Una persona che no desiste la ze bona de ndar avanti quando qualcossa rugna sucede. La speriensa la ne giuta a gaver questa qualità. Cossita come un picinin sol impara a caminar dopo de cascar tante volte, una persona sol impara a viver dopo de darghene fora cole dificoltà.

Arquanti tosatei i resta desanimadi quando no i ze boni de far qualcossa, quando i ga problemi o quando i altri i parla che i ze sbaliadi. Altri i desiste. Ma l’è importante che lori i capisse:

• Tuti i fà sbali. — Tiago 3:2.

• Tuti i gavarà problemi ntela vita. — Eclesiasti 9:11.

• Par imparar, ghe ocore che nantro ne dise quel che ghemo fato de sbalià. — Proverbi 9:9.

No desister giutarà el to fiol a darghene fora coi problemi quando el vien grando.

Quando el to fiol el fà un sbàlio.

CONSÌLIO DELA BÌBLIA: “Anca se el giusto el casca sete volte, el se levarà su.” — Proverbi 24:16.

Giuta el to fiol a saver se un problema l’è rugno o nò. Par esémpio, imagina che lu l’è ndà mal nte una prova dela scola. Fursi lu el cata che no l’è bon de far gnente e che no ghe ocore sforsarse.

Par insegnar el to fiol a no desister, giùtalo a pensar in cossa che el pol far par gaver un risultà meio ntela pròssima prova. Cossita, lu ndarà proar risolver el problema invesse de sentirse disgustà.

Ma no stà far tuto par el to fiol. Invesse, giùtalo a catar fora una maniera par risolver el problema. Te pol domandar: “Cossa che te pol far par capir meio quel che l’è stà insegnà ntela scola?”

Quando sucede robe rugne.

CONSÌLIO DELA BÌBLIA: ‘Valtri no savé come sarà la vostra vita doman.’ — Tiago 4:14.

No savemo cossa sucederà nel futuro. Una persona siora ancoi, pol esser che no la gàpia gnente  doman. Una persona che la ga salute ancoi, pol restar malada doman. La Bìblia la dise: “Gnanca sempre quei pi svelti i vinse la carera e gnanca sempre i pi forti i vinse la guera; . . . parché a tuti pol suceder qualcossa rugna o che no i speta mia.” — Eclesiasti 9:11.

Savemo che un pupà el fà tuto quel che el pol par proteger el so fiol. Ma in verità, no se pol proteger i fioi de tute le cose rugne dela vita.

El to fiol ancora no’l sa cossa vol dir no gaver pi un laoro e anca no gaver soldi. Ma te pol giutarlo a infrontar altre dificoltà, par esémpio, quando un amigo lo disgusta o quando un dela fameia more. a

Quando el to fiol riceve una coression.

CONSÌLIO DELA BÌBLIA: “Scolta el consìlio . . . par deventar sapiente nel futuro.” — Proverbi 19:20.

Quando una persona la dise par el to fiol far meio una roba, no’l vol dir che la vol farghe mal, ma si, che la vol giutarlo a cambiar par meio.

Quando ti te insegni al to fiol a acetar una coression, valtri due gavarè manco tristessa. Un pupà de nome John el dise: “Se i tosatei mai i infronta le consequense dei so sbali, mai i ndarà imparar. Lori i gavarà sempre de pi problemi ntela vita e el pupà e la mama i ndarà seitar a risolverli. Far cossita l’è una desgràssia par la vita del pupà e dela mama e anca par la vita dei fioi!”

Come che te pol giutar el to fiol a acetar la coression? No importa de ndove la coression la vien, dela scola o de qualche altro posto, no stà dir che la coression no la ze stata giusta. Invesse, te pol domandar al to fiol:

• “Parché che te cati che te ghè ricevesto la coression?”

• “Come che te pol far meio?”

• “Cossa che te ndarè far ntela pròssima volta che te ricevi una coression?”

Ricòrdate: La coression la giutarà el to fiol ancoi e anca quando lu el vien grando.