1. Che sentimento Davi el gavea par Geovà e, par quela, cossa che lu el fea?

EL RÈ DAVI el ga scrito: “Geovà l’è grando e el mèrita tute le lode.” (Sal. 145:3) Davi el amea a Geovà e par quela lo ‘lodea in meso dela congregassion’. (Sal. 22:22; 40:5) Sicuro che anca ti te ami a Geovà e te sì de acordo cole parole de Davi, che el ga dito: “Ò Geovà, Dio de Israel, nostro pare, che te sìpia lodà par sempre.” — 1 Cró. 29:10-​13.

2. (a) De che maniera podemo lodar a Geovà? (b) Che dificoltà tanti fradei i ga, e cossa che ndaremo ricordar?

² Ancoi, una maniera de lodar a Geovà l’è far comentari nele riunion. Ma par arquanti fradei questo no l’è fàcile. Lori i vol partissipar nele riunion ma i ga de infrontar una dificoltà, la paura. Cossa che lori i pol far par perder questa paura? Cossa che pol giutarne a far comentari che incoraia? Vanti de risponder a queste domande, ndemo ricordar quatro motivi importanti che ghemo par far comentari nele riunion.

3-5. (a) Come dise Ebrei 13:15, parché che ghemo de far comentari nele riunion? (b) Geovà no’l speta che tuti i fae comentari dela medèsima maniera, parché?

³ Geovà el dà a tuti noantri el privilègio de lodarlo. (Sal 119:108) I nostri comentari i fà parte del nostro “sacrifìssio de lode” e nissuni pol far questo sacrifìssio nel nostro posto. (Ledi Ebrei 13:15.) Sarà che Geovà el speta el medèsimo tipo de sacrifìssio, o che tuti femo comentari dela medèsima maniera? Nò!

⁴ Geovà el sà che noantri ghemo abilità e situassion difarente e lu el dà tanto valor ai sacrifissi che cada un de noantri el pol far. Pensa nei tipi de sacrifissi che Geovà el acetea dei israeliti. Ghen’era de quei che i podea darghe un piégoro o un beco. Ma, se un israelita l’era poareto, el podea darghe “due colombete o due colombe gióvene”. E se un israelita no’l podea darghe questo tipo de sacrifìssio, Geovà el acetea “intorno de un chilo de una bona farina.” (Lev. 5:​7, 11) La farina la era un sacrifìssio che el costea manco. Ma Geovà el ghe dea valor a questo sacrifìssio se el israelita el ghe desse una “bona farina.”

⁵ Geovà, el nostro Dio bondoso, no’l ga cambià. Quando femo comentari, lu no’l speta che parlemo compagno a Paolo e a Apolo. (Ati 18:24; 26:28) La ùnica roba che Geovà el vol l’è che noantri femo el meio comentàrio che podemo, de acordo cola nostra situassion. Ricòrdate del esémpio dela védova che la ga dato le due monede. Geovà el amea tanto questa védova parché la ga fato el meio che la podea. — Luca 21:​1-4.

6. (a) De acordo con Ebrei 10:24, 25, come che se sentimo quando altri i fà comentari? (b) Come che podemo mostrar che semo stati incoraiadi con i comentari che altri i ga fato?

⁶ Noantri incoraiemo un ai altri quando femo comentari. (Ledi Ebrei 10:24, 25.) Noantri ne piase tanto scoltar comentari difarenti nele riunion. Scoltar un comentàrio sémplisse e sinsiero de un toseto e sentir la alegria nela voce de qualchedun o scoltar una voce contenta de qualchedun che el ga imparà una verità nova, tuto questo riva al nostro cuor. Anca, restemo contenti con quei che i “fà sforso par gaver coraio” par far un comentàrio, anca se con vergogna o quando i ze drio imparar nantra léngua. (1 Tes. 2:2; nota.) Come che podemo mostar che semo stati incoraiadi con questi comentari? Dopo dela riunion, podemo ringrassiarli par el comentàrio che i ga fato che el ne ga incoraià. Nantra maniera la ze anca noantri far comentari. Cossita, ricevemo incoraiamento ma anca incoraiemo i altri. — Rom. 1:​11, 12.

7. Come che semo giutadi quando femo comentari?

⁷ Far comentari ne giuta. (Isa. 48:17) Come cossita? Primo, se volemo far un comentàrio, sentimo de pi volontà de pareciar ben la riunion. Alora, quando se pareciemo ben capimo meio la Parola de Dio. E de pi che imparemo la Bìblia, de pi podemo meter in pràtica quel che imparemo. Secondo, ne piase de pi dele riunion quando partissipemo. Terso, far comentari ghe vol sforso, ma se ricordemo par de pi tempo de quel che ghemo comentà.

8-9. (a) De acordo con Malachia 3:​16, come pénsito che Geovà el se sente quando el scolta i comentari che femo? (b) Ancora cossita, che dificoltà arquanti i ga?

⁸ Assemo Geovà felice quando parlemo dela nostra fede. Podemo esser sicuri che quando femo comentari Geovà el ne scolta e el dà tanto valor al sforso che femo. (Ledi Malachia 3:​16.) Quando femo sforso par far Geovà contento, lu el ne benedisse. — Mal. 3:​10.

⁹ Ghemo tanti motivi par far comentari nele riunion. Ancora cossita, arquanti i ga paura de alsar la man. Se ti te te senti cossita, no stà desanimarte. Ndemo veder arquanti testi dela Bìblia, due esempi del passà e idee pràtiche che le pol giutarne a far de pi comentari nele riunion.

10. (a) Che paura tanti de noantri ghemo? (b) Parché che gaver paura de far comentari pol esser bon?

¹⁰ Te vien fora la pele de oca quando te pensi de alsar la man par far un comentàrio? Se te te senti cossita, no te sì mia ti sol. In verità, quasi tuti noantri sentimo un poco de paura par far comentari. Ma par poder perder questa paura, te toca saver parché che te ghè paura. Te ghè paura de desmentegarte quel che te vè dir o dir qualcossa de sbalià? O te pensi che el to comentàrio no’l va esser tanto bon come quel de quelaltri fradei? Gaver questa paura pol esser bon. Ghe vol dir che ti te sì ùmile e te pensi che i altri i ze pi importanti de ti. Geovà el ama la umiltà. (Sal. 138:6; Fil. 2:3) Ma Geovà anca el vol che ti te lo lodi e che te incorai i fradei nele riunion. (1 Tes. 5:​11) Geovà el te vol ben e el va darte el coraio che te ghè de bisogno.

11. Che testi dela Bìblia i pol giutarne?

¹¹ Ndemo veder un per de testi dela Bìblia. La Bìblia la dise che tuti noantri ndemo parlar qualcossa de sbalià o de maniera sbaliada. (Tia. 3:2) Gnanca Geovà e gnanca i nostri fradei i speta che semo perfeti. (Sal. 103:12-​14) I fradei i ze la nostra fameia spiritual e i ne vol tanto ben. (Mar. 10:29, 30; Gioani 13:35) Lori i sà che dele volte i comentari che femo no i vien fora come volarissino.

12-13. Cossa che imparemo del esémpio de Neemia e Giona?

¹² Arquanti esempi dela Bìblia i pol giutarte a perder le to paure. Par esémpio pensa in Neemia. Lu el servia nel castelo de un rè tanto poderoso. Neemia l’era triste parché el savea che le muraie e i portoni de Gerusalen i era distruti. (Nee. 1:​1-4) Imagina come che l’era spaurà quando el rè el ghe ga domandà parché l’era triste! Neemia el ga fato presto far una orassion e el ghe ga rispondesto ala domanda. Come resultà, el rè el ga giutà tanto el pòpolo de Dio. (Nee. 2:​1-8) Pensa anca in Giona. Quando Geovà el ga domandà che el parlesse cole persone de Nìnive, Giona el se ga spaurà tanto che l’è scampà via. (Giona 1:​1-3) Ma, col aiuto de Geovà, Giona l’è stà bon de predicar par el pòpolo de Nìnive. E quel che lu el ga parlà el ga fato tanto ben a quele persone. (Giona 3:​5-​10) Cossa che imparemo de questi esempi? De Neemia imparemo che l’è importante far orassion vanti de far un comentàrio. E de Giona imparemo che Geovà el pol giutarne a servirlo anca se ghemo tante paure. Se pensemo ben, far comentari nele riunion l’è tanto pi fàcile che predicar in Nìnive, mia vera?

¹³ Cossa che te pol far par far comentari che incoraia nele riunion? Ndemo veder.

14. Parché che ghemo de pareciarse par le nostre riunion, e quando che podarissino farlo?

¹⁴ Parecia cada riunion. Se ti te tol el tempo par pareciar le riunion, te gavarè de pi confiansa par far comentari. (Prov. 21:5) Tuti noantri ghemo i nostri afari. Eloise, una védova de 80 ani, la parecia La Sentinela nel scomìnsio dela stimana. Ela la dise: “Mi imparo de pi quando parécio la riunion nel scomìnsio dela stimana.” Joy, una sorela che la laora tuto el giorno, la dopera el sabo par pareciar La Sentinela. Ela la dise: “Mi me ricordo de pi se stùdio poco vanti dela riunion.” Ike, un ansiano che l’è anca pioniero, el ga dito: “Par mi l’è meio studiar un pochetin ala volta durante la stimana invesse de studiar tuto nte un colpo.”

15. Come che te pol pareciarte par le riunion?

¹⁵ Come che te pol pareciarte par le riunion? Vanti de tuto, domàndaghe el spìrito santo a Geovà. (Luca 11:13; 1 Gioani 5:​14) Dopo, pensa nel tìtolo, nei sototìtoli, nei ritrati e nele domande del fin del stùdio. Intanto che te studi cada paràgrafo, proa leder tuti i testi che te pol. Pénsaghe sora in quel che te sì drio leder, ancora de pi pénsaghe sora ntei comentari che te vol far. Se te te pareci ben, te ndarè imparar de pi e sarà pi fàcile far comentari. — 2 Cor. 9:6.

16. Che robe ghemo che pol giutarne a pareciarse, e come che podemo doperarle?

¹⁶ Se te pol, dopera le robe eletròniche che ghen’è. Geovà, par meso dela so organisassion, el ne dà robe eletròniche che le giuta a pareciarse par le riunion. Doperando el aplicativo JW Library^® podemo sbassar le publicassion nel tablet o nel selular. Alora, podemo pareciar la riunion a qualche ora e in qualche posto, o almanco leder o scoltar quel che sarà considerà nela riunion. Arquanti i fà questo quando i va laorar o a scola o quando i se ferma par magnar. Col aiuto dela Watchtower Library e dela BIBLIOTECA ON-LINE da Torre de Vigia podemo far una peschisa pi profonda de quel che volemo capir meio.

17. (a) Parché che ghemo de pareciar de pi de un comentàrio? (b) Cossa gheto imparà del vìdeo Torne-se Amigo de Jeová — Prepare Seu Comentário?

¹⁷ Se te pol, parecia de pi de un comentàrio. Parché? Parché pol esser che no i te ciame nela prima volta che te alsi la man. Altri i podaria alsar la man nela medèsima domanda. E quel che el fà el stùdio de La Sentinela el pol ciamar nantro par far el comentàrio. Par no perder tempo col stùdio, quel che el fà el stùdio de La Sentinela el pol ciamar pochi fradei par far el comentàrio nte un paràgrafo, par quela, no stà restar disgustà o desanimà se no’l te ciama nela prima volta. Se ti te te ghè parecià par far altri comentari, te gavarè de pi possibilità de farli. Fursi te pol leder un testo. Ma, se ti te pol, parecia un comentàrio cole to pròpie parole. *

18. Parché che te ghè de far comentari curti?

¹⁸ Fà comentari curti. Quasi sempre, i comentari che incoraia de pi i ze sémplissi e curti. Alora, fà sforso par far cossita. Proa meterghe manco de 30 secondi. (Prov. 10:19; 15:23) Se fà tanto tempo che te vè ale riunion, l’è importante dar el esémpio e far comentari curti. Se te fè comentari longhi che i ze de pi de un minuto, altri i pol pensar che no i sarà mai boni de far comentari come ti. Anca, far comentari curti dà la oportunità parché de pi persone i possa farli. Se i te ciama par primo, dà una risposta sémplisse e no stà comentar tuto el paràgrafo. Dopo che el punto prinsipal l’è stà comentà, ti te pol comentar altri punti. — Vedi el Quadro “ Che comentari mi posso far?”

19. Cossa che el fradel che el fà el stùdio de La Sentinela el pol far par giutarte, e cossa che ti te ghè de far?

¹⁹ Parlaghe al fradel che el fà el stùdio de La Sentinela e dighe che paràgrafo che te vol far el comentàrio. Se te vol far cossita, parlaghe al fradel ben vanti de scominsiar la riunion. Quando riva la ora de far el comentàrio, alsa svelto la to man e ben alta, cossita el fradel el podarà véderte.

20. Parché che podemo dir che le riunion le ze come magnar insieme coi amighi?

²⁰ Le riunion le ze come magnar insieme coi amighi. Imagina che arquanti fradei dela congregassion i vol far un bon magnar e i te domanda de portar un magnar sémplisse ma bon. Come ndarissito sentirte? Fursi te pol gaver un poco de paura, ma sicuro che te portarissi qualcossa che ghe piaserà a tuti. Geovà el ne convida par le riunion e lu el parecia una tola piena de robe bone. (Sal. 23:5; Mat. 24:45) Lu el resta tanto contento quando portemo una roba sémplisse, la meio che podemo portar. Alora, paréciate ben par le riunion e fà tuti i comentari che te pol. Cossita te ndarè magnar nela tola de Geovà ma anca te darè un presente ala congregassion.