Son nassesto nte un paeseto distante nele montagne nel oeste dela Guatemala. La me fameia la ze del pòpolo ixil, dissendenti dei maia. Da picinin mi parlo spagnol e ixil, la léngua del me pòpolo. Go vivesto nel tempo dela guera civil dela Guatemala, che la ga durà 36 ani. Durante questo tempo, tanti ixili i ga perso la vita.

Quando mi gavea 4 ani, el me fradel pi vècio, che el gavea 7 ani, l’era drio giugar con una granada che la ga sciopà de colpo. Par quela son deventà orbo e lu el ga perso la so vita. Dopo de questo, i me ga metesto nte un istituto par toseti orbi nela cità dela Guatemala, ndove go imparà braile, o sia, leder tocando coi dei. Lì i me ga proibio de parlar coi altri toseti e quelaltri i restea distante de mi. Mi me sentia tanto solo e no vedea la ora de passar i due mesi del ano che podea restar nela me casa con me mare, che la me volea tanto ben e la me mostrea afeto. Ela la ze morta quando che mi gavea 10 ani. Go sentio che go perso la ùnica persona del mondo che me amea. Son restà sensa saver cossa far.

Quando gavea 11 ani son ritornà nantra volta nela me cità e son dato de star cola fameia de me fradel, che me pupà el gavea bio con nantra dona. Lori i me dea de magnar e tuto quel che gavea de bisogno, ma me manchea el aiuto emossional. Dele volte mi ghe domandea a Dio: “Parché che me mare la ze morta? Parché che mi son orbo?” Le persone le me disea che queste robe le era dela volontà de Dio. Alora go pensà che Dio no’l me badea e che l’era ingiusto. Se gavesse podesto mi me gavaria copà.

Come orbo, mi no ero bon de difenderme in senso fìsico e emossional. Quando ero pìcolo, i me ga abusà sessualmente arquante volte. No go mai parlà de questo par nissuni, parché mi catea che no i se importea con mi. L’era fadiga che qualchedun parlesse con mi e mi no parlea con nissuni. Mi ero sempre triste, restea sempre mi sol e no me fidea in nissuni.

Quando ero gióveno, un casal de Testimònie de Geovà l’è vegnesto parlar con mi nela ora dela marenda nela scola. Una maestra che la gavea pecà de mi, la ga domandà che lori i vegnesse parlar con mi. I me ga parlà sora le promesse dela Bìblia che i morti i va ressussitar e che i orbi i ghe vederà nantra volta. (Isaia 35:5; Gioani 5:28, 29) Me ga piasesto quel che i me ga insegnà, ma fea fadiga parlar parché no ero costumà far questo. Se anca mi gavea tanta vergogna, lori i era bondosi e passienti con mi e i ga seità visitarme par insegnar sora la Bìblia. Par rivar casa mia, i caminea de pi de 10 chilòmetri e ghen’era monti par ndove che i passea.

Me fradel el disea che lori i era sempre ben vestidi ma che i era poareti. Ancora cossita, i me mostrea interesse e i me portea pìcoli presenti. Par mi, sol i veri cristiani i podea mostrar questo tipo de amor.

Go studià la Bìblia con publicassion in braile. Mi capia quel che ero drio studiar, ma no’l rivea al cuor, l’era difìcile de acetar. Par esémpio, par mi l’era fadiga creder che Dio el me mostresse interesse e che le persone le fusse bone de mostrar a mi el amor de Dio. Mi capia parché che Geovà el assea che robe rugne le sucedesse par un tempo, ma no ero bon de véderlo come un pare amoroso. *

Col tempo, quel che go imparà dela Bìblia me ga giutà a cambiar la me maniera de pensar. Par esémpio, go imparà che Dio el sente anca lu quel che le persone le sofre. Dio el ga dito sora i so adoradori che i era drio esser maltratadi: “L’è sicuro che go visto che el me pòpolo l’è drio sofrir . . . mi sò quel che i ze drio sofrir.” (Ésodo 3:7) Me ga piasesto tanto de quel che go imparà de Geovà e go dessidio dedicar la me vita a lu. Nel ano 1998, mi son stà batesà come Testimònia de Geovà.

Quasi un ano dopo del me batésimo, go fato un corso par orbi, darente dela cità de Escuintla. Dopo, un ansiano de quel posto el ga savesto dele me dificoltà par ndar ale riunion ndove che mi ero de star. La congregassion pi darente la era de quelaltra banda de quei monti che el casal el passea par far el me stùdio. Questo viaio l’era tanto difìcile par mi. Par giutarme, el ansiano el ga catà una fameia de Testimònie de Geovà in Escuintla che la me ga assà viver insieme de lori e la me ga giutà a ndar ale riunion. Fin ancoi, lori i tende de mi come se mi fusse dela so fameia.

Mi podaria contar tanti altri esempi del amor dela congregassion par mi. Tuto questo me ga mostrà che son in meso dei veri seghidori de Gesù, come Testimònia de Geovà. — Gioani 13:34, 35.

No me sento pi sensa valor e gnanca come una persona sensa speransa. La me vita ancoi la ga un ogetivo. Dopero la pi granda parte del me tempo par insegnar la Bìblia ale persone. Fando questo mi giuto i altri e penso manco in mi. Anca go el privilègio de servir come ansiano e far discorsi nele congregassion. Fin go bio el privilègio de far discorsi baseadi nela Bìblia in congressi par diverse persone.

Nel 2010, go partessipà dela Scola de Trenamento Ministerial (adesso la se ciama Scola par Vangelisadori del Regno) in El Salvador. Questo me ga giutà tanto parché posso far meio el me laoro nela congregassion. Questo trenamento me ga giutà a veder che go valor e che Geovà Dio el me ama. Lu el pol giutar qualchedun a far la so òpera.

Gesù el ga dito: “Ghen’è de pi felicità in dar che in ricever.” (Ati 20:35) Adesso posso dir che son pròpio felice e fao una roba che no go mai pensà in poder farla: giutar i altri.