L’è vera che la Bìblia no la parla sora finir fora aposta cola vita de un bambin che no l’è gnancora nassesto. Ma tanti testi dela Bìblia ne giuta a capir cossa che Dio el pensa sora la vita, anca la vita de un bambin che l’è ancora nela pansa dela mama.

 La vita la ze un presente de Dio. (Génesi 9:6; Salmo 36:9) Par lu, tuto quel che vive ga tanto valor, fin un bambin che l’è ancora nela pansa dela mama. Cossita, finir fora aposta cola vita de un bambin che no l’è gnancora nassesto l’è el stesso che copar.

 La Lege che Dio el ga dato ai israeliti la disea: “Se òmini i ze drio lotar intrà de lori e i fà mal a una dona che la ze drio spetar un fiol, e ela la ga questo fiol vanti del tempo, ma no’l more, quel che ghe ga fato mal el ga de pagar i dani che el sposo dela dona el desside. Lu el ga de pagarli par meso dei giuisi. Ma se qualchedun el more, alora se ga de dar vita par vita.” — Ésodo 21:22, 23. a

•  Quando la vita de una persona la scomìnsia?

•  Sarà che Dio el ndarà perdonar qualchedun che ga fato un aborto?

•  Saria sbalià far un aborto se la vita dela mama o del bambin l’è in perìcolo?

 Par Dio, la vita de un bambin la scomìnsia nel momento che so mama la resta gràvida. La Bìblia la mostra che Dio el vede un bambin che no l’è gnancora nassesto belche come una persona, e nò solche come una parte dela so mama. Varda arquanti esempi che i mostra che, par Dio, la vita de un bambin che l’è nela pansa dela mama la ze compagna ala vita de un bambin che l’è belche nassesto.

•   El rè Davi, ispirà par Dio, el ga dito che Dio lo gavea visto quando lu l’era nela pansa dela so mama. (Salmo 139:16) Alora, Dio el vedea Davi come una persona vanti de lu nasser.

•   Vanti che el profeta Geremia el nassesse, Dio belche el volea darghe un laoro spessial. Dio el ga dito a Geremia: “Vanti de formarte nela pansa dela to mama, mi belche te cognossea, e vanti de ti nasser, mi te go santificà. Mi te go fato profeta par le nassion.” — Geremia 1:5.

•   Luca, un dei scritori dela Bìblia, che l’era dotor, el ga doperà la medèsima parola greca par parlar de un bambin che l’era ancora nela pansa dela so mama e anca de un bambin che l’era belche nassesto. — Luca 1:41; 2:12, 16.

 Una persona che la ga belche fato un aborto la pol esser perdonada par Dio. Se adesso la persona la capisse che finir cola vita de um bambin che no l’è gnancora nassesto l’è un bruto pecato, ela la pol sentir che Dio mai la perdonarà, ma Dio no’l vol mia che la pense cossita. “Geovà l’è misericordioso e el ga compassion . . . Lu el mete i nostri sbali tanto distante de noantri, cossita come el leste l’è distante del oeste.” b (Salmo 103:8-12) Geovà el ndarà perdonar tuti quei che i ga fato pecati nel passà e i se ciama grami de cuor, anca quei che i ga fato un aborto. — Salmo 86:5.

 La Bìblia la dise che la vita de un bambin nela pansa dela so mama la ze tanto pressiosa. Alora, anca se i dotori i dise che fursi el bambin o la mama i gavarà qualche problema de salute, ancora cossita saria sbalià far un aborto.

 Pol esser che, nela ora che la mama la ze drio gaver el fiol, sucede qualcossa che i dotori i vede che no i sarà boni de salvar la mama e el bambin. Anca se questa situassion no la sucede tanto, ghe tocarà al pare e ala mare del bambin far la dessision de qual dei due che i proarà salvar.