“Quando ero cea, me fradel el me tratea mal e el me disea su tuti i giorni. Dopo che me go maridà, la me sogra la ga seità a tratarme mal cossita. Ela e el me sogro i me tratea come una schiava. Go pensà fin de coparme.” — Madhu, a Ìndia.

 La Organisassion Mondial dela Salute la dise che “ghen’è violensa contra le done in tuto el mondo”. Ela la dise anca che una in cada tre done le ga sofrio violensa fìsica o sessual in qualche momento dela so vita.

 Se ga belche sucedesto con ti, fursi te ghè paura che, in qualche posto che te vè, qualchedun te dirà su o te vè sofrir violensa fìsica o sessual. Par causa dela violensa contra le done, fursi te pensi che par quasi tute le persone le done no le ga valor. Ma sarà che Dio el se importa cole done?

 Cossa che la Bìblia la dise: “[Dio] el ga fato el omo e la dona.” — Génesi 1:27.

 Cossa vol dir: Dio el ga fato i òmini e le done. Par lu, tuti due i ga de esser tratadi con rispeto. E Dio el vol che el omo ‘el ame la so sposa come a lu stesso’, nò che el proe comandarla, manco ancora che ghe diga su o la trate con violensa. (Efesi 5:33; Colossensi 3:19) La Bìblia la assa ciaro che par Dio l’è importante che le done le se sinta sicure.

 “Quando ero pìcola, arquanti parenti i me ga violentà. Quando mi gaveo 17 ani, me paron el ga dito che ndea mandarme via del laoro se mi no fesse sesso con lu. Dopo de granda el me omo, i me genitori e i me visini i ga scominsià a tratarme mal. Ma quando go imparà sora Geovà,  bel Creador, go visto che lu el trata le done con rispeto. Alora, son restada sicura che lu el me ama e che mi go tanto valor par lu.” — Maria, Argentina.

 Cossa che la Bìblia la dise: “Ghen’è un amigo che se taca de pi che un fradel.” — Proverbi 18:24.

 Cossa vol dir: Un vero amigo el ndarà giutarte. Se te pol, parla con una persona che ti te te fidi sora i to sentimenti.

 “Par 20 ani, no go dito a nissuni che mi son stata violentada. Par quela, son deventada una persona ansiosa, no ero pi felice e go bio depression. Ma quando go dessidio contar a una persona che volea scoltarme quel che me ga sucedesto, me go sentio tanto ben.” — Elif, Turchia.

 Cossa che la Bìblia la dise: “Buté sora [Dio] tute le vostre preocupassion, parché lu el tende de valtri.” — 1 Piero 5:7.

 Cossa vol dir: Quando te preghi, Dio el te scolta pròpio. (Salmo 55:22; 65:2) Dio el se importa con ti. Lu el pol giutarte a capir che te ghè tanto valor.

 “Imparar sora Geovà me ga giutà a calar quel grando dolor che mi sentia. Adesso posso pregar a lu e parlar tuto quel che mi sinto. Lu l’è come un amigo che l’è bon de capir i me sentimenti.” — Ana, Belize.

 Cossa che la Bìblia la dise: ‘Geovà el farà giustìssia ai òrfani e a quei che i ze maltratadi. Cossita, nissun pi ndarà farghe restar spauradi.’ — Salmo 10:17, 18.

 Cossa vol dir: Suito, Dio el ndarà finir fora con tuti i tipi de ingiustìssie, anca cola violensa contra le done.

 “Me ga consolà tanto saver che suito Geovà el ndarà finir cola violensa contra le done e le tose. Mi go sentio una granda pace.” — Roberta, Mèssico.

 Par saver de pi sora la speransa che la Bìblia la dà, parché te pol fidarte nele so promesse e come le Testimònie de Geovà le pol giutarte par meso dela Bìblia, domanda una vìsita ala persona che la te ga dato questo foieto.

 Sbassa una còpia de questo artìcolo par stamparlo.