1. Come la ze la persona misericordiosa, e che ilustrassion la ne giuta a imparar sora questa qualità?

QUANDO pensemo in qualchedun che l’è misericordioso, imaginemo qualchedun bondoso, amoroso, generoso e che el ga compassion. Fursi anca se ricordemo dela ilustrassion de Gesù sora el bon samaritano. Lu no l’era giudeo e el ga tendesto del omo che l’era giudeo. Le persone le gavea dato bote a questo omo giudeo e lo gavea ciavà. Ma el bon samaritano l’è stà misericordioso con lu e lo ga tendesto con amor. (Luc. 10:29-37) Podemo imparar tanto sora la misericòrdia in questa ilustrassion. La misericòrdia la ze una bela qualità de Geovà e lu la mostra tuti i giorni e de arquante maniere. Lu el fà questo parché el ne ama.

2. De che nantra maniera se pol mostrar misericòrdia?

² Ghen’è nantra maniera de mostrar misericòrdia. Par esémpio, pol esser che la persona misericordiosa la dessida no dissiplinar a qualchedun, anca che el merite. Alora, podemo dir che Geovà l’è tanto misericordioso parché “no’l ne trata de acordo coi nostri pecati”. (Sal. 103:10) Ma, dele volte, Geovà el dissiplina a una persona che la ga fato un pecato.

3. Cossa che ndaremo imparar in questo stùdio?

³ In questo stùdio, ndaremo veder le risposte dela Bìblia a queste domande: ‘Parché che Geovà el mostra misericòrdia? Sarà che se pol dissiplinar a qualchedun e anca cossita esser misericordioso? Cossa che pol giutarne a esser misericordiosi?’

4. Parché che Geovà l’è misericordioso?

⁴ Geovà el ama esser misericordioso. El apòstolo Paolo el ga  dito che Dio el mostra tanta misericòrdia. Anca se Paolo el fusse drio parlar de quei che i ndarà viver nel cielo, Geovà no l’è misericordioso sol con lori. (Efe. 2:4-7) Davi el ga scrito: “Geovà l’è bon con tuti e se vede la so misericòrdia in tuto quel che el fà.” (Sal. 145:9) Geovà el ama a tuti, par quela, lu el fà sempre quel che el pol par esser misericordioso con noantri.

5. Come Gesù el ga imparà dela misericòrdia de Geovà?

⁵ Gesù l’è quel che el cognosse de pi a Geovà, e el sa che lu el ama esser misericordioso. Vanti de vegner ala Tera, Gesù el ga vivesto tanto tempo con so Pare nel cielo. (Pro. 8:30, 31) Gesù sempre lo vedea mostrar misericòrdia ai umani pecadori. (Sal. 78:37-42) E quando Gesù l’era qua nela Tera, lu sempre el parlea de questa bela qualità de so Pare.

6. Che ilustrassion de Gesù la ne giuta a capir la misericòrdia de Geovà?

⁶ Nel primo stùdio, ghemo parlà sora la ilustrassion de Gesù del fiol che l’è ndato via de casa. Lu el ga contà questa ilustrassion par insegnarne che Geovà el ama esser misericordioso. El fiol dela ilustrassion el ga magnà fora tuto quel che el gavea e el ga fato bruti pecati. (Luc. 15:13) Dopo de un tempo, lu el se ga ciamà gramo, el se ga umilià e l’è tornà casa. Ma cossa che so pare el ga fato? Gesù el ga dito: ‘Quando lu no l’era gnancora rivà, so pare lo ga visto e el ghe ga fato pecà. Lu l’è ndato de carera e el ghe ga dato un strucon e lo ga basà con tanto amor.’ Invesse de dirghe su, el pare l’è stà misericordioso, el ga perdonà el so fiol e l’è restà tanto contento de gaverlo casa. El fiol el gavea fato bruti pecati, ma el se ga ciamà gramo, e so pare lo ga perdonà. Geovà el fà compagno a questo pare. Par meso de questa ilustrassion, Gesù el ga mostrà che Geovà el vol tanto perdonar quei che i se ciama grami. — Luc. 15:17-24.

7. Come vedemo la sabedoria de Geovà quando el mostra misericòrdia?

⁷ Geovà l’è misericordioso parché el ga tanta sabedoria. Lu el dopera la sabedoria par far le dessision che le sìpia el meio par tuti. La Bìblia la dise che la sabedoria de Geovà la ga tanta misericòrdia e la fà tante robe bone. (Tiago 3:17) Geovà l’è come un Pare amoroso. Alora lu el sa che quando el mostra misericòrdia ai so fioi, lu l’è drio far quel che l’è meio par lori. (Sal. 103:13; Isa. 49:15) Par causa dela so misericòrdia, lu el ne dà una bela speransa par el futuro. Alora, par causa dela so sabedoria, Geovà l’è misericordioso sempre che el pol. Ma anca el sa quando no’l ga de mostrar misericòrdia. Par esémpio, lu no’l mostra misericòrdia quando una persona la mèrita ricever una dissiplina.

8. Cossa che sucede se una persona la desside seitar a far un bruto pecato, e parché?

 ⁸ Metemo dir che un fradel el desside seitar a far un bruto pecato. Cossa che ghemo de far? Par meso del spìrito santo, Paolo el ga scrito che gavarìssino de assar de star insieme con questa persona. (1 Cor. 5:11) Quei che i ga fato bruti pecati e no i se ga ciamà grami no i pol pi esser Testimònie de Geovà. Parché? Parché questo dà protession a quei che i ze fedeli, e parché volemo esser santi come Geovà. Ma arquanti i pensa che Dio no l’è drio mostrar misericòrdia quando qualchedun no’l pol pi esser Testimònia de Geovà. Ma sarà che l’è pròpio cossita?

9-10. Quando qualchedun l’è dissiplinà questo mostra la misericòrdia de Geovà par lu e par la congregassion. De acordo con Ebrei 12:5, 6, parché che podemo dir questo?

⁹ Restemo tanto disgustadi quando savemo che qualchedun che amemo no l’è pi Testimònia de Geovà. Fursi, se domandemo se el gavea pròpio bisogno de esser dissiplinà cossita. Ma, questa la ze una maniera che Geovà el mostra misericòrdia. Come cossita? Parché no dissiplinar a qualchedun che el ga de bisogno no’l mostra sabedoria, misericòrdia e gnanca amor. (Pro. 13:24) Questo pol giutar la persona che la ga fato el sbàlio a ciamarse grama e a fermarse de farlo. Tanti che i ga fato un bruto sbàlio i ga dito che la dissiplina dei ansiani l’era pròpio quel che i gavea de bisogno par cambiar e tornar a Geovà. — Ledi Ebrei 12:5, 6. *

¹⁰ Quando una persona no la pol pi esser Testimònia de Geovà, questo anca prova la misericòrdia de Geovà par la congregassion. Come cossita? Pensemo nte una ilustrassion. Un pastor el vede che una dele so piégore la ze malada. Par causa de questa malatia, lu el gavarà de tirarla via de in meso le altre. Ma come savemo, le piégore no le ghe piase star lore sole. Alora, sarà che un pastor l’è rugno se el tira via questa piégora de in meso le altre? Nò! Parché el sa che, se la piégora malada la resta insieme cole altre, tute le restarà malade. Cossita, lu l’è drio proteger tute le piégore. — Vedi anca Levìtico 13:3, 4.

11. (a) Parché una persona che no la ze pi Testimònia de Geovà la ze come una piégora malada? (b) Cossa che una persona che no la ze pi Testimònia de Geovà la pol far, e che aiuto la pol gaver?

¹¹ Quando i ansiani i desside che una persona no la pol pi esser una Testimònia de Geovà, ghemo de vederla come una piegoreta malada. Parché? Parché no la ga pi una forte amicìssia con Geovà. (Tiago 5:14) Tante persone le ga una malatia che le pol passarla ai altri. La medèsima roba la sucede con una persona che no la ga pi una forte amicìssia con Geovà. Se la resta insieme coi altri, pol esser che i altri i ghe vae drio. Par quela che questa persona no la pol pi star insieme dei altri fradei. Cossita, Geovà el mostra amor a quei che i ze fedeli e el giuta la persona che la ga fato el sbàlio a ciamarse grama e a cambiar. Ma questa persona ancora la pol far tante robe. Par esémpio, la pol ndar ale riunion e far pi forte la so fede. La pol anca ciapar le publicassion, studiarle e vardar JW Broadcasting^®. Quando i ansiani i vede che la ze drio cambiar quel che ghe ocore, lori i pol darghe consili par giutarla. Cossita, la podarà tornar a gaver una amicìssia con Dio e a esser una Testimònia de Geovà. *

12. Come che i ansiani i pol mostrar amor e misericòrdia a una persona che la ga fato un pecato e no la se ga ciamà grama?

 ¹² I ansiani i ama tanto i fradei e no i vol far gnente che possa intrigar la amicìssia de lori con Geovà. Lori anca i sa che i ga de pensar ben vanti de dessider che una persona no la pol pi esser Testimònia de Geovà, e che i ga de dissiplinar dela maniera giusta. (Ger. 30:11) Ma, i ansiani sol i ndarà dessider che una persona no la pol pi esser Testimònia de Geovà se la ga fato un pecato e no la se ga ciamà grama. Alora, dele volte, la meio maniera de mostrar amor e misericòrdia a questa persona la ze dessider che no la pol pi esser Testimònia de Geovà par un tempo.

13. Parché che un fradel de Corinto no’l podea pi far parte dela congregassion?

¹³ Varda cossa el apòstolo Paolo el ga fato quando un fradel de Corinto l’era drio far un bruto pecato e no’l se gavea ciamà gramo. Questo omo l’era drio far imoralità sessual cola sposa de so pare. Che roba bruta! Geovà el gavea belche dito ai israeliti: “Se un omo el fà relassion sessuai cola dona del so pare, questo saria una vergogna par so pare. Alora, tuti due i gavarà de esser copadi.” (Lev. 20:11) L’è vera che Paolo no’l podea mandar coparlo, ma Paolo el ga dito ai fradei de Corinto che quel omo no’l podea pi far parte dela congregassion. Parché? Parché tanti fradei i ga scominsià a dir che quel che el omo l’era drio far no l’era una roba tanto sbaliada cossita. — 1 Cor. 5:1, 2, 13.

14. Come Paolo el ga mostrà misericòrdia a un omo, e parché che el ga fato questo? (2 Corinti 2:5-8, 11)

¹⁴ Dopo de un tempo, Paolo el ga savesto che quel omo el se gavea ciamà gramo e che el gavea cambià. L’è vero che quel che el ga fato ga assà i fradei disgustadi, ma Paolo el ga dito ai ansiani che no’l volea esser massa rugno. Lu el ghe ga dito: “Gavé de perdonarlo con bontà e consolarlo, parché lu no’l sìpia vinsesto par la so tristesa.” Paolo el ghe ga fato pecà de quel omo. Paolo no’l volea che lu el restesse massa triste, e par causa de questo, el se fermesse de sforsarse par gaver el perdon de Dio. — Ledi 2 Corinti 2:5-8, * 11. *

15. Come i ansiani i pol dissiplinar e esser misericordiosi?

 ¹⁵ Come Geovà, i ansiani i ama esser misericordiosi. Lori i dà la dissiplina quando ghe ocore, ma i ze misericordiosi sempre che i pol. Lori i sa che i ze drio mostrar misericòrdia se i dissiplina a qualchedun che el ga de bisogno. Se no i fesse questo, lori saria drio mostrar che la persona che la ga fato el sbàlio la podaria seitar a farlo. Sarà che sol i ansiani i ga de esser misericordiosi?

16. De acordo con Proverbi 21:13, cossa che Geovà el fà quando qualchedun no’l mostra misericòrdia?

¹⁶ Tuti noantri volemo mostrar misericòrdia come Geovà. Parché? Par causa de arquante robe. Par esémpio, Geovà no’l scolta le orassion de quei che no i ze misericordiosi, e mai volemo che questo suceda con noantri. (Ledi Proverbi 21:13. *) Alora, volemo sempre sforsarse par esser misericordiosi. Volemo sempre scoltar un fradel che l’è drio sofrir. Noantri anca volemo esser misericordiosi parché savemo quel che dise el testo de Tiago 2:13. Questo testo el dise: “Parché quel che no’l dimostra misericòrdia, el sarà giudicà sensa misericòrdia.” Se semo ùmili e se ricordemo che ghemo sempre bisogno dela misericòrdia dei altri, anca noantri volaremo mostrar misericòrdia ai altri. Par esémpio, quando una persona, che la ga fato un bruto sbàlio, la se ciama grama e la torna a esser una Testimònia de Geovà.

17. Come el rè Davi el ga mostrà che l’era misericordioso?

¹⁷ Nela Bìblia, ghen’è tanti esempi che i ne giuta a esser misericordiosi. Un de questi esempi l’è del rè Davi. Lu l’è stà misericordioso tante volte. Par esémpio, quando el rè Saul el volea coparlo, Davi l’è stà misericordioso col rè scoliesto de Dio. Lu no’l ga mai volesto farghe mal e gnanca vingarse de lu. — 1 Sam. 24:9-12, 18, 19.

18-19. Davi no l’è stà sempre misericordioso. Parla de due esempi.

¹⁸ Ma arquante volte, Davi no’l ga mostrà misericòrdia. Par esémpio, Nabal, che l’era un omo rugno, el ghe ga dito su a Davi e no’l ghe ga dato de magnar a lu e ai so òmini. Alora, Davi l’è restà tanto cativo e el ga volesto copar a Nabal e a tuti i òmini dela so casa. Ma, Abigail, che la era la sposa de Nabal, la era bondosa e la ga mostrà tanta passiensa parché suito la ga fato qualcossa de magnar par lori. Alora, Davi no’l ga copà Nabal e i so òmini. — 1 Sam. 25:9-22, 32-35.

¹⁹ Varda anca nantra roba che ga sucedesto con Davi, e lu no’l ga mostrà misericòrdia. Natan el ga contà una ilustrassion sora un omo sior che el gavea ciavà una piégora del so visin che l’era poareto. Davi l’è restà tanto cativo e el ga dito che sicuro che quel omo el gavea de morir. (2 Sam. 12:1-6) Davi el cognossea tanto ben la Lege mosaica, alora el savea che un omo che el ciavesse una piégora el gavaria de darghe quatro indrio, e nò esser morto. (Éso. 22:1) Ma, parché che Davi el ga dito che quel omo el  gavaria de esser morto? Parché Davi no l’era drio giulgar dela maniera giusta. Natan sol el ga contà quela ilustrassion par mostrar che Davi el gavea fato sbali tanto pi bruti e che Geovà el ghe gavea mostrà tanta misericòrdia. Ma, Davi no l’era drio mostrar misericòrdia al omo dela ilustrassion de Natan! — 2 Sam. 12:7-13.

20. Cossa che el esémpio de Davi el ne insegna?

²⁰ Come ghemo visto, Davi l’è restà inrabià e el ga volesto copar Nabal e i so òmini. Dopo, quando Natan el ghe ga contà la ilustrassion sora el omo che el ga ciavà una piégora del so visin, Davi el ga dito che questo omo el meritea morir. Quando scoltemo quel che Davi el volea far col omo, fursi pensemo: ‘Parché che Davi, che l’era bondoso, lo ga giulgà de questa maniera?’ Proa ricordarte de quel che gavea pena sucedesto con Davi. In quela època, lu l’era drio sentir colpa parché el gavea fato una roba sbaliada. Cossa che imparemo de questo? Se qualchedun el giulga i altri de maniera rugna, questo mostra che la so amicìssia con Geovà no la ze mia forte. Gesù el ga dito che i so dissìpoli i gavea de star atenti par nò giulgar i altri, parché dela medèsima maniera che i giulghesse, lori i saria giulgadi. (Mat. 7:1, 2) Ghemo de sforsarse par no esser rugni, ma esser tanto misericordiosi come el nostro Dio.

21-22. Come podemo mostrar che semo misericordiosi?

²¹ La persona che la ze misericordiosa la resta disgustada de veder che qualchedun l’è drio sofrir, ma anca la fà qualcossa par giutarlo. Alora, tuti ghemo de star atenti se qualchedun dela nostra fameia, nela congregassion o ndove semo de star el ga bisogno de aiuto. Cossita, saveremo come giutar. Podemo domandarse: ‘Sarà che qualchedun el ga bisogno de aiuto par far de magnar o nantra roba? Cognossemo qualchedun che el ga bisogno de consolo? Sarà che un fradel che l’è torna a esser Testimònia de Geovà el ga bisogno che lo consolemo e lo incoraiemo? Sarà che podarìssino consolar le persone ndove predichemo cole bone notìssie?’ Sicuro che questa la ze una bela maniera de mostrar misericòrdia ale persone. — Giò 29:12, 13; Rom. 10:14, 15; Tiago 1:27.

²² Se stemo atenti a quel che i altri i ga de bisogno, sarà pi fàcile saver come mostrarghe misericòrdia. Quando mostremo questa qualità, assemo contento el nostro Pare Geovà, che l’è tanto misericordioso!