1. Quando che podemo desmentegarse che servir a Geovà l’è la roba pi importante?

QUANDO ti te pensi che l’è pi difìcile de servir a Geovà? Quando te sì drio infrontar problemi o quando l’è tuto a posto? Quando passemo par qualche dificoltà, suito ndemo in serca del aiuto de Geovà. Ma quando che l’è tuto a posto nela nostra vita, podemo desmentegarse che servir a Geovà l’è la roba pi importante. Geovà el ga dito ai israeliti che questo podaria suceder. — Deu. 6:10-12.

2. Parché che el rè Asa l’è un bon esémpio?

² El rè Asa l’è un bel esémpio parché el ga fato le so dessision con sabedoria. Asa el se ga sempre fidà in Geovà e el ga servio nei tempi difìcili ma anca nei tempi de pace. Lu el ga sempre servio a Geovà ‘de tuto el cuor’. (1 Rè 15:14, nota) Asa el ga mostrà che el volea contentar a Geovà quando el ga finio fora cola adorassion falsa in Giudà. La Bìblia la dise che el ga ‘tirà via i altari dei dèi stranieri, i posti ndove i adorea falsi dèi, el ga finio fora cole colone sacre e el ga trato do i palanchi sacri’. (2 Cró. 14:3, 5) Asa el ga fin tirà via la so nona Maacà dela posission importante che la gavea. Parché? Parché la disea ale persone par adorar un falso dio. — 1 Rè 15:11-13.

3. Cossa che ndaremo imparar in questo stùdio?

³ Asa el ga finio cola adorassion falsa in Giudà e el ga anca incoraià el pòpolo tornar a adorar a Geovà dela maniera giusta. Alora, Geovà li ga benedio con 10 ani de pace. (2 Cró. 14:1, 4, 6) In questo stùdio, ndaremo veder come che Asa el ga doperà ben questo tempo de pace. Ndaremo anca imparar col esémpio dei cristiani del primo sècolo che i ga  doperà ben la so libertà. Dopo, ndaremo risponder la domanda: Se te sì de star nte un paese che te sì lìbero par servir a Geovà, come che te pol doperar ben questa libertà?

4. De acordo con 2 Cróniche 14:2, 6, 7, come che Asa el ga doperà ben el tempo de pace?

⁴ Ledi 2 Cróniche 14:2, * 6, 7. * Asa el ga dito al pòpolo che ‘Geovà el ghe gavea dato pace’. Ma Asa no’l pensea che l’era un tempo par restar sensa far gnente. Invesse, lu el ga doperà el tempo par far su cità, muri, tore e portoni. Asa el ga dito ai israeliti: “Questa tera ancora la ze nostra.” Cossa che lu el volea dir? Che el pòpolo l’era lìbero e che el podea laorar sensa la oposission dei nemighi. Par quela che Asa el ga incoraià el pòpolo a doperar ben el tempo de pace.

5. Parché che Asa el ga fato pi forte el so esèrsito?

⁵ Asa el ga doperà el tempo de pace par far pi forte el so esèrsito. (2 Cró. 14:8) Ma questo no volea dir che lu no’l gavea fede in Geovà. Parché? Parché Asa el savea che, come rè, el gavea de pareciar el pòpolo par qualche dificoltà che podaria suceder. Lu el savea che quel tempo de pace in Giudà el ndaria finirse e l’è pròpio questo che ga sucedesto.

6. Come che i cristiani del primo sècolo i ga doperà ben la so libertà?

⁶ I primi cristiani i ga infrontà tanta perseghission, ma anca i ga bio tempi de libertà par predicar. Cossa che i dissìpoli i fea  quando i era lìberi? Lori i doperea ben el tempo che i gavea par predicar le bone notìssie sensa fermarse. El libro de Ati el dise che questi òmini e done fedeli i vivea de acordo cola volontà de Geovà. Lori i seitea predicar le bone notìssie, par quela che cada volta pi persone le acetea servir a Geovà. Sicuro che Geovà el ga benedio el sforso de questi cristiani. — Ati 9:26-31.

7-8. Come che Paolo e altri cristiani i ga doperà ben le oportunità che i ga bio? Spiega.

⁷ I cristiani del primo sècolo i ga doperà ben tute le oportunità par predicar le bone notìssie. Par esémpio, el apòstolo Paolo el savea che el gavea tanto laoro de far in Èfeso. Alora, el ga doperà ben la oportunità par predicar e far dissìpoli in quela cità. — 1 Cor. 16:8, 9.

⁸ Dopo dela dessision sora la sirconsision nel ano 49 D.C., Paolo e altri cristiani i ga bio ancora de pi oportunità par predicar. (Ati 15:23-29) Quando Paolo e altri cristiani i ga dito ale congregassion la dessision sora la sirconsision, i dissìpoli i ga laorà tanto par parlar ‘dele bone notìssie dela Parola de Geovà’. (Ati 15:30-35) Cossa che ga sucedesto dopo? La Bìblia la dise che ‘cada volta de pi persone imparea la verità e i fradei i gavea una fede cada volta pi forte’. — Ati 16:4, 5.

9. (a) Cossa che i fradei i pol far in tanti paesi? (b) Che domanda ghemo de farse?

⁹ Ancoi, i fradei i ze lìberi par predicar in tanti paesi. Se te sì lìbero par adorar a Geovà, domàndate: ‘Come son drio doperar questa libertà?’ In questi ùltimi giorni, la organisassion de Geovà la ze drio far el pi grando laoro de predicassion e insegno del mondo. (Mar. 13:10) Noantri podemo giutar tanto in questo laoro.

10. Cossa che 2 Timòteo 4:2 incoraia noantri a far?

¹⁰ Noantri ghemo de doperar ben el tempo de libertà che ghemo par predicar. (Ledi 2 Timòteo 4:2. *) Proa pensar come che la ze la to vita adesso e domàndate: Sarà che mi o qualchedun dela me fameia pol laorar de pi nela predicassion e fursi esser pioniero? Ghemo de ricordarse che adesso no l’è ora de imuciar su soldi e far capital, parché queste robe le ndarà finirse con questo mondo de Sàtana. — Pro. 11:4; Mat. 6:31-33; 1 Gio. 2:15-17.

11. Cossa che tanti fradei i ze drio far par predicar le bone notìssie?

¹¹ Cossa che tanti predicadori i ze drio far par predicar i insegnar ale persone? Tanti i ze drio imparar una nova léngua. La organisassion de Geovà la ze drio giutar questi fradei par meso de publicassion in tante léngue. Par esémpio, nel ano de 2010 la organisassion de Geovà la ga fato publicassion in 500 léngue e ancoi in de pi de 1.000!

12. Sarà che l’è pi fàcile una persona imparar la verità se la scolta nela so léngua? Daghe un esémpio.

¹² Cossa che te cati de imparar una nova léngua par giutar le persone a imparar sora Geovà? Sarà che l’è pi fàcile una persona imparar la verità se la scolta nela so léngua? Sicuro che si, parché tante persone le ze bone de capir meio quel che la Bìblia la dise nela so léngua. Varda el esémpio de una sorela che la ze ndata nte un congresso nei Stati Unidi. El congresso l’era nela so léngua, el quiniaruanda che l’è pi parlà in Ruanda, nela Repùblica Democràtica del Congo e  nela Uganda. Dopo del congresso la sorela la ga dito: “Fà belche 17 ani che son de star nei Stati Unidi, ma questa la ze stata la prima volta che mi go capio tuto quel che go scoltà nel congresso.” Sicuro che questa sorela la ze restada tanto contenta de scoltar tuto el congresso nela so léngua. Alora, se te vol imparar nantra léngua, sicuro che te gavarè de far sforso ma te gavarè anca tanta alegria!

13. Come che i nostri fradei dela Rùssia i ga doperà ben la libertà che i gavea?

¹³ Tanti fradei no i ga libertà par predicar parché el governo el va contra lori. Par esémpio, i nostri fradei dela Rùssia i ga infrontà perseghission par tanti ani, ma in marso de 1991 lori i ga bio la libertà par adorar a Geovà. In quel tempo, lori i era in 16 mila predicadori nela Rùssia. Vinte ani dopo, ghen’era de pi de 160 mila predicadori lì. Cossita vedemo che i nostri fradei i ga mostrà sabedoria parché i ga doperà la so libertà par predicar. Ancora che la so libertà la se ga finio, lori i ga seità a far tanto sforso par predicar e ancora i fà tuto quel che i pol par adorar a Geovà.

14-15. Come che Geovà el ga protegesto el so pòpolo?

¹⁴ Nela època de Asa, el tempo de pace el se ga finio parché un esèrsito che el gavea de pi de 1 milion de soldadi l’è vegnesto dela Etiòpia. El comandante Zerà l’era sicuro che el so esèrsito el ndaria vinser la nassion de Giudà. Ma el rè Asa no’l gavea paura de quel esèrsito parché el se fidea in Geovà. Asa el ga pregà: ‘Ò Geovà, nostro Dio, giùtane parché se fidemo in ti e semo vegnesti contra questo esèrsito col to nome.’ — 2 Cró. 14:11.

¹⁵ El esèrsito dela Etiòpia l’era due volte pi grando che quel de Asa, ma el rè Asa l’era  sicuro che Geovà el gavea el poder e la capacità par proteger el pòpolo de Giudà. E l’è stà pròpio questo che Geovà el ga fato parché i soldadi dela Etiòpia i ga perso la guera. — 2 Cró. 14:8-13.

16. Come che savemo che el nostro tempo de libertà el ndarà finirse?

¹⁶ Noantri no savemo tuto quel che ndarà suceder nel futuro con cada un de noantri. Ma semo sicuri che qualche libertà che ghemo adesso la ndarà finirse. Parché? Gesù el ga dito che i so dissìpoli i saria “odiadi par tute le nassion”. (Mat. 24:9) El apòstolo Paolo el ga dito: “Tuti quei che i vol viver una vita de devossion a Dio, anca i sarà perseghidi.” (2 Tim. 3:12) Sàtana el ga una “granda ràbia”. Alora, semo sicuri che el ndarà far tuto quel che el pol par atacar el pòpolo de Dio. — Apo. 12:12.

17. Cossa che fursi ndaremo infrontar?

¹⁷ Tuti noantri ndaremo infrontar situassion che no sarà fàcile de seitar leal a Geovà. Ghen sarà una “granda tribolassion, come mai ga sucedesto del scomìnsio del mondo fin adesso, nò, gnanca sucederà ancora”. (Mat. 24:21) Pol esser che la nostra fameia la restarà contra noantri o no gavaremo pi la libertà de predicar e adorar a Geovà. (Mat. 10:35, 36) Cossa che te ghè de far? Sfòrsate par far come Asa e fìdate nel aiuto e nela protession de Geovà.

18. De acordo con Ebrei 10:38, 39, cossa che ghemo de far par infrontar tuto quel che ndarà suceder?

¹⁸ Geovà l’è drio pareciarne par quel che el ndarà suceder. Lu l’è drio doperar el “schiavo fedele e prudente” par darne quel che ghemo de bisogno par mantegner una forte fede e una forte amicìssia con Geovà. Cossita, semo boni de perseverar nela nostra adorassion a Geovà. (Mat. 24:45) Ma anca noantri ghemo de far el nostro meio par gaver una forte fede in Geovà. — Ledi Ebrei 10:38, 39. *

19-20. (a) De acordo con 1 Cróniche 28:9, che domande ghemo de farse? (b) Parché che ghemo de farse queste domande?

¹⁹ Come el rè Asa, noantri ghemo de ndar  in serca del aiuto Geovà. (2 Cró. 14:4; 15:1, 2) Come che podemo far questo? Prima, ghemo de cognosser a Geovà e esser batesadi. Dopo, ghemo de doperar tute le oportunità par far pi forte el nostro amor par Lu. Par saver se semo drio ndar in serca del aiuto de Geovà, podemo domandarse: ‘Mi vao a tute le riunion?’ L’è tanto importante far questo parché nele riunion ghemo el aiuto de Geovà e semo incorariadi par i nostri fradei. (Mat. 11:28) Anca podemo domandarse: ‘Mi son drio studiar e leder la Bìblia tuti i giorni?’ Se semo de star insieme dela nostra fameia, femo la adorassion in fameia tute le stimane? E se semo de star noantri soli, femo el nostro stùdio tute le stimane? Femo tuto quel che podemo par predicar e far dissìpoli?

²⁰ Parché che ghemo de farse queste domade? Parché cossita come Geovà, volemo esaminar i nostri pensamenti e anca el nostro cuor. (Ledi 1 Cróniche 28:9. *) Se vedemo che ghemo de cambiar quel che pensemo o quel che femo o se podemo far ancora de pi par Geovà, ghemo de domandar el so aiuto. Adesso l’è la ora de pareciarne par quel che ndarà suceder. Alora, fà tuto quel che te pol par doperar el to tempo con sabedoria intanto che te sì lìbero!