Yehova oonivaha ntthuvelo nooreera: Biblya. Eliivuru eyo ntthuveliwaahu, opwexeereriwa wa iliivuru—66 sooyeva. Nyuwo pooti wiikoha ha: ‘Okhume woowi Biblya? Mitthenka sa mBiblyani ti sawani?’ Weera naakhule makoho ala, ninkela woona moota Biblya ophiñyaawe wa hiyo.

1. Waareene weera Biblya alempwale ni atthu, wanwereya hayi okhala a Muluku, oriki alempweene n’atthu?

Biblya olempwale ni alopwana 40 moovira iyaakha 1.600. Eliivuru yoopatxera ya Biblya, elempwale eyaakha ya 1513 A.E.C. ni eliivuru yoomalihera elempwale eyaakha ya 98 E.C. Mwa ale yaamulepa Biblya yaari alipa okukhula inama, alipa oototha ihopa, ni mamwene eyo ennoonihera weera yaari atthu oovirikana. Nakhala erookhalaru hiihaawo, impari sootheene sa mBiblyani sinnavarihana. Eyo enwereya hayi? Eyo enwereya mwaha wooweera Biblya onkhuma wa Muluku. (Mmusome 1 Atesalonika 2:13.) Atthu awo khayaalempe nyuupuwelo saya. Opwaha mwa yeeyo “mene atthu yale, yèttihiwe ni Munepa Wottela, yàhùluma sa Muluku.” a (2 Pedru 1:21) Avarelaka muteko munepaawe wootteela, Muluku aawuupuxera atthu weera elepe miruku sawe.—2 Timotheyo 3:16.

2. Muluku aapakenle taani Biblya?

Muluku aapakenle atthu Biblya “ni nihimo nulumo ni muloko ori wothene.” (Mmusome Apokalise 14:6.) Mwa yeeyo, Muluku oopaka weera Biblya asommweke muulumo mantxipaale opwaha iliivuru sootheene sikhanle. Atthu ootheene amulaponi pooti osoma mitthenka sooreera sinkhuma mBiblyani woohipwattha mapuro ankhalaaya naari muulumo anuulumaaya.

3. Moota heeni Yehova omukosompaawe Biblya?

Biblya ooviriha maxupo mantxipale, mene Yehova khaatthunihenre weera atthu ekhoottihere mitthenka sawe ophiya olelo va. Maxupo makina okumannaaweno Biblya eri yooweera owo alempwe ni ikaruma soohilekela, ntoko exapala ni ettiili. Vano, Biblya ophiñye hayi olelo? Eyo yeereñye mwaha wa alopwana yaasiveliwa ni Biblya. Awo yaannamulepa veeli-veeli ni wiikosoopa. Maxupo makina eri yooweera atthu oowera yaaheerera omunyaanya Biblya. Mene Yehova aakosoopa masu awe! Weera Biblya aphiye mpaka olelo yaakhala yaaveleela ikumi saya weera emukosoope Biblya. Eyo ennaakhulela ele masu awe enahimaaya yeeraka: “nsu na Muluku ahu nnilekele wa mahiku othene.”—Yesaya 40:8.

 WEERA MUXUTTERE SINTXIPALE

5. Biblya ookumanano maxupo mantxipale ootupheliwa mene owo ookhala mpaka olelo va

 6. Ebuukhu ya atthu ootheene

Biblya eliivuru etaphuleliwe ni muulumo mantxipale ni enikaiwa opwaha iliivuru sootheene sikhanle. Musome Miteko 10:34, 35, avinyaka mutthekule ni ipontu sinttharelana:

• Mwaha wa heeni Muluku ontthunaawe weera nuulumo nawe ntaphuleliwe ni okaiwa ni muulumo mantxipale?

• Eheeni enoottutthani murima voohima sa Biblya?

 NYAHA SOOTTHUNEYAY

Biblya masu a Muluku, owo oopakiha weera asommweke ni atthu ootheene.

Wuuluula

• Biblya aahimaka weera Muluku aawuupuxere atthu omulepa Biblya, eyo entthuna ohima eheeni?

• Eheeni enoottutthani murima voohima sa otaphuleliwa ni okaiwa wa Biblya? Nyuwo munoonela hayi Biblya mwaha wookumanano maxupo mantxipale?

• Nyuwo munoonela hayi mwaha Muluku opaka sootheene weera ooleeleni mitthenka sawe?