De acordo con una peschisa del Sentro par Controlo e Prevension de Malatie dei Stati Unidi, intorno de metà dei gióveni intrà 15 e 19 ani che i ga rispondesto questa peschisa i ga belche fato sesso oral. La peschisadora Sharlene Azam la ga scrito: “Se te parli coi gióveni sora sesso oral, lori i te dise che no ghen’è mia problema de farlo. Par lori, sesso oral gnanca l’è sesso.”

•  Cossa che te cati?

•  Quala che la ze la verità?

•  Parché che l’è importante saver quel che Dio el pensa sora questo assunto?

 Rispondi si o nò a queste domande:

1.   Una tosa la pol restar gràvida se la fà sesso oral?

   1.   Si

   2.   Nò

2.   Se pol ciapar malatie par meso del sesso oral?

   1.   Si

   2.   Nò

3.   Sesso oral l’è pròpio sesso?

   1.   Si

   2.   Nò

 Varda se quel che te ghè rispondesto l’è giusto.

1.   Una tosa la pol restar gràvida se la fà sesso oral?

    Risposta: Nò. Par quela che tante persone le pensa che no ghen’è mia problema de far sesso oral. Ma no l’è mia vera.

2.   Se pol ciapar malatie par meso del sesso oral?

    Risposta: Si. Una persona che la fà sesso oral la pol ciapar epatite (A o B), berughe genitai, gonorea, erpes, HIV e sìfilis.

3.   Sesso oral l’è pròpio sesso?

    Risposta: Si. Tuti i ati che se fà coi òrgani genitai de nantra persona, come relassion sessuai, sesso oral, sesso anal e masturbar nantra persona, l’è sesso.

 Varda arquanti testi dela Bìblia che i ne giuta a capir la risposta.

 La Bìblia la dise: “La volontà de Dio la ze che valtri sìpie santi e che no fé imoralità sessual.” — 1 Tessalonissensi 4:3.

 Nela léngua che questo testo l’è stà scrito, la parola tradusida “imoralità sessual” la vol dir tute le maniere de contato ìntimo fora del matrimònio, come relassion sessuai, sesso oral, sesso anal e masturbar nantra persona. Brute robe le pol suceder par quei che i fà imoralità sessual, e la pedo la ze no esser pi amigo de Dio. — 1 Piero 3:12.

 La Bìblia la dise: “Quel che el pratica la imoralità sessual el fà un pecato contra el so pròpio corpo.” — 1 Corinti 6:18.

 El sesso oral el pol far mal de maniera fìsica e spiritual. Anca el pol far una persona gaver problemi emossionai. De acordo col libro Talking Sex With Your Kids (Come parlar sora sesso coi to fioi), arquante volte, le persone che le fà relassion sessuai vanti del matrimònio le se ciama grame o le sente che quelaltra persona no la se importa mia con lore. E l’è compagno coi altri tipi de ati sessuai.

 La Bìblia la dise: “Mi, Geovà, son el to Dio, quel che el te insegna par el to benefìssio.” — Isaia 48:17.

 Te cati che le lege de Dio sora el sesso le ze una protession par ti? O te cati che lore le cava via la to libertà? Par giutarte a risponder, pénseghe sora una strada con tanti auti. Lì, te vedi tante plache che te mostra el limite de velocità, ndove che te pol ndar e ndove che te toca fermarte. Càtito che queste plache le cava via la to libertà o le te protege? Cossa che ndaria suceder se ti e i altri no i ghe badesse mia ale plache?

 L’è compagno cole lege de Dio. Se ti no te ghe badi mia, l’è sicuro che te ndarè tor su quel che te ghè piantà. (Gàlati 6:7) La scritora Susan Browning Pogany la dise nte un libro sora educassion sessual: “De pi che te assi de banda i to prinsipi e quel che te credi par far robe che le fà sentirte mal, manco rispeto te gavarè par ti stesso.” Ma, se te vivi de acordo con quel che Dio el dise, te vè mostrar che te sì una brava persona e te gavarè una cossiensa neta. — 1 Piero 3:16.