Un bon laorador no’l scampa via del laoro. Invesse, lu el ghe piase de laorar duro par mantegnerse e giutar le altre persone, anca se el so laoro l’è ùmile.

La vita la ze pròpio piena de responsabilità. Se te sì un bon laorador, questo l’è tanto bon, parché semo nte un mondo che tante persone no le ghe piase de laorar duro. — Eclesiasti 3:13.

“Go capio che quando mi laoro duro, me sento contento e orgolioso con quel che mi fao. Par quela, laorar me piase cada volta de pi. Esser un bon laorador me giuta anca a gaver un bon nome.” — Reyon.

COSSA LA BÌBLIA LA DISE: “Tuti i laori i ga i so vantaio.” — Proverbi 14:23.

Par veder el laoro de maniera positiva, proa far questo:

Impara far le robe polito. Se te sì drio laorar, far i mestieri de casa o le atività dela scola, fà sempre el to meio. Quando te impari a far una roba polito, proa farla cada volta meio o pi svelto. Quando te laori con pi abilità, el laoro te piaserà de pi.

COSSA LA BÌBLIA LA DISE: “Gheto belche visto una persona che la fà el so laoro con abilità? Ela la ndarà postarse davanti dei rè.” — Proverbi 22:29.

Pensa come el to laoro el giuta i altri. Quando te fè polito el to laoro, quasi sempre te giutarè anca altri. Par esémpio, quando ti te fè ben i mestieri de casa, ghen sarà manco laoro par i altri dela to fameia.

COSSA LA BÌBLIA LA DISE: “Ghen’è de pi felicità in dar che in ricever.” — Ati 20:35.

Fà de pi. No stà far sol quel che i te ga domandà. Fà de pi. Cossita, te sarè ti che te dessidi cossa far nela to vita, e ti te ndarè far de pi parché ti te vol, e nò par forsa. — Mateo 5:41.

COSSA LA BÌBLIA LA DISE: “Che el ben che te farè no’l sìpia fato par forsa, ma de volentiera.” — Filémon 14.

Sìpia chilibrà. Boni laoradori i ga chilìbrio. No i vive sol par laorar, ma gnanca i ze miserioni. Lori i cata tempo par laorar duro e anca par riposar.

COSSA LA BÌBLIA LA DISE: “L’è meio una sbranca de descanso che due sbranche de tanto laoro e corer par ciapar el vento.” — Eclesiasti 4:6.