1. Parché che te sì tanto grato a Geovà?

COME che te sì deventà un servo de Geovà? Fursi te ghè scoltà le bone notìssie par meso dei to genitori, de qualchedun nela scola, nel laoro o de casa in casa. (Mar. 13:10) Alora, questa persona la ga tolto del so tempo e la se ga sforsà par insegnarte sora Geovà. Par causa del stùdio, te ghè scominsià a amar a Geovà, te ghè anca capio che lu el te ama e te sì deventà un dissìpolo de Gesù cola speransa de viver par sempre. Alora, te sì tanto grato a Geovà parché lu el ga doperà una persona par insegnarte sora lu e el te ga acetà come so servo. — Gioani 6:44.

2. Cossa che ndaremo imparar in questo stùdio?

² Adesso che cognossemo a Geovà, podemo giutar anca i altri a cognosserlo e a gaver la speransa de viver par sempre. Fursi ne piase tanto predicar de casa in casa. Ma fursi ne fà fadiga scominsiar e far un stùdio dela Bìblia. Se te te senti cossita, questo stùdio ndarà giutarte. Prima, ndaremo capir parché che ghemo de predicar, ma anca insegnar ale persone sora le bone notìssie. Dopo, ndaremo anca imparar parché che femo dissìpoli e come podemo dàrghene fora cole dificoltà par far studi.

3. Parché che noantri predichemo?

³ Quando Gesù l’era qua nela Tera, el ga dito che i so dissìpoli i gavaria de far due robe. Prima, el ga dito che lori i gavaria de predicar le bone notìssie del Regno e el ghe ga insegnà  come farlo. (Mat. 10:7; Luc. 8:1) Par esémpio, Gesù el ga dito cossa che lori i gavaria de far quando le persone le scoltesse le bone notìssie, ma anca quando no le scoltesse. (Luc. 9:2-5) Lu anca el ga dito che questo laoro el saria fato in tute le nassion. (Mat. 24:14; Ati 1:8) Alora, i dissìpoli de Gesù i gavaria de predicar a tute le persone sora el Regno de Dio e cossa che questo Regno el ndaria far.

4. De acordo con Mateo 28:18-20, cossa la ze la seconda roba che i dissìpoli de Gesù i gavaria de far?

⁴ Gesù el ga dito che i so dissìpoli i gavaria de far anca nantra roba. Cossa la era? Insegnar le persone che le podaria deventar so dissìpoli a obedir tute le robe che lu el gavea domandà. Ma sarà che sol i dissìpoli de Gesù in quel tempo i gavaria de far questo laoro? Sicuro che nò! Gesù el ga dito che questo laoro el saria fato fin ala fin. (Ledi Mateo 28:18-20. *) Gesù fursi el ga dato questo comandamento quando el se ga fato veder a de pi de 500 dissìpoli. (1 Cor. 15:6) Anca par meso de una vision, Gesù el ga dito al apòstolo Gioani che tuti so dissìpoli i gavaria de giutar le persone a imparar sora Geovà. — Apo. 22:17.

5. De acordo con 1 Corinti 3:6-9, che ilustrassion Paolo el ga doperà par parlar sora predicar e insegnar?

⁵ El apòstolo Paolo el ga dito che el laoro de far dissìpoli l’è come piantar. Lu el ga mostrà che no basta mia sol piantar le semense. Lu el ga dito ai fradei de Corinto: ‘Mi go piantà, Apolo el ga dato àqua . . . Valtri sì el campo che Dio l’è drio laorar.’ (Ledi 1 Corinti 3:6-9. *) Noantri laoremo nel campo che l’è de Dio. Quando noantri predichemo l’è come se fùssino drio piantar semense. Quando ghe insegnemo, l’è come se fùssino drio darghe àqua ale semense. (Gioani 4:35) Ma semo sicuri che l’è Dio che el fà le semense cresser.

6. Cossa che ghemo de far par giutar i studianti?

⁶ Noantri volemo giutar “quei che i ga la giusta disposission”, o sia, quei che i vol imparar la verità. (Ati 13:48) Lori i ndarà deventar dissìpoli se noantri li giutemo a (1) capir, (2) creder e (3) meter in pràtica quel che i impara dela Bìblia. (Gioani 17:3; Col. 2:6, 7; 1 Tes. 2:13) L’è sicuro che ghemo de sforsarse e tor del nostro tempo par giutarli a cambiar la so maniera de pensar e a fermarse de far quel che l’è sbalià. Fursi ghe vol arquanti mesi fin che el studiante el càmbie quel che el ga de bisogno e el sìpia batesà. (2 Cor. 10:4, 5) Tuti nela congregassion i pol giutar el studiante quando i ghe mostra amor e i lo fà sentirse ben nele riunion. (Gioani 13:35) L’è sicuro che questo ndarà giutar tanto el studiante.

7. Parché che noantri predichemo e femo dissìpoli?

⁷ Noantri predichemo e femo dissìpoli parché amemo a Geovà. Alora, quando te sforsi par obedir al comandamento de Gesù, te mostri che te ami a Dio. (1 Gio. 5:3) Te  te ricordi de quando te ghè scominsià a predicar? Fursi no l’è stà mia fàcile parché te sì restà con paura de parlar cola prima persona. Ma par causa del to amor a Geovà e parché te volei obedir al comandamento de Gesù, te ghè scominsià a far questo laoro. Dopo de un tempo, l’è restà pi fàcile predicar. Ma fursi te ghè paura de far studi dela Bìblia. Se questo l’è drio suceder, prega a Geovà e domàndaghe che el te giute a gaver de pi coraio. L’è sicuro che el ndarà giutarte.

8. De acordo con Marco 6:34, che nantra roba ne incoraia a insegnar?

⁸ Noantri anca predichemo e femo dissìpoli parché amemo ale persone. Varda el bel esémpio de Gesù. Gesù e i so dissìpoli i era pròpio strachi parché i gavea predicà tuto el giorno. Alora, lori i ze ndati nte un posto par riposar, ma le persone li ga catà. Gesù l’era pròpio straco, ma anca cossita, el ghe ga insegnà “tante robe”. (Ledi Marco 6:34. *) Parché che Gesù el ga volesto giutar quele persone? Parché lu el se metea nel posto de lore, alora ghe fea pecà vederle sofrir e sensa una speransa. La medèsima roba la sucede anca ancoi. Anca se ne par che le persone le ze felice e contente, lore le ze come piégore perse sensa un pastor par tenderle. El apòstolo Paolo el ga dito che queste persone no le cognosse a Dio e no le ga una speransa. (Efe. 2:12) Lore le ze nela “strada che la mena ala destrussion”. (Mat. 7:13) Queste persone le ga bisogno de cognosser a Geovà. Quando pensemo sora questo, sentimo amor e compassion par lore e volemo giutarle. E la meio maniera de far questo l’è insegnarghe la Bìblia.

9. De acordo con Filipensi 2:13, come che Geovà el pol giutarte?

⁹ Fursi no te scominsi a far un stùdio dela Bìblia parché ghe vol tempo e sforso par farlo. Se questo l’è drio suceder con ti, parla con Geovà sora quel che te senti. Domàndaghe che el te giute a gaver la voia de catar e far un stùdio. (Ledi Filipensi 2:13. *) El apòstolo Gioani el ga dito che Geovà el ne risponde quando ghe domandemo quel che l’è de acordo cola so volontà. (1 Gio. 5:14, 15) Alora, te pol esser sicuro che Geovà el ndarà giutarte a gaver la voia de far dissìpoli.

10-11. Parché che fursi no semo drio far studi dela Bìblia?

¹⁰ Noantri savemo che predicar l’è tanto importante. Ma fursi le dificoltà che infrontemo le ne intriga de far quel che volarìssino nela predicassion. Che dificoltà le ze queste e come che podemo dàrghene fora con lore?

¹¹ No semo boni de far quel che volarìssino. Par esémpio, fursi noantri semo belche veci o no ghemo una bona salute. Se te infronti questa dificoltà, proa pensar in quel che l’è drio suceder nela pandemia dela COVID-19. Ghemo capio che semo boni de far studi sensa ndar fora de casa. Arquante persone le volaria studiar la Bìblia, ma sol le pol far questo de matina bonora o de note. Cossa pénsito de studiar la Bìblia con queste persone nela ora che lore le vol? Ricòrdate de quel che ga sucedesto con Nicodemo. Lu el  ga volesto parlar de note e Gesù el ga fato questo. — Gioani 3:1, 2.

12. Come podemo esser sicuri che semo boni de far studi dela Bìblia?

¹² Fursi pensemo che no semo boni de far un stùdio dela Bìblia. Fursi te pensi che te sè poco e che no te sì un bon maestro. Ma varda tre robe che pol giutarte a gaver de pi coraio. Prima, Geovà l’è sicuro che te ghè quel che te ocore par insegnar le persone sora lu. (2 Cor. 3:5) Seconda, Gesù, che el ga la ‘autorità nel cielo e nela tera’, el te ga domandà de far questo. (Mat. 28:18) Tersa, te pol domandar el aiuto dei altri. Par esémpio, te pol domandar al superintendente del to grupo, a un pioniero o a nantro predicador che el te giute a scominsiar e a far un stùdio dela Bìblia. Te pol anca ndar insieme nei studi de questi fradei par imparar con lori. Cossita, te vè far come Gesù, che el se ga fidà in Geovà e el ga fato come lu ghe ga insegnà. — Gioani 8:28; 12:49.

13. Parché che ghemo de cambiar la nostra maniera de insegnar?

¹³ Fursi ne fà fadiga cambiar la maniera che insegnemo e quel che doperemo. Quando una persona la sa far tanto ben una roba, no l’è fàcile cambiar. Adesso che ghemo el libro Te pol viver felice par sempre!, ghemo nantra maniera par far studi dela Bìblia. Adesso, noantri ledemo sol un per de paràgrafi e discoremo tanto col studiante. Noantri anca doperemo tanti vìdei e altre robe che ghen’è nel JW Library^®. Alora, se l’è fadiga cambiar la maniera de far i studi dela Bìblia, domanda el aiuto de Geovà e dei fradei. Cossita, sarà pi fàcile cambiar quel che te ocore e te restarè ancora pi contento de far studi dela Bìblia. Te vè sentir la medèsima roba de un pioniero, che el ga dito: “Questa nova maniera de insegnar la ze tanto bela par el predicador e anca par el studiante.”

14. (a) Quando le persone no le vol scoltarne, cossa che ghemo de ricordarse? (b) Come quel che dise 1 Corinti 3:6, 7 pol incoraiarne?

¹⁴ Fursi semo de star nte un posto che poche persone le vol studiar la Bìblia. Pol esser che le persone no le vol scoltarne o anca le reste cative con noantri. Cossa che pol giutarne a seitar a far el nostro laoro? Ricordarse che le persone le pol cambiar. Par esémpio, una persona che mai la ga volesto scoltarne la pol cambiar e voler cognosser a Geovà. (Mat. 5:3) Tanti che vanti no i volea gnanca leder le nostre publicassion, i ga acetà un stùdio dela Bìblia. Anca savemo che Geovà l’è el Paron dela racolta. (Mat. 9:38) Lu el vol che seitemo a piantar e darghe àqua. Ma anca savemo che l’è lu che el farà vegner su. (1 Cor. 3:6, 7) E anca se no te sì drio far studi, ricòrdate che Geovà el vede el to sforso e nò quante publicassion te assi o quanti studi te fè! *

15. Come che Geovà el se sente quando una persona la impara sora lu e dopo insegna anca ai altri?

¹⁵ Geovà el resta tanto contento quando una persona la impara sora lu e la insegna anca ai altri. (Pro. 23:15, 16) Par esémpio, anca cola pandemia, nel ano de 2020, 7.705.765 studi dela Bìblia i ze stati fati e 241.994 persone le se ga batesà. Questi dissìpoli i ndarà far anca altri dissìpoli. (Luc. 6:40) L’è sicuro che Geovà el resta tanto  contento de veder che tuti noantri semo drio insegnar ai altri sora lu.

16. Cossa podemo sforsarse de far?

¹⁶ No l’è fàcile giutar una persona a deventar un dissìpolo de Gesù. Ma col aiuto de Geovà, saremo boni de giutar le persone a amarlo. Cossa te pensi de sforsarte par scominsiar al manco un stùdio dela Bìblia? Proa scominsiar un stùdio dela Bìblia con tute le persone che te parli. L’è sicuro che Geovà el ndarà benedirte e te restarè maraveià.

17. Cossa che ndarà suceder se insegnemo ale persone sora Geovà?

¹⁷ L’è un grando onor predicar e insegnar ai altri sora la Bìblia, e noantri restemo tanto contenti de far questo laoro. El apòstolo Paolo el ga giutà tanti in Tessalónica a deventar dissìpoli de Gesù e el ga dito sora lori: “Quala che la ze la nostra speransa, alegria o corona de orgòlio davanti del nostro Signor Gesù, ntela so presensa? No sì pròpio valtri? Sicuro che valtri sì la nostra glòria e alegria.” (1 Tes. 2:19, 20; Ati 17:1-4) Tanti ancoi anca i se sente cossita. Par esémpio, la sorela Stéphanie e el so sposo i ga giutà tanti a batesarse. Ela la ga dito: “La roba che ne assa pi contenti l’è giutar una persona a dedicar la so vita a Geovà.”