Silempwale ni Matheyo 9:1-38
-
Yesu onnamulamiha mulipa oorakala (1-8)
-
Yesu onnanwopa Matheyo (9-13)
-
Yesu onnakohiwa woohima sa omutthuka ramasaani (14-17)
-
Mwaana mwaamuthiyana a Jairo, muthiyana mmoha onnatava maleya a Yesu (18-26)
-
Yesu onnamulamiha mulipa oohoona ni mulipa oohuuluma (27-34)
-
Soohepha siri sintxipale, nto anamuteko eri vakhaaniini (35-38)
9 Woowi hiihaale, Yesu anwela paarku analapuwela ekhopela ekina, anarowa esidade awe.
2 Aphiyakaru, aawiiheriwa mulopwana mmoha oorakala akonneene vamaakani,* Yesu oonakaru nroromelo mulopwana ole aaraaweno aamweerela: “Mulipe murima mwanaka, soottheka sanyu sooleveleliwa!”
3 Alipa oolepa akina yiiwakaru ele Yesu aahimmaawe, yaaheera: “Mutthu ola, onnanveeha Muluku.”
4 Yesu asuwelaka minyuupuwelo saya, aaheera: “Mwaha wa heeni munuupuwelaanyu itthu soonanara mmurimani mwanyu?”
5 Mwa ntakihero, eheeni eri yookhweya wuuluma weera: ‘Soottheka sanyu sooleveleliwa naari weera nvinye mweette?’
6 Nto weera musuwele, weera Mwaana a Mutthu ookhalano owera woolevelela soottheka valaponi . . .”, Yesu aamweerela ha mulipa ole oorakala: “Nvinye mukuxe maakaanyu* murooke owaani.”
7 Owo aavinya anarowa owannyawe.
8 Atthu voowoona moota aalamihinwaawe mulopwana ole, yaahoova ni yanvuwiha Muluku mwaha woowaavaha atthu owera iwo.
9 Avinyaka vaavale, Yesu aamoona mulopwana mmoha iitthaniwa Matheyo akilantheene alivihaka mpostu,* ni aamweerela: “Okhale mutthareli aka,” nto Matheyo, aahiya oliviha mpostu anamutthara Yesu.
10 Vahoolo vaya, emaara Yesu aatxaawe* owannyawe Matheyo, yaahoowa alipa ooliviha mpostu antxipale ni anamattheka enapatxera otxa ni Yesu vamoha ni atthareli awe.
11 Afarisi yoonakaru etthu ele, yaahaakoha atthareli a Yesu: “Mwaha wa heeni muhusihaanyu ontxaawe vamoha ni alipa ooliviha mpostu ni anamattheka?”
12 Nto Yesu aawiiwa awo ni aaweerela: “Atthu akumi khemmuhaawela meetiku, mene ale envoreiwa.”
13 Nto murowe ni muxuttere etthu entaphulelaaya masu ala: ‘Mmorelaneke ikharari mukina ni mukhwaawe, ohiya okivaharu makeya paahi.’ Nkaawenle owiitthana anaxariya mene anamattheka.”
14 Nto atthareli a Yohani Mpatisa, yaamwaattamela Yesu enamukoha ha: “Mwaha wa heeni hiyo ni afarisi nimmutthukaahu ramasaani mene atthareli anyu ehimmutthuka?”
15 Yesu aawaakhula aakohaka ha: “Neereke asinthamwene a mutthu ottomenre ennatthuneya oriipiwa murima nthamwene aya areene niyaawo? Mene enoophiya mahiku nthamwene aya ole ottomenre eneeraaya yaakhiwe, nto yeereya eyo, awo enoomutthuka ramasaani.”
16 Khaavo onkuxa ekuwo enyowani anattotthela vakuwoni yakhalayi mwaha woowera mutthu apaka eyo, ekuwo enyowani enookokha ekuwo ya khalayi mpaka waahula.
17 Eviinyu ya viinaano khenheliwa mmurupani sa ixapala sa khalayi, wakhala weera mutthu onoopaka eyo, murupa wa eviinyu onoophuleya ni eviinyu eyo enooyeeheya nave mirupa iyo inoonanara. Eviinyu enyowani enheliwa murupa munyowani nto mutthu apaka eyo, eviinyu ni murupa wa exapala inoothokororeya.
18 Uulumaka hiihaale masu ala, mutokweene mmoha aamwaattamela anamukokhorela ohoolo wawe eeraka: “Kinoona weera mwanaka ewoora ela ohookhwa, mene nrowe mwamwiiyaathere matata anyu weera atthikele okhala mukumi.”
19 Yesu ni atthareli awe, yaavinya enamutthara mutokweene ole.
20 Eettaka hiihaale, muthiyana mmoha aavirinhe iyaakha 12 ephome awe eyeeheyaka, aamwaattamela Yesu ottuli wawe ni aatava mukhwipi mwa malaya a Yesu.
21 Mwaha wooweera, owo anniiseerela mwaneene awe ha: “Katavaru malaya awe, kinoolama.”
22 Yesu arukunuwakaru aamoona muthiyana ole ni aamweerela: “Mulipe murima mwanaka, nroromelo nanyu nohoolamihani.” Ovinya etempu ene yeele ephome awe muthiyana ole yaahiya oyeeheya.
23 Aphiyakaru owannyawe mutokweene a osinakooka aawoona alipa owiipa iflaauta* ni atthu yinlaka.
24 Yesu aaweerela: “Mukhume, mwaarusi ola khakhwiiye onimweera okona.” Mwaha wa masu ala, atthu yaapatxera omutheya moomuramusa.
25 Aavekelakaru atthu okhumela vaate, owo aavolowa mpaani, avara ntata na mwaarusi ole ni mwaarusi ole aavinyerera.
26 Ni ovinyerera wa mwaarusi ole waahiiwanyeya muttetthe wootheene.
27 Emaara Yesu aakhumaawe nipuro nne, alopwana eeli yahoona yannamutthara ekhuwelaka: “Onimorele ikharari mwaana a Davidi.”
28 Avolowakaru mpaani, alopwana ale eeli oohoona yaamwaattamela Yesu, ni Yesu aahaakohasa: “Nyuwosa, munnaroromela weera miyo kinimoolamihani?” yaamwaakhulasa: “Aani, Apwiya.”
29 Yesu aatava mmaithoni mwaya, aweerelaka: “Eweereeleni moovarihana ni nroromelo nanyu.”
30 Ovinya vaavale awosa yaapatxera woona. Nto Yesu aahaaleela: “Mwiikosoopesa weera muhimuleele mutthu mwaha ola.”
31 Mene ekhumakaru, awo yaalaleya muttetthe wootheene etthu ele yaapakelinwaaya.
32 Epwahakaru asilopwana eeli ale, Yesu aawiiheriwa mulopwana mmoha oohuuluma aarino munepa woonanara.
33 Woomoliwakaru munepa woonanara, mulopwana ole ahuuluma aapatxera wuuluma. Ni atthu yaatikhiniheya vantxipale ni yanneera: “Khetonko weereya etthu ntoko ela wIsraeli.”
34 Mene afarisi wuuluma yeera ha: “Ola onwera woomola minepa iyo soonanara mwaha wooweera onkhaviheriwa ni muhooleli a minepa iyo soonanara.”
35 Yesu aapatxera weetteetta isidade ni mittetthe sootheene, aaxuttihaka musinakookani mwaya, alaleyaka mitthenka sa Omwene ni alamihaka iretta ni ikwerere sootheene.
36 Emaara Yesu aawehaawe atthu, annaamorela ikharari mwaha wooweera awo yaakhala ntoko iputtiputthi inaasa weetta sihikhanleno mukukhuli.
37 Nto Yesu, aaweerela atthareli awe: “Soohepha siri sintxipale, nto anamuteko ari vakhaaniini.”
38 Tivanto, munvekele mwaneene ematta weera aaruuhe anamuteko akina.”
Footnotes
^ Naari: “vanrepani.”
^ Naari: “nrepa nanyu.”
^ Naari: “musonkho.”
^ Naari: “aahaamenlaawe vameesa.”
^ Naari: “apetta.”
