1, 2. (a) Cossa che tuti noantri ghemo de imparar e parché? (b) Cossa che ndaremo veder in questo stùdio?

 TUTI noantri ghemo de imparar a capir se una informassion ze vera o nò. (Pro. 3:21-23; 8:4, 5) Parché? Parché se no femo cossita, par Sàtana e el so mondo sarà pi fàcile imbroiarne. (Efe. 5:6; Col. 2:8) Par capir se l’è vera o no, ghemo de ndar in serca de saver tute le robe. L’è come Proverbi 18:13 dise: “Quel che risponde vanti de scoltar i fati l’è stùpido e l’è una umiliassion par lu.”

² Ma l’è fadiga saver tute le robe e capir se una roba la ze vera o nò. In questo stùdio ndemo veder parché questo no l’è mia fàcile, e anca ndaremo imparar come la Bìblia la pol giutarne a capir meio se le robe che scoltemo o ledemo le ze vere o nò.

3. Parché che l’è importante far quel che la Bìblia la dise in Proverbi 14:15? (Vedi el desegno nel scomìnsio del stùdio.)

³ La Bìblia la ne giuta tanto. Proverbi 14:15 dise: “El bauco el crede in tuto quel che i ghe dise ma el sàbio el pensa ben vanti de far qualcossa.” Parché che l’è importante far quel che questo testo el dise? Ancoi noantri ricevemo tante informassion par meso dela internet, dela television e de altre maniere. I nostri amighi e altre persone i ne manda tante e-mail e messagi nel selular. Come tante persone le spaia busie e le imbroia, noantri no ghemo de creder in tuto quel che sentimo o ledemo. Alora, le informassion che ricevemo le pol esser false, anca se quei dela fameia e amighi che ne le manda i pensa che le ze vere.

4. Come che Filipensi 4:8, 9 ne giuta scòlier quel che ndaremo leder? (b) Parché che l’è importante ndar in serca solche de informassion vere? (Vedi anca el quadro “ Ndove catar informassion vere?”)

⁴ Par far bone dessision ghemo de ver informassion vere. Par quela l’è tanto importante scòlier ben le informassion che ledemo. (Ledi Filipensi 4:8, 9.) Par quela no ghemo de perder tempo in vardar site, notìssie, e-mail che no savemo se i ze veri. Ancora pi importante, no stà vardar site ndove i apòstati i scrive. L’è quel che lori i vol, finir col pòpolo de Dio e meter dubi sora la verità. Se noantri ghemo informassion sbaliade, faremo dessision sbaliade. No stà pensar che no te sarè mai imbroià par le false informassion. — 1 Tim. 6:20, 21.

5. Che informassion false i israeliti i ga scoltà e cossa gali fato?

⁵ Vedi un esémpio de come una notìssia falsa pol desanimar le persone. Nel passà Moisè el ga mandà 12 òmini par vardar la Tera Prometesta. Quando i òmini i ze tornadi, 10 de lori i ga contà robe brute sora la tera, ma no le era vere. (Nùm. 13:25-33) I israeliti, quando i ga sentio queste robe, i se ga desanimà. (Nùm. 14:1-4) Fursi lori i ga pensà: “Se la pi granda parte dei òmini i ga dito queste robe, ga de esser vero”. Lori no i ga gnanca badà i altri due, Giosuè e Caleb. (Nùm. 14:6-10) L’è triste dir, ma i israeliti, invesse de ndar in serca de capir se quele informassion le era vere o nò, e de fidarse in Geovà, i ga credesto nele informassion false. Che bauchi!

6. Parché che no ghemo de farse maraveia se scoltemo robe strane sora le Testimònie de Geovà?

⁶ No ghemo de farse maraveia se scoltemo robe strane sora le Testimònie de Geovà. Parché? Parché Gesù el ga dito che i nostri nemighi i ndaria “dir busie e tuti i tipi de robe brute” contra noantri. (Mat. 5:11) Alora, te ghè de star atento e mai desmentegarte che par de drio ghen’è Sàtana, che ghe piase acusar i nostri fradei. (Apo. 12:10)

7. Vanti de mandar e-mail o messagi nel selular, che domande ghemo de farse?

⁷ Te piase mandar messaggi e e-mail ai to amighi? Fursi te piase esser come quel che el sà tute le robe par primo, come notìssie, o anca le speriense nela predicassion. Ma ghen’è un perìcolo. Anca che no sìpia aposta, te podarissi spaiar robe che no ze mia vere intrà i fradei. Alora, vanti de mandar messagi o e-mail, te ghè de domandarte: ‘Son sicuro che queste informassion le ze vere? Sarà che mi sò tuto quel che ga sucedesto? Se ti no te sè mia la risposta, l’è meio butar via i messagi e le e-mail invesse che mandarli avanti.

8. (a) Cossa che persone contra le Testimònie de Geovà le ga fato? (b) Cossa ghemo de far par no giutarli?

⁸ Mandar messagi o e-mail sensa pensarghe ben vanti ga nantro perìcolo. In arquanti posti ndove la nostra òpera la ze proibida, persone contra le Testimònie de Geovà le ga spaià false notìssie aposta. Questo ga fato che i fradei i gavesse paura e no i se fidesse pi intrà de lori. Par esémpio, nel passà, nela Union Soviètica, la polìssia secreta (KGB) la gavea spaià una notìssia falsa che fradei tanto cognossesti i era deventadi traditori. a L’è pecà ma tanti fradei i ga credesto in questa notìssia falsa e par quela i ze ndati via dela organisassion de Geovà. Tanti i ze tornadi, ma i altri i ga perso del tuto la so fede e no i ze mai tornadi indrio. (1 Tim. 1:19) Alora, cossa che podemo far par no giutar le persone che le va contra le Testimònie de Geovà? Ghemo de esser furbi. No ghemo mia de mandar avanti una notìssia negativa o che no semo mia sicuri che la sìpia vera.

9. Cossa pol farne far ancora pi fadiga rivar ala giusta conclusion?

⁹ Nantra roba che ne fà far fadiga rivar ala giusta conclusion ze che arquante notìssie no le ze vere del tuto o vien sconte arquante informassion. Ricordemo che una notìssia vera sol a metà pol imbroiarne del tuto. Cossa far parché questo no suceda? — Efe. 4:14.

10. Parché che i israeliti i ga quasi fato guera ai so fradei? Come i ga mantegnesto la pace?

¹⁰ Pensé cossa ga sucedesto coi israeliti ai tempi de Giosuè che i vivea al oeste del rio Giordon. (Gios. 22:9-34) Lori i ga savesto che i israeliti che i vivea al leste del Giordon (le tribo de Ruben, Gade e la meso tribo de Manassè) i gavea fato su un grando altar darente del Giordon. Questo l’era vera, ma par via de questa notìssia, i israeliti dela parte oeste i pensea che i so fradei i ndesse contra de Geovà. (Ledi Giosuè 22:9-12.) Vanti de scominsiar la guera, i ga mandà un grupo de òmini par esser sicuri de quel che sucedea. E cossa i ga visto? Che i so fradei si i gavea fato su questo grando altar, ma par ricordarse de Geovà. Le tribo de Ruben, Gade e la mesa tribo de Manassè le gavea fato questo altar parché le generassion future le ricordesse de servir a Geovà. Ve imaginé quante persone saria morte se i israeliti dela parte oeste i gavesse tacà la guera sensa esser sicuri dele notìssie? Manco mal che i se ga informà ben e cossita i ga mantegnesto la pace.

11. (a) Che ingiustìssia Mefibosete el ga patio? (b) Come Davi el gavaria podesto far difarente?

¹¹ Quando no se sà tute le informassion anca noantri podarissino patir ingiustìssie e la nostra reputassion la podaria esser rovinada. Vardé cossa che ga sucedesto intrà el rè Davi e Mefibosete. Davi l’era stà tanto generoso e bon con Mefibosete e el ghe gavea dà indrio tute le tere che le era de so nono Saul. (2 Sam. 9:6, 7) Ma dopo ga sucedesto che arquante persone le ga parlà mal de Mefibosete a Davi. Invesse de veder se l’era pròpio cossita, Davi el ghe ga cavà via tute le tere. (2 Sam. 16:1-4) Dopo, quando el ga parlà con Mefibosete, Davi el ga capio che el se gavea sbalià, e el ghe ga dà indrio parte dele so tere. (2 Sam. 19:24-29) Come Davi el gavaria podesto far difarente? Se el fusse ndà in serca de tute le informassion, no gavaria sucedesto questa ingiustìssia.

12, 13. (a) Cossa Gesù el ga fato quando i ga dito busie sora de lu? (b) Cossa podemo far se qualchedun el spaia una roba sora de noantri che no la ze vera?

¹² E se sucede che i dise una busia sora de noantri? Questo l’è pròpio quel che ga sucedesto con Gesù e con Gioani Batista. (Ledi Mateo 11:18, 19.) Cossa galo fato Gesù? Invesse de perder tanto tempo e forse par difenderse, el ga motivà le persone a vardar quel che el fea e el insegnea. Come el ga dito, ‘l’è par quel che la fà che una persona la prova che la ga sabedoria.’ — Mat. 11:19; nota.

¹³ Qua imparemo una roba importante. Pol esser che dele volte le persone le diga robe sbaliade o busie par rovinarne la reputassion. Alora podarissino pensar: ‘Ghen’è qualcossa che posso far par dimostrar che no l’è mia vera?’ Se qualchedun el dise una busia sora de noantri la roba meio la ze mostrar la verità par meso de quel che femo. Col to comportamento e quel che te fè, fà veder che l’è sol una busia, pròpio come Gesù el ga fato.

14, 15. Parché fidarse sol nel pròpio saver pol esser una tràpola?

¹⁴ Par rivar ala giusta conclusion, ghemo visto che no basta sol gaver le giuste informassion. Nantra roba che pol farne problemi l’è che semo imperfeti. Pensemo se semo drio servir a Geovà fà tanto tempo e ghemo speriensa e cognossensa. Pol esser che fin i altri i ne lo diga e i ga rispeto de noantri. Ma questo pol deventar una tràpola. Parché?

¹⁵ Se se fidemo massa in noantri, pol suceder che rivemo a conclusion sol par le nostre idee e opinion. Podemo rivar a pensar che semo boni de capir tuto quanto de una situassion o de una roba che sucede, anca se no ghemo tute le informassion giuste. Ma questo saria tanto pericoloso. La Bìblia la ne dise ben ciaro che no ghemo de fidarse del nostro saver. — Pro. 3:5, 6; 28:26.

16. In questa situassion, cossa sucede nte un ristorante, e cossa Carlo el pensa suito?

¹⁶ Pensemo nte una situassion. Un ansiano, che ga nome Carlo, l’è drio magnar nte un ristorante. De colpo el vede Gioani, un ansiano dela so congregassion, drio magnar anca lu ma con una dona che no la ze so sposa. Carlo el vede che questi due i se la ride e i se la conta e i ze contenti. E quando i ze drio ndar via, el vede Gioani con questa dona che i se dà un bel strucon. Carlo el resta sempre pi preocupà. Cossa sarà drio suceder? I finirà par divorsiarse cola so dona? E so fioi? Carlo el ga belche visto brute speriense nel passà. E ti? Se te fussi stà là, cossa te gavarissi pensà?

17. (a) Cossa galo savesto Carlo? (b) Cossa imparemo de questo esémpio?

¹⁷ Ma speta un momento. Carlo el savea tuto quel che l’era drio suceder con Gioani? Pròpio in quela sera Carlo el ga ciamà Gioani. Pensé come el se ga sentio quando el ga savesto che quela dona l’era sol la sorela de Gioani. Come la vivea in nantra cità e fea ani che no i se vedea, i se ga catà là nel ristorante par saludarse, e la sposa de Gioani no la gavea podesto ndar con lori. Manco mal che Carlo no’l ga parlà de quel che gavea pensà con nissuni. Cossa imparemo de questa stòria? Che podemo ver granda speriensa e tanti ani nela verità, ma ne ocore sempre saver tute le robe vanti de rivar a una conclusion.

18. Cossa pol farne creder nte una informassion sbaliada sora un fradel?

¹⁸ Se no se catemo ben con un fradel, sarà ancora pi difìcile rivar ala conclusion giusta quando sucede qualcossa, anca parché ne vegnarà sempre de pensar mal de questo fradel. Alora pol suceder che suito credemo a tuti i comentari negativi che scoltemo sora de lu. Cossa imparemo? Che se gavemo pensamenti sbaliadi contra qualchedun podemo rivar a conclusion sbaliade sensa che ghen sìpia gnente de vero. (1 Tim. 6:4, 5) Alora no assemo che la gelosia e la invìdia le cressa nel nostro cuor e no ne fae veder le robe. Ricordemo che ghemo la obrigassion de amar tuti i nostri fradei e perdonarli de cuor. — Ledi Colossensi 3:12-14.

19, 20. (a) Che testi dela Bìblia i pol giutarne capir se una informassion la ze vera o nò? (b) Cossa ndaremo veder nel pròssimo stùdio?

¹⁹ Ghemo visto che no l’è fàcile saver ben tuto e rivar ale giuste conclusion. Parché? Parché ghen’è tante informassion, no savemo se le ze vere, dele volte manca dele informassion e par colpa dela nostra imperfession. Cossa podemo far? I consili dela Bìblia pol giutarne. Un consìlio dise che ‘risponder vanti de scoltar i fati l’è stùpido e l’è una umiliassion’. (Pro. 18:13) Nantro consìlio dise che no podemo creder in tuto quel che scoltemo sensa saver se l’è vero o nò. (Pro. 14:15) E dopo no ghemo de fidarse nel nostro pròpio saver, parché no ga importansa quanti ani che semo nela verità. (Pro. 3:5, 6) I consili che la Bìblia ne dà i ne protege, ma questo sucederà sol se ndemo in serca vanti de rivar ala conclusion o de far una dessision.

²⁰ Ma gavemo anca nantra dificoltà. Quando ne vien normal dar un giudìssio sol par quel che vedemo par fora. Che dificoltà pol rivarne? Che perìcoli ghen’è? E cossa far par evitarlo? Ndaremo veder le risposte a queste domande nel pròssimo stùdio.