tempo par provar che i umani no i saria boni de governar a lori stessi. (Ger. 10:23) Geovà l’è drio mostrar tanto saver e passiensa. Parché che podemo dir questo? Parché come lu l’è drio spetar el tempo che ghe vol, tuti i ndarà esser sicuri che Dio el ga el dirito de governar e che el sa la meio maniera de farlo. Tuti anca i saverà che sol el Regno de Dio ne darà la vera pace par viver nela Tera.

7. (a) Chi che no ga volesto pi obedir a Geovà? (b) Cossa che Geovà el ndarà far?

⁷ Arquanti dei so fioi no i ga volesto obedirghe. Geovà el ga creà i àngeli e le persone perfete. Ma, un dei so àngeli no’l ga volesto pi obedirghe e l’è deventà Sàtana, che vol dir “Opositor”. Dopo, Adon, Eva, altri àngeli e altre persone i ze ndati drio a Sàtana e anca no i ga volesto pi obedir a Dio. (Giuda 6) Dopo, anca israeliti, che i era el pòpolo che Dio el gavea scoliesto, no i ga pi volesto obedirghe e i ze ndati servir a altri dei. (Isa. 63:8, 10) L’è sicuro che Geovà l’è restà tanto disgustà de esser tradio. Anca cossita, Geovà l’è drio infrontar questo con perseveransa fin quando el ndarà finir fora coi rugni. L’è sicuro che tuti quei che i ze drio perseverar come Geovà i ze premosi par veder questo!

8-9. (a) Che busie Sàtana el dise? (b) Cossa che podemo far par provar che Sàtana lu l’è un busier?

⁸ Sàtana el seita a dir busie. Sàtana el ga dito che Giò e tuti i servi de Geovà sol i ndaria far quel che l’è giusto parché i volaria qualcossa indrio. (Giò 1:8-11; 2:3-5) Ancoi, Sàtana el seita a dir che le persone sol le serve a Dio parché le vol qualcossa indrio. (Apo. 12:10) Cossa che podemo far par provar che Sàtana l’è un busier? Provemo che lu l’è un busier quando infrontemo le dificoltà con perseveransa, seitemo leai e mostremo che amemo tanto a Geovà. Se mostremo perseveransa compagno a Giò anca noantri saremo benedidi. — Tiago 5:11.

⁹ Sàtana anca el dopera la religion falsa par dir che Geovà l’è rugno e che el fà le persone patir. Par esémpio, quando un tosatel el more, arquanti i dise che lu l’è morto parché Dio el gavea bisogno de nantro angeleto nel cielo. Che bruta busia! Noantri cognossemo tanto ben a Geovà e semo sicuri che mai el  ndaria far una roba cossita. Alora, cossa che podemo far par giutar a darghe una risposta a quel che lo sfida? (Pro. 27:11) Par esémpio, quando more qualchedun che amemo o se ghemo qualche malatia, no ghe demo la colpa a Dio. Pitosto, ghemo fede che lu el ndarà finir fora cole malatie e cola morte e parlemo ai altri che Geovà l’è un Dio tanto amoroso.

10. Cossa che el Salmo 22:23, 24 el ne insegna sora Geovà?

¹⁰ El sofrimento dei so cari servi leai. Geovà el sofre quando el ne vede patir. Par esémpio, lu el òdia vederne sofrir par causa de perseghission, malatie o dela nostra imperfession. (Ledi Salmo 22:23, 24. *) Par quela che Geovà el vol finir fora con tuto el sofrimento, e el ndarà farlo. (Vedi anca Ésodo 3:7, 8; Isaia 63:9.) Presto, “lu el sugarà tute le làgrime dei so oci, e no ghen sarà pi la morte, gnanca pi tristessa, gnanca piander, gnanca dolor”. — Apo. 21:4.

11. Come che Geovà el se sente par causa dei so amighi che i ze morti?

¹¹ La morte dei so amighi. Come che Geovà el se sente par causa dei so amighi che i ze morti? Lu l’è tanto premoso de vederli nantra volta! (Giò 14:15) L’è sicuro che Geovà el vol tanto veder el so servo Abraon nantra volta. (Tiago 2:23) E anca a Moisè, che i se parlea “fàcia a fàcia”. (Éso. 33:11) E anca de scoltar Davi e altri scritori dei Salmi cantar bei càntichi par lodarlo! (Sal. 104:33) Tuti questi servi leai i ze belche morti, ma Geovà no’l se ga mia desmentegà de lori. (Isa. 49:15) Geovà el se ricorda tanto ben come i era i so cari amighi che, par lu,  i ze ancora vivi. (Luc 20:38, nota.) Geovà l’è premoso par ressussitar queste persone, scoltar le so orassion e vederle adorarlo. Se l’è morto qualchedun che te ami, pensar in quel che Geovà el sente pol consolarte tanto.

12. Parché che Geovà el resta tanto disgustà ancoi?

¹² Persone bone le patisse par causa dei rugni. Nel giardin del Èden, Geovà belche el savea che, vanti de finir fora col sofrimento, le robe le ndaria restar pedo. Ma Geovà el òdia veder che ghen’è tante robe rugne e tanta violensa. Lu anca el se preocupa tanto con quei che no i ze boni de protegerse, come i òrfani e le védove. (Zac. 7:9, 10) Geovà anca el resta tanto disgustà de veder che le persone rugne le ghe dise su ai so servi e li mete in preson. Ma te pol esser sicuro che se te sì drio perseverar come Geovà, lu el te ama tanto.

13. Che brute robe le persone le ze drio far, e cossa che Geovà el ndarà far?

¹³ Ghen’è cada volta de pi imoralità sessual. I umani i ze stati creadi par far compagno a Dio, ma Sàtana el resta contento quando l’è bon de farli desobedir a Dio. Nei giorni de Noè, Geovà l’è restà tanto disgustà quando el ga visto che le persone le fea tante robe rugne. (Gén. 6:5, 6, nota, 11) E ancoi, la medèsima roba la sucede. Sàtana el resta tanto contento de veder che le persone le fà robe tanto imorai. Ghen’è tanta imoralità sessual intrà òmini e done e le persone del medèsimo sesso. (Efe. 4:18, 19) Sàtana el resta ancora pi contento quando un servo de Geovà el fà un bruto pecato. Ma Geovà no’l ndarà assar che queste robe le suceda par sempre, parché el ndarà finir fora cole persone imorai che no le vol cambiar.

14. Cossa le persone le ze drio far cola Tera e cole bèstie?

¹⁴ Veder che le persone le ze drio rovinar la Tera. Dio el volea che le persone le tendesse dele robe che el ga creà. (Gén. 1:28) Ma, le persone le ze drio governar a lore stesse e le ze drio rovinar quel che Dio el ga creà. (Ecl. 8:9) Arquanti studiosi i dise che de qua un per de ani, no ghen sarà pi 1 milion de tipi de bèstie e de piante par causa dele persone. Arquanti i ze tanto preocupadi con quel che ndarà suceder cola Tera. Ma, l’è tanto bon saver che Dio el ndarà finir fora con tuti quei che i rovina la Tera e la farà deventar un paradiso. — Apo. 11:18; Isa. 35:1.

15-16. Cossa che ne dà forsa par perseverar? Parla anca dela ilustrassion.

¹⁵ Geovà el podaria finir fora con tute queste robe rugne nela ora che el volesse. Ma, Geovà l’è drio mostrar perseveransa parché l’è drio infrontar tute queste robe fà miliari de ani. (Vedi el quadro “ Come che Geovà l’è drio mostrar perseveransa?”) Questo l’è tanto bon par noantri. Parché? Proa pensar nte un omo e una dona che i ze drio spetar un bambin. El so dotor el ghe dise che el bambin l’è tanto malà, che la so vita no la sarà fàcile e che el ndarà viver pròpio poco. Anca che no sarà fàcile tender del bambin, i so genitori i ndarà far questo con tanto amor. E l’è questo amor che ndarà giutarli a perseverar e far el meio par el bambin.

¹⁶ Noantri semo come quel bambin parché semo imperfeti. Anca cossita, Geovà el tende de noantri con tanto amor. (1 Gio. 4:19) Ma, Geovà l’è difarente de quei genitori parché el pol finir fora col sofrimento, e el ga belche scoliesto la ora de far questo. (Mat. 24:36) Veder che Geovà el ne ama tanto cossita ne dà forsa par perseverar.

17. Come quel che dise sora Gesù in Ebrei 12:2, 3 ne incoraia a perseverar?

 ¹⁷ Geovà l’è el meio esémpio de perseveransa. Gesù el ga fato compagno a so Pare. Lu el ga perseverà anca se le persone le ghe ga dito su, lo ga umilià e lo ga picà su nte un pal de tortura. (Ledi Ebrei 12:2, 3. *) L’è sicuro che el esémpio de perseveransa de Geovà el ga dato forsa par Gesù perseverar. Anca noantri podemo gaver questa forsa.

18. De acordo con 2 Piero 3:9, cossa che sucede par causa dela passiensa de Geovà?

¹⁸ Ledi 2 Piero 3:9. * Geovà el sa el tempo giusto par finir cole robe rugne de questo mondo. Ma lu l’è passiente e cossita, tante persone le ze drio imparar sora Geovà e le ze drio servirlo. Questi milioni de persone i ze parte dela granda moltitùdine e i ze tanto grati par la perseveransa de Dio. E nel futuro, milioni che i ga perseverà fin el fin i ndarà viver qua nela Tera. Quando questo sucederà, tuti i ndarà esser sicuri che Geovà el ga fato la meio dessision.

19. Cossa che volemo far, e cossa che ndarà suceder se lo femo?

¹⁹ Anca che ghen sìpia tanto dolor e sofrimento, Geovà l’è un Dio contento. (1 Tim. 1:11) Alora, el esémpio de Geovà el ne insegna a perseverar contenti. Noantri semo drio spetar la ora che lu santificarà el so nome, provar che l’è el meio governante e finir fora con tute le robe rugne che ghen’è ancoi. Intanto che spetemo, ghemo de perseverar contenti e ricordarse sempre che anca Geovà l’è drio far questo. Cossita, ndarà suceder quel che dise el testo de Tiago 1:12: ‘Felice l’è quel che el seita a perseverar anca cole dificoltà, parché Geovà el ndarà darghe la vita che lu el ga prometesto dar a quei che i lo ama.’