Silempwale ni Matheyo 12:1-50
-
Yesu, “Pwiya a esaabadu” (1-8)
-
Mulopwana a ntata noorakala onnalamihiwa (9-14)
-
Kaporo oomuhakalaliha Muluku (15-21)
-
Minepa soonanara sinnoomoliwa ni ikuro sa munepa wootteela (22-30)
-
Yoottheka ehinleveleliwa (31, 32)
-
Mwiri onsuwanyeya mwaha wa soowiima saya (33-37)
-
Ethoonyero ya Yona (38-42)
-
Waatthikaka munepa woonanara (43-45)
-
Ameyawe ni asinnawe Yesu (46-50)
12 Etempu ene yeele, Yesu aavira imatta saalinwe tiriku nihiku na esaabadu, nto atthareli awe yaavoliwa etala, enapatxera ovurula makala a etiriku enakhuura.
2 Afarisi yoonakaru etthu eyo, yaaheera: “Nkoonani, atthareli anyu empaka etthu ehinaakhuleliwa opaka nihiku na esaabadu.”
3 Yesu owaakhula enre: “Neereke nyuwo khamusomme ele Davidi ni anakhotto awe yaapankaaya evoliwakaru etala?
4 Owo aavolowa empa ya Muluku vamoha ni anakhotto awe entxa ipaawu sooveleeliwa.* Ipaawu iyo yaakhuleliwa otxa paahi anamakeya.
5 Nyuwo khamusomme munlamuloni weera nihiku na esaabadu anamakeya ennavara muteko mutemplu mene ehinkhala ni nthowa?
6 Miyo kinnooleelani weera, vaava ookhala mutthu ootthuneyaxa opwaha etemplu.
7 Nto mwiiwexexa etthu entaphulelaaya masu ala: ‘Mmorelaneke ikharari mukina ni mukhwaawe ohiya okivaharu makeya paahi,’ nyuwo khamwaakela waathorihaka atthu ehikhanleno mulattu.”
8 Tivanto kinhimaaka weera Mwaana a Mutthu tori mwaneene esaabadu.
9 Avinyakaru nipuro nne, aavolowa musinakookani mwaya.
10 Musinakookani mmwe aakhala mulopwana mmoha aari oorakala ntata, nto afarisi, etthunaka waasaasa nthowa noomoothera Yesu, yaamukoha ha: “Onnaakhuleliwa omulamiha mutthu nihiku na esaabadu?”
11 Yesu owaakhula enre: “Taani a nyuwo oneera yamorela eputtiputthi awe mulittini nihiku na esaabadu ahinrowa okumiha?
12 Mutthu ni eputtiputthi, ori ootthuneya ti mutthu. Tivanto, onnaakhuleliwa aani omulamiha mutthu nihiku na esaabadu.”
13 Yesu aamweerela mulopwana ole oorakala: “Mookole ntata”, owo aahookola ni naanaanoru ntata nne naalama, ninlikana ni ntata nikina nne nahaarakanle.
14 Nto afarisi, yaakhuma musinakooka enapatxera ovaanelasa weera emwiive Yesu.
15 Yesu asuwelakaru etthu ele afarisi yaavaanelaaya, aakhuma nipuro nne. Ni atthu antxipale yaamutthara. Nave-tho, aahaalamiha atthu ootheene yaavoreiwa.
16 Ni annaaleela awo weera ehimulaleye.
17 Weera ekwanele masu a profeta Yesaya, yaawo yeera:
18 “Mmoone kaporo aka yoowo kimuthanliyaaka, kimmusivelaaka ni onkihakalaliha,* kinonvaha munepaaka,* onoosuweliha maloko exariya ya ekhaikhai.
19 Owo khanrowa waakhulana naari okhuwela, khaavo aneera iiwe nsu nawe mmuseweni.
20 Owo khankela wintaka mutathi woowinteeyeene naari khankela otxipiha mutthampo ontthuwa mwiixi, mpaka owiiha exariya ya ekhaikhai.
21 Mweekhaikhai, atthu a mulaponi enookhalano yooweherera mwa nsina nawe.”
22 Aawiiheriwa mulopwana mmoha namatxiini, ahoona ni ahuuluma ni owo aamulamiha, amulamihakaru, mulopwana owo aapatxera wuuluma ni woona.
23 Atthu ootheene yaatikhiniheya ni yanneera: “Khaiyene ti yoola mwaana a Davidi?”
24 Afarisi yiiwakaru eyo, yaaheera: “Mulopwana ola onwera woomola minepa soonanara mwaha wooweera onkhaviheriwa ni muhooleli a minepa soonanara, Belzebu.”*
25 Asuwelaka muupuwelo aya, Yesu aaweerela: “Omwene wootheene onkawanyeya yooworu, onoonyaanyeya. Esidade naari empa eri yootheene enkawanyeya yeeyoru, ennamora.
26 Vamoha-moharu, Satana aamoomolaka Satana tho, eyo enoonihera weera omwene awe wookawanyeya. Vanonto, omwene awe waarowa olipa moota heeni?
27 Waari weera miyo kinwera woomola minepa soonanara kikhaviheriwaka ni Belzebu, ankhanto anamwane anyu, enwera woomola ekhaviheriwaka ni ikuru heeni? Tivanto atthu awo enrowaaya woothorihani.
28 Nto waari weera miyo, kinoomola minepa soonanara moorweela mwa munepa wa Muluku, eyo enoonihera weera Omwene wa Muluku wohoophwanyani.
29 Naari taani onvolowa mpaani mwa mulopwana a ikuru weera iiye itthu sawe ahipatxenre omutthuka toko mulopwana owo a ikuru? Amutthuka vale, aneeraiye awere wiiya itthu sawe.
30 Ole ohikhanle ni miyo, onnakivirikanyiha ni ole ohinthukumanya ni miyo, onnamwara-mwara.
31 “Mwa yeeyo, kinnooleelani weera: Yoottheka eri yootheene ni muulumo ootheene ooveeha enooleveleliwa, mene ole onveeha munepa wa Muluku, khanleveleliwa.”
32 Mwa ntakihero, ole anaamuulumele masu oonanara Mwaana a Mutthu, anaaleveleliwe, mene ole onveeha munepa wootteela khanleveleliwa elapo ela* naari enwa.
33 “Wakhala weera munaala mwiri wooreera, onrowa wiimiha soowiima sooreera; ni wakhala weera munaala mwiri woonanara, onrowa wiimiha soowiima soonanara. Mwiri onsuweliwa mwaha wa soowiima saya.”
34 Nloko na evili, munwera hayi wuuluma itthu sooreera mureeneno itthu soonanara mmurimani mwanyu? Mene eyano, enuuluma ele eri vamurimani.
35 Mutthu ooreera murima onuuluma itthu sooreera, woona weera vamurimani vawe sirivo itthu sooreera mene mutthu oonanara murima, onuuluma itthu soonanara, woona weera vamurimani vawe sirivo itthu soonanara.
36 Kinnooleelani weera nihiku noothoriha, atthu enookohiwa mwaha wa muulumo ootheene oonanara yuulummaaya.
37 Vano ni masu anyu, munoohimmwa okhala naxariya ni masu anyu tho, munoophwanyiwano mulattu.
38 Nto, woowiiwa masu ale, afarisi ni alipa oolepa yaaheera: “Muhusiha, munoonihere ethoonyero.”
39 Waakhula enre: “Atthu oowuuma murima ni oohiroromela, munnyeserera weera moone ethoonyero mene khamunooniheriwa ethoonyero eri poothe, ehikhanle yeele ya Yona profeta.
40 Ntoko hiihaale Yona aakhanlaawe mahiku mararu othana ni ohiyu mmirimani mwa ehopa etokotoko, hiiho tho, mwaana a mutthu anaakhale mmahiyeni mahiku mararu othana ni ohiyu.
41 Nihiku noothoriha, atthu a oNinive enoohuhumuwa vamoha ni atthu ala ni enimwaathoriha mwaha wooweera, awo yaattharuwa Yona aalaleerakaru. Vano kinnooleelani weera vaava ookhala mutthu ootepa otthuneya ompwaha Yona.
42 Nihiku noothoriha, pwiyamwene a ohitto anaavinye vamoha ni atthu ala ni onimwaathoriha mwaha wooweera owo aakhumme elapo yoorakama anawa wiiwa miruku sa Salomoni. Menento, kinnooleelani weera vaava ookhala mutthu ootthuneyaxa ompwaha Salomoni.
43 “Emaara yeeyo munepa woonanara onkhumaaya wa mutthu, onnaasaasa nipuro noowuuma weera wiitthuuwe mene khomphwanya.
44 Tivanto onneera: ‘Kinootthikela empaaka, weiwe kithammaakawo.’ Aaphiyaka vale, onnaphwanya empa ele ehikhaliwaka, ekwesinweene ni erehererinweene.
45 Nto owo onnarowa wiitthana minepa mikina seete soonanaraxa ompwaha owo ni yavolowa vale, awo ennakhala mwemmo ni mukhalelo wa mulopwana ole onnakhala wootepaxa oxupa opwaha woopatxerani. Ni tiyeeyo enkela oweereela atthu ala oonanara murima.”
46 Ariki wuuluma hiihaale ni atthu, ameyawe ni asinnawe, yaaheemela vaate etthunaka wuuluma nuuwo.
47 Nto mutthu mmoha aamweerela: “Ameyanyu ni asinnanyu eri vaate vale, entthuna wuuluma ni nyuwo.”
48 Yesu aamwaakhula mutthu ole: “Ameyaka ni asinnaka taani?”
49 Ni awookolelaka ntata nawe atthareli awe aaheera: “Alasa eri ameyaka ni asinnaka.”
50 Vano, yoole ompaka yootthuna ya Atiithi aka eri wiirimu, ori munnaka, murokoraka ni ameyaka.”
Footnotes
^ Naari: “ipaawu aavahiwaawe Muluku.”
^ Naari: “kimmwaakhulelaaka.”
^ Eyo tiiyo, munepa wootteela wa Muluku.
^ Nna nsina nikina na Satana.
^ Naari: “emalihero ya itthu soonanara sa elapo ela.”
