1-2. Chi che pol giutar un studiante dela Bìblia a batesarse?

L’È PI FÀCILE che un studiante dela Bìblia el se batese quando tuti i fradei dela congregassion i lo giuta. Varda cossa che Amy, una sorela che la ze del Fiji, la ga dito: “Me piasea tanto de quel che mi era drio imparar nel stùdio dela Bìblia parché mi savea che l’era la verità. Ma sol dopo che go scominsià a star insieme coi fradei che go cambià quel che mi gavea de bisogno e go dessidio batesarme.”

² Tuti i predicadori i pol giutar i studianti a far parte dela congregassion. (Efe. 4:16) Leilani, una pioniera del Vanuatu, la ga dito: “Tanti i dise che tuta la comunità la pol giutar a slevar su i toseti. Mi penso che questo anca sucede coi studianti nela congregassion. Tuti i pol far qualcossa par giutarli a batesarse.” Par slevar i toseti, quei dela fameia, i amighi e i maestri i pol insegnarghe robe importanti e incoraiarli a farle. Questo sucede anca coi studianti, tuti i fradei i pol darghe consili, incoraiarli e esser un bon esémpio par lori. — Pro. 15:22.

3. Cossa che podemo imparar de quel che Ana, Dorin e Leilani i ga dito?

³ Un fradel o una sorela che el ga un stùdio el resta contento quando i fradei dela congregassion i giuta el so studiante. Ana, che la ze pioniera spessial nela Moldàvia, la ga dito: “Quando un studiante el scomìnsia a far cambiamenti el ghe ocore che tuti dela congregassion lo giute.” Dorin, un pioniero spessial dela Moldàvia, el ga dito: “Dele volte, i fradei i parla robe che mai ghemo pensà de parlar e queste robe le  giuta el studiante.” La sorela Leilani anca la ga dito: “Quando el studiante el vede el amor che ghen’è intrà i fradei, el capisse che noantri semo pròpio el pòpolo de Geovà.” — Gioani 13:35.

4. Cossa che ndaremo imparar in questo stùdio?

⁴ Fursi te te domandi: ‘Come che mi vao giutar un studiante de nantro fradel a batesarse se no son mi che ghe fao el stùdio?’ In questo stùdio, ndaremo imparar cossa che ghemo de far quando ndemo insieme con qualchedun far un stùdio. Ndaremo anca imparar cossa che podemo far quando el studiante el scomìnsia a ndar ale riunion e come che i ansiani i pol giutarghe fin al batésimo.

5. Quando te vè con un fradel far un stùdio dela Bìblia, cossa che te ghè de far?

⁵ Nte un stùdio dela Bìblia, el fradel che el fà el stùdio el ga de giutar el studiante a capir la Parola de Dio. Se questo fradel el te convida par ndar insieme far el stùdio, te ghè de giutarlo. (Ecl. 4:9, 10) Ma cossa che te pol far par giutarlo?

6. De acordo con Proverbi 20:18, cossa che te ghè de far vanti de ndar insieme de nantro fradel far un stùdio?

⁶ Ghemo de pareciarse par el stùdio dela Bìblia. Prima proa cognosser de pi el studiante. (Ledi Proverbi 20:18. *) Te pol domandar al fradel che el fà el stùdio: “Te pol parlarme un pochetin sora el to studiante? Cossa che te vè studiar con lu? Ghen’è qualcossa che no go de parlar? Cossa che te vol giutarlo a meter in pràtica? Cossa che podemo far par giutarlo a meter in pràtica quel che el va imparar?” Sicuro che el fradel no’l ndarà parlar sora robe che no te ghè bisogno de saver. Ma cognosser un pochetin el studiante ndarà giutarte. Una missionària de nome Joy sempre la fà questo. Ela la ga dito: “Me piase parlar de queste robe cole sorele che le va insieme con mi far studi. Questo le giuta a interessarse de pi col studiante e anca saver cossa parlar nel stùdio.”

7. Parché che ghemo de pareciarse vanti de far un stùdio con nantro fradel?

⁷ Se qualchedun el te ga convidà par ndar insieme far un stùdio, saria meio pareciarte vanti. (Esdra 7:10) Dorin, che ghemo parlà vanti, el ga dito: “Me piase tanto quando quel che el va insieme l’è ben parecià. Cossita, lu el pol parlar robe che le giuta el studiante.” Quando tuti due i ze ben pareciadi, el studiante el pol imparar dei so esempi. Se te ghè poco tempo par pareciarte, sfòrsate  par torte el tempo par saver i punti prinsipai del stùdio.

8. Cossa che te ghè de far vanti de pregar nte un stùdio?

⁸ L’è tanto importante pregar a Dio nei studi bìblichi. Pol esser che el fradel che te ga convidà, el te domande par pregar a Geovà nel stùdio. Alora, l’è bon che te pensi vanti sora quel che te podarissi parlar par giutar el studiante. (Sal. 141:2) Varda cossa che ga sucedesto con Hanae, una sorela che la ze de star nel Giapon. Dele volte, la sorela che ghe fea stùdio la menea nantra sorela insieme. Fin ancoi, la se pensa de quel che quela sorela la parlea quando la preghea a Dio nel stùdio. Ela la ga dito: “Mi volea esser come ela parché mi vedea che la gavea una forte amicìssia con Geovà. Me piasea tanto quando la disea el me nome nele orassion.”

9. De acordo con Tiago 1:19, cossa che te pol far par giutar el fradel che el fà el stùdio?

⁹ Ghemo de giutar el fradel a far el stùdio. Omamuyovbi, una pioniera dela Nigèria la ga dito: “L’è bel quando quel che el vien insieme l’è atento e el fà boni comentari. Ma lu no’l parla massa parché el capisse che no l’è lu che l’è drio far el stùdio.” Alora, quando che ghemo de parlar qualcossa e cossa che ghemo de parlar? (Pro. 25:11) Resta atento quando el fradel e el studiante i ze drio discorer. (Ledi Tiago 1:19. *) Cossita, te sarè bon de parlar qualcossa nela ora giusta. Stà atento par no parlar massa, no parlar intanto che el fradel l’è drio spiegar qualcossa e no parlar de nantra roba. Ma cossa che te pol parlar? Te pol far una ilustrassion o una domanda che giute el studiante a capir meio quel che lu l’è drio imparar. Se te cati che no te sì bon de far queste robe, te pol lodar el studiante. Sicuro che lu el ndarà restar tanto contento.

10. Come parlar de quel che te ga belche sucedesto pol giutar el studiante?

¹⁰ Podemo parlar quel che ga belche sucedesto nela nostra vita. Noantri podemo parlar sora come che ghemo scominsià a studiar la Bìblia, come che ghemo infrontà una dificoltà o come che Geovà el ne ga belche giutà. (Sal. 78:4, 7) Fursi quel che noantri parlemo sìpia pròpio quel che el studiante el ga de bisogno. Par esémpio, pol esser che lo giute a far pi forte la so fede, a infrontar una dificoltà o a far i cambiamenti che el ga de bisogno par batesarse. (1 Pie. 5:9) Gabriel, un pioniero che l’è de star nel Brasil, el se pensa de quel che lo ga giutà quando el studiea la Bìblia. Lu el ga dito: “Quando mi  scoltea quel che i fradei i gavea infrontà, mi capia che Geovà el vede quel che infrontemo e che el ga interesse par noantri. Mi anca pensea che, se lori i ze stati boni de infrontar i so problemi, anca mi saria bon.”

11-12. Parché che ghemo de ricever tanto ben i studianti dela Bìblia nele riunion?

¹¹ El studiante el ga de ndar ale riunion par far pi forte la so fede e batesarse. (Ebr. 10:24, 25) Fursi, sarà el predicador che el fà el stùdio che el ndarà convidar el studiante par ndar ala prima riunion. Ma, dopo tuti i fradei i pol incoraiarlo a ndar sempre ale riunion. Come che podemo far questo?

¹² Ghemo de ricever ben i studianti. (Rom. 15:7) Se noantri ricevemo ben i studianti, fursi lori i sarà premosi de tornar ale riunion. Come che podemo farlo? Podemo saludar el studiante, farlo cognosser anca i altri fradei, ma de una maniera che no lo asse mia con vergogna. No ghemo de pensar che l’è el predicador che el fà el stùdio che ghe toca far questo, parché fursi lu no l’è ancora rivà o l’è drio tender de nantra roba. Intanto che el parla, ghemo de scoltarlo e mostrar che ghe volemo ben. Se femo questo, lu el pol sentirse come el fradel Dmitrii. Lu el se ga batesà pochi ani indrio e ancoi l’è servo ministerial. Varda cossa che el ga sentio quando l’è ndato ala prima riunion: “Mi era drio spetar fora del Salon del Regno e era tanto ansioso. Alora, un fradel el me ga visto e el me ga convidà par ndar rento el salon insieme. Mi son restà maraveià. Mi go pensà: ‘Me piaseria vegner tuti i giorni qua.’ Mai me gavea sentio tanto ben cossita.”

13. Parché che ghemo de esser boni esempi?

¹³ Ghemo de esser un bon esémpio. Quel che noantri femo pol assar el studiante pi sicuro che quel che lu l’è drio studiar l’è la verità. (Mat. 5:16) Vitalii, che la ze una pioniera nela Moldàvia, la ga dito: “Mi vedea come che i fradei i vivea, cossa che lori i pensea e cossa che lori i fea. Questo me ga assà sicura che le Testimònie de Geovà le fà quel che Dio el vol.”

14. Come che el to esémpio pol giutar un studiante?

¹⁴ Se un studiante el vol batesarse, prima el ga de meter in pràtica quel che lu el impara. L’è sicuro che no l’è mia fàcile far questo, ma quando el vede che metemo in pràtica i prinsipi dela Bìblia e che semo tanto felici par causa de questo, anca lu el gavarà voia de far compagno. (1 Cor. 11:1) Varda el esémpio de Hanae, che ghemo pena parlà. Ela la ga dito: “Mi vedea che i fradei i fea pròpio quel che mi era drio imparar dela  Bìblia. Mi go imparà a incoraiar ai altri, a perdonar e a mostrar amor ale persone. I fradei sempre i parlea robe bele un del altro e mi volea esser come lori.”

15. De acordo con Proverbi 27:17, parché che ghemo de esser amighi dei studianti?

¹⁵ Ghemo de esser amighi del studiante. Quando el studiante el va ale riunion, mostra che te ghe vol ben. (Fil. 2:4) Te pol anca torte tempo par discorer col studiante e se te ghe fè domande, stà atento par no assarlo con vergogna. Te pol anca lodarlo par i cambiamenti che lu l’è drio far, domandar sora el so stùdio dela Bìblia, la so fameia e el so laoro. Se te parli sora queste robe, sarà pi fàcile de gaver una bela amicìssia con lu e questo podarà giutarlo a batesarse. (Ledi Proverbi 27:17. *) Hanae che ghemo parlà vanti la ze pioniera regolar e la ga parlà sora quando la ga scominsià a ndar ale riunion. Ela la ga dito: “Quando mi go scominsià a ndar ale riunion, no go volesto pi fermarme par causa dei amighi che mi gavea fato. Anca quando mi era straca, me piasea tanto star insieme dei me amighi dela congregassion. Questo me ga giutà a assar de star insieme de quei che no i servia mia a Geovà. Cossita, mi volea esser cada volta pi amiga de Geovà e dei fradei dela congregassion. Alora, go volesto batesarme.”

16. Cossa che noantri podemo far par el studiante sentirse parte dela congregassion?

¹⁶ Quando el studiante el scomìnsia a far i cambiamenti nela so vita, ghemo de farlo sentirse parte dela congregassion. Par esémpio, podemo convidarlo par far qualcossa insieme de noantri. (Ebr. 13:2) Denis, che l’è de star nela Moldàvia, el se pensa de quando che el studiea la Bìblia. Lu el ga dito: “Tante volte, i fradei i convidea mi e la me dona par far robe insieme. Lori i parlea sora come che Geovà li gavea belche giutà. Questo ne ga assà sicuri che voléino servir a Geovà e che podarìano gaver una vita felice.” Quando el studiante el scomìnsia a ndar nela predicassion, noantri podemo ciamarlo par ndar insieme de noantri.” Diego, che l’è un predicador del Brasil, el ga dito: “Tanti fradei i me ga convidà par laorar insieme nela predicassion. L’è stato tanto bel parché se ghemo cognossesto meio. Mi go anca imparà tante robe e go fato pi forte la me amicìssia con Geovà e con Gesù.”

17. Come che i ansiani i pol giutar i studianti dela Bìblia?

¹⁷ Gavé de torve el tempo par giutar i studianti. Ansiani, el amor e el interesse che  mostré par i studianti i ndarà giutarli a voler batesarse. Alora, sfòrsate par torte el tempo par parlar coi studianti vanti e dopo dele riunion. Quando lori i comenta nele riunion, ciàmali par nome, cossita lori i va capir che i ze importanti par la congregassion. Dele volte, proa ndar insieme con un predicador che el ga un stùdio. L’è sicuro che el studiante el restarà tanto contento! Jackie, che la ze una pioniera dela Nigèria, la ga dito: “Tanti studianti i resta maraveiadi quando i sa che un ansiano l’è ndato insieme par far el so stùdio. Una volta un studiante el me ga dito: ‘El pastor dela me ciesa mai ndaria far questo. Lu el fà vìsite sol par quei che i ze siori parché i ghe dà soldi.’” Adesso el studiante el va ale riunion.

18. Come i ansiani i pol far quel che dise in Ati 20:28?

¹⁸ Gavé de giutar e incoraiar quei che i ga studi bìblichi. I ansiani i ga la granda responsabilità de giutar i fradei a predicar e insegnar ben. (Ledi Ati 20:28. *) Come che lori i pol far questo? Lori i pol domandar ai fradei se i pol ndar insieme nei so studi. Se un fradel el ga vergogna de dar el stùdio insieme con un ansiano, el ansiano el pol farlo. Jackie, la sorela che ghemo parlà vanti, la ga dito: “I ansiani sempre i me domanda sora i me studianti. E quando go qualche dificoltà, lori i me giuta.” Questo el mostra che i ansiani i pol incoraiar tanto quei che i insegna la Bìblia ai altri. (1 Tes. 5:11) Jackie la ga dito anca: “Lori i dise che el me laoro l’è importante e me sinto incoraiada. L’è come se fusse drio bever un bicier de àqua freda nte un giorno caldo. Quando lori i me loda, mi resto pi sicura e anca pi contenta de far i studi.” — Pro. 25:25.

19. Che alegria tuti noantri podemo sentir?

¹⁹ Anca che no te gàpia un stùdio dela Bìblia, te pol giutar i studianti dei altri fradei a batesarse. Come? Se te vè insieme con qualche fradel far un stùdio, paréciate ben par parlar robe che giute el fradel. Anca stà atento par no parlar massa. Quando el studiante el scomìnsia a ndar ale riunion fà amicìssia e sìpia un esémpio par lu. Se te sì un ansiano, sfòrsate par torte el tempo par incoraiar i studianti dela Bìblia. Te ghè anca de torte el tempo par giutar e lodar i fradei che i ga studi dela Bìblia. Alora, se noantri femo queste robe, podemo sentir la alegria de giutar una persona a amar e a servir a Geovà.