I Studianti dela Bìblia i era drio predicar cada volta de pi. Par quela, ghe ocorea de pi publicassion. Ma nel Betel de Brooklyn sol se stampea le reviste parché i libri i era stampadi nte una gràfica de fora. Par un per de mesi, questa gràfica la se ga ciapà indrio de stampar i libri. Cossita, la predicassion no la era drio ndar avanti come la gavaria de ndar. Alora, el fradel Rutherford el ga domandà a Robert Martin, che l’era el fradel che el tendea dela gràfica de Betel, par veder se lori i podaria scominsiar a stampar i libri rento de Betel.

El fradel Martin el ga dito che l’era una roba pròpio de maraveiarse parché lori i saria boni de far un libro del scomìnsio al fin. Lori i ndaria pareciar quel che ocorea par stampar, dopo i ndaria stampar e tacar le foie tute insieme par farle deventar un libro. Alora lori i ga ciapà un posto in Brooklyn e i ga comprà le màchine che i gavea de bisogno.

Ma gnanca tuti i era contenti con quela idea. El paron dela gràfica che la fea i nostri libri l’è ndato veder la nostra gràfica. Lu el ga dito: “La vostra gràfica la ze pròpio bela. Ma nissuni de valtri savé come doperar queste màchine qua. Alora, de qua sei mesi, sarà tuto un pòcio.”

El fradel Martin el ga dito: “Ne parea che el gavesse rason, ma el se ga desmentegà del Signor. E Geovà sempre l’è stà con noantri.” Geovà li ga pròpio giutadi parché, in poco tempo, i era drio far 2 mila libri par giorno.

Dopo che la organisassion de Geovà la ga tacà stampar i so libri, la ga anca scominsià a predicar par meso del ràdio. Nel giorno  26 de febraro de 1922, nte una doménega dopo mesdì, el fradel Rutherford el ga parlà nel ràdio par la prima volta. Lu el ga fato el discorso “Milioni che adesso i vive mai i morirà”, nela ràdio KOG, che la era de Los Angeles, Califòrnia.

Intorno de 25 mila persone le ga scoltà el fradel Rutherford, e arquante de lore le ga scrito carte par ringrassiarlo. Par esémpio, Willard Ashford, de Santa Ana, Califòrnia, el ga scrito una carta par dirghe al fradel Rutherford che so discorso l’è restà pròpio bel. Dopo el ga spiegà: “Anca se el discorso fusse stà darente de casa, no podarìssino mai esser ndati parché ghen’era tre persone malade qua casa.”

Altri discorsi i ze stati fati nele stimane dopo. La revista Torre de Vigia, che adesso la ze la Sentinela, ga scrito che “in quel ano intorno de 300 mila persone le ga scoltà i discorsi par meso del ràdio”.

Le persone le ghe ga piasesto tanto de scoltar i discorsi. Par quela, i Studianti dela Bìblia i ga dessidio far su una stassion de ràdio in Staten Island, che l’era darente del Betel de Brooklyn. De lì avanti, i fradei i ga doperà la ràdio WBBR par tanti ani par predicar el messàgio del Regno.

La revista Torre de Vigia de 15 de giugno de 1922 la ga dito che ghen saria un grando congresso nei giorni 5 a 13 de setembre de quel ano, in Cedar Point, Ohio. Quando i Studianti dela Bìblia i ze rivadi in quel congresso i era tuti pròpio contenti.

Nel primo discorso, el fradel Rutherford el ga dito: “Mi son sicuro che Dio el ndarà benedir questo congresso, e cossita, un grando testimònio sarà dato in tuta la Tera.” Tuti quei che i ga fato i discorsi ga incoraià i fradei a predicar ancora de pi.

Alora, nel vendre, 8 de setembre, el posto del congresso l’era pròpio pien de gente. Ghen’era intorno de 8 mila persone premose par scoltar el discorso del fradel Rutherford e saver cossa volea dir le letere ADV, che le era nel convite. Fursi, arquante le  gàpie visto che ghen’era anca una lona intorciada su de sora del palco. El fradel Arthur Claus l’era vegnesto de Oklahoma par scoltar quel congresso. E, ancora che no ghen fusse micròfono o casse de son, lu l’è stà bon de ciapar un bon posto de ndove se scoltea ben el discorso.

Par giutar tuti a star atenti al discorso, un fradel el ga dito che nissuni i podaria ndar rento intanto che el fradel Rutherford el fusse drio far el so discorso. Alora, ale 9:30 de matina, lu el ga scominsià el so discorso con quel che Gesù el ga dito in Mateo 4:17: ‘El Regno del cielo l’è darente.’ Quando el ga spiegà come le persone le ndaria scoltar sora questo Regno, lu el ga dito: “Gesù el ga dito che quando el vegnaria, el ndaria far una racolta, o sia, scòlier i so dissìpoli veri e leai.”

El fradel Claus l’era sentà do e el ga visto come tuti i era pròpio atenti al discorso. Ma de colpo lu no’l se ga mia sentio ben e ghe ga tocà ndar fora, anca se el savesse che no’l podaria pi tornar indrio.

Dopo de arquanti minuti, lu el se sentia meio. Alora, el ga scoltà le persone bater le man e ghe ga dato tanta voia de saver cossa che el fradel Rutherford l’era drio dir. El fradel Claus el gavea 23 ani e l’è stà bon de catar una maniera de ndar su fin el cuerto ndove el ga catà una finestra verta par ndar rento. Lì lu el ga visto che el podea scoltar el discorso pròpio ben.

Ma, Arthur no l’era mia lu sol. Ghen’era arquanti dei so amighi lì nel querto. E un de lori, Frank Johnson, el ghe ga domandà: “Gheto una rìncia lì?”

E Arthur el ga dito: “Sì, ghenò.”

Frank el ga dito: “Èrino drio pregar par catar qualchedun che gavesse una rìncia. Varda, lì ghen’è questa lona intorciada che  la ze ligada in questi ciòdi. Alora, stà atento che quando el Giuis a el dise: ‘Proclamé, proclamé!’, te ghè de taiar queste quatro soghe.”

Quando Rutherford l’è rivà nela parte importante del so discorso, Arthur l’era pronto cola rìncia in man. El fradel Rutherford l’era pròpio contento quando el ga dito: “Gavé de esser testimònie fedele del Signor. Ndé avanti fin che Babilònia la sìpia finida fora. Proclamé el messàgio da par tuto. El mondo el ga de saver che Geovà l’è Dio e che Gesù Cristo l’è el Rè dei rè e Signor dei signori. Questa la ze la època pi importante. El Rè l’è drio governar e valtri sì stati scoliesti par parlar de questo Regno a tuti. Par quela, proclamé, proclamé, proclamé, el Rè e el so Regno!”

Arthur el ga dito che lu e i altri fradei i ga taià le soghe e la granda lona la se ga destorcià. Cossita, tuti i ga visto quel che l’era scrito: “Proclamé el Rè e el so Regno.” Alora, tuti i ga savesto cossa volea dir le letere ADV, o sia, “Proclamé” in inglese.

El congresso in Cedar Point el ga giutà i fradei a consentrarse de pi nel laoro de predicassion. E quei che i era disposti i ga bio caro de giutar in questo laoro. Par esémpio, un colportor (come se ciamea i pionieri) de Oklahoma, Stati Unidi, el ga scrito: “Noantri ndemo predicar nte un posto ndove le persone le laora nele mine de carvon e lore le ze pròpio poarete.” Lu el ga dito che quando lore le scolta quel che dise nela revista a Idade de Ouro, tante le se mola a piander. Lu el ga anca dito: “Par mi, l’è pròpio bel consolar queste persone.”

Quei Studianti dela Bìblia i ga visto come l’era importante quel che Gesù el ga dito in Luca 10:2: ‘La racolta la ze pròpio granda ma i laoradori i ze pochi.’ Cossita, nel fin del ano 1922, lori i era pi dessididi che mai a parlar del Regno in tuta la Tera.