YOOSOMA 06
Ekumi epatxenre hayi?
Muluku “ti ephattuwelo ya ekumi.” (Nsalmu 36:10 [36:9, Tradução do Novo Mundo]) Nyuwo munnaroromela eyo? Atthu akina khaammuroromela Muluku opanke ekumi. Eyo yaareene ekhaikhai, neereke ekumi eroothatuwa, woohikhalano yoowehereraaya. Vano nto aareene Yehova opanke ekumi, nto yookhano yoowehereraaya, khañyene ekhaikhai? a Nrowe noone ele Biblya onhimaawe sa moota epatxenraaya ekumi. Ninrowa woona-tho mathowa heeni anneeriha ororomela eyo.
1. Olumwenku opatxenre moota heeni?
Biblya onhima weera: “Vophattuwani Muluku apattunxe erimu ni olumwenku.” (Ephattuwelo 1:1) Masiyentista mantxipale annaakhulela weera elapo yookhalano mapatxerero. Vano olumwenku opatxenre hayi? Yehova aavarela muteko ‘ikuru sawe soowera’—naari neere ha, munepaawe wootteela—weera apake sootheene siri moolumwenkuni, ohela mpuwa ikalaaxiya, itheneeri ni iplaneeta.—Ephattuwelo 1:2.
2. Muluku opakenle heeni elapo ya vathi?
Yehova khaapattunxe elapo ya vathi weera ‘ehikhanle’vo etthu, koma òmpe wera ekhaliweke.’ (Yesaya 45:18) Muluku oopaka elapo ni yoolakelaawe: Owo aatthuna weera elapo ekhale nipuro nooreera weera ekhalekemo atthu mahiku ootheene. (Mmusome Yesaya 40:28; 42:5.) Masiyentista aasuwela weera elapo nipuro nooreeraxa opwaha iplaneeta ikina. Awosa khaaphwannye eplaneeta ekina ekhanleno itthu sootheene sikhalanne okumi.
3. Mwaha wa heeni atthu avirikannaaya ni inama?
Apakakaru elapo ya vathi, Yehova aapaka miri ni inama. Avinyaka “Muluku àmpattuxa mutthu mwa enenero awe.” (Mmusome Ephattuwelo 1:27.) Heeni atthu araaya ooreeraxa? Mwaha wooweera nipakiwe mwa eneneero ya Muluku, eyo entthuna ohima weera hiyo pooti otakiha mikhalelo sawe, ntoko nsivelo ni exariya. Muluku onipanke-tho ni mukhalelo wooxuttera muulumo ni oratta wiipa itxipo. Ni moovirikana ni inama, hiyo nnoowera onvarela muteko mpattuxaahu.
WEERA MUXUTTERE SINTXIPALE
Nrowe noone itthu tthaaru: (1) etthu enoonihera weera ekumi yookhalano mapatxerero, (2) sootaphulela sa Biblya voohima sa moota epattuxiwaaya etthaya ni (3) itthu heeni sa Muluku ninrowaahu oxuttera moorweela mwa mikhalelo saatthu eraayano.
4. Ekumi yookhalano mapatxerero
Atthu annattottopeliwa vaavo ampatxerihaaya opaka itthu etakihaka itthu sa mulaponi Muluku opattunxaawe. Khamunoona weera ole opattunxe itthu mulaponi toophwanenle ottottopeliwaxa? Moone EVIIDIYU, avinyaka mutthekule ni epontu enttharelana
-
Itthu heeni atthu atakinhaaya sipattuxiwe?
Khweeli empa eri yootheene entekiwa ni mutthu. Vano taani opattunxe itthu sootheene sikhanle? Mmusome Aheberi 3:4, ni avinyaka mutthekule ni ipontu sinttharelana:
-
Elapo yoosara itthu sipattuxiwe sootepa oreera. Itthu heeni sipattuxiwe mulaponi sinoosivelani vantxipale?
-
Nyuwo munnoona weera vanoowereya ororomela itthu sa Moolumwenkuni ni sootheene sipattuxiwe? Mwaha wa heeni munoonelaanyu hiiho?
Nyuwo mwaasuwela?
Weera mphwanye nyaha sinthokororiwa ni iviidiyu sootheene sinhima mwaheene yoola nwehe mwaha va jw.org, mwa soosoma “Teve um Projeto?” ni “A Origem da Vida: Teorias e Fatos.”.
“Khweli empa eri yothene ennatekiwa ni mutthu, vahera yole onteka sothesene, ti Muluku”
5. Biblya aahimaka weera itthu iroopattuxiwa onhima ekhaikhai
Ephattuwelo ekapiitulu 1, Biblya onnathaliha voohima sa opattuxiwa wa elapo ni ekumi. Nyuwo munoona weera onnareerela ororomela? Naari munoona weera itthu sootheene iroothatuwa? Moone EVIIDIYU, avinyaka mutthekule ni ipontu sinttharelana.
-
Neereke Biblya onnaxuttiha weera elapo epakiwe mahiku 6 a iwoora 24?
-
Nyuwo munoona weera ele Biblya onthalihaawe voohima sa opattuxiwa onhima ekhaikhai? Mwaha wa heeni munoonaanyu hiiho?
Musome Ephattuwelo 1:1, avinyaka mutthekule ni itthu sinttharelana:
-
Masiyentista anhima weera Olumwenku wookhalano epatxerero. Envarihana hayi ni ele musommaanyu mBiblyani?
Atthu akina anuupuwela weera Muluku oovarela muteko othatuwa weera apattuxe ekumi. Atthu awo anoona weera Muluku opaka eceelula yeeyo empakeya itthu soovirikana sa ekumi. Musome Ephattuwelo 1:21, 25, 27, avinyaka mutthekule ni epontu enttharelana:
-
Neereke Biblya onnathaliha weera Muluku avarenle muteko othatuwa weera apake ihopa, inama ni atthu? Naari neereke Muluku oopattuxa itthu sootheene sikhanle ni ekumi mwa “ekhapira aya”? b
6. Muluku ohaapattuxa atthu moovirikana ni soopattuxiwa ikina
Moota Yehova onipankaawe noovirikana ni inama. Musome Ephattuwelo 1:26, avinyaka mutthekule ni epontu enttharelana:
-
Atthu annawera woonihera nsivelo ni omorela ikharari. Mwaha wa heeni? Mwaha wooweera nipakiwe mwa eneneero ya Muluku. Eyo entthuna onxuttiha heeni sa mukhalelo wa Yehova?
ATTHU AKINA ANEERA: “Ele Biblya onhimaawe sa soopattuxiwa eethiru. Soohimmwa paahi soopakeleliwa.”
-
Nyuwo munnaakhulela eyo? Mwaha wa heeni?
NYAHA SOOTTHUNEYA
Yehova topattunxe Olumwenku ni itthu sootheene ikumi.
Wuuluula
-
Biblya onnaxuttiha voohima sa moota heeni olumwenku opatxenraaya?
-
Neereke Muluku avarenle muteko othatuwa weera apattuxe ikhapira sootheene? Naari oopattuxa itthu sootheene sikhanle?
-
Ti heeni eniweeriha atthu okhala ooreeraxa?
WEERA MUSUWELE ITTHU SINTXIPALE
Moone moota matakihero a itthu siri mulaponi sinooniheraaya weera okhala mpattuxa.
“Itthu sipattuxiwe sinnixuttiha heeni?” (Despertai!, a Setembro a 2006)
Moone moota asitiithi ankelaaya waaleelaka anamwanaaya akhaanene ele Biblya onhimaawe voohima sa opattuxiwa.
Nwehe ele Bibya onhimaawe voohima sa othatuwa.
“Neereke Muluku avarenle muteko othatuwa weera apake itiipu soovirikana sa ikumi?” (Mwaha va jw.org)
Atthu akina anhima weera yoolepa yooweera ekumi epatxenre khalaixa ni sooweerera sa masiyentiista sinnaakhulela othatuwa. Nto neereke eyo ekhaikhai tthiri?
A origem da vida—Cinco perguntas que merecem resposta (ebroxura)
a Va yoosoma 25, nnoorowa woona ele Muluku ontthunaawe wa atthu.
b Mbiblyani masu ooweera “ekhapira” anthaliha igrupu itokweene sa soopattuxiwa seiyo sikhalanne ekumi.
