YOOSOMA 09
Nivekelo ninnalipiha onthamwene anyu ni Yehova
Mwannavirihe maxupo yaawo mwaatthuneyaanyu ovahiwa miruku? Nyuwo mookhalano makoho yaawo mwaatthunaanyu ophwanya waakhuliwa waya? Munnatthuna okhaviheriwa naari olipihiwa? Munnatthuna omwattamela Yehova? Ovekela onnakhavihera itthu sootheene iyo. Nivekeleke moota heeni? Nto neereke Muluku onnaiwa mavekelo atthu ootheene? Nipakeke heeni weera Muluku iiweke mavekelo ahu? Nrowe noone.
1. Taani ninphwanelaahu onvekela? Ni nivekeleke hayi?
Yesu aahaaxuttiha oohuseraawe weera yaavekelaka yeereke Tiithihu a wiirimu. Yaari yeeyo Yesu aapakaawe. Owo enre: “Vano nyuwo nvekeleke siso: ‘Tithi, ori wirimu . . . ’” (Matheyo 6:9) Nanvekelaka Yehova, onthamwene ahu nuuwo onnalipa.
Nivekeleke itthu soothesene sinvarihana ni yootthuna ya Yehova. Biblya oneera: “Vano ororomeleya nikhanlahuno mwa [Muluku] ti wú: nanvekelá yowo yakhalaru etthu mowiwanana ni otthuna wawe, onnanìwa.” (1 Yohani 5:14) Yesu oovaha ntakihero na moota woovekela. (Mmusome Matheyo 6:9-13.) Hiyo pooti ovekela itthu saweerutthuni. Mene nihitiiwaleke waavekelela akina ni omuxukurela Muluku mwaha wa itthu onipakenlaawe.
2. Nivekeleke moota heeni?
Mavekelo ahu ekhumeke va murimani, Biblya onnanooperera weera ‘nimuleeleke yowo sothesene siri va murimani vahu.’ (Nsalmu 62:9 [62:8, Tradução do Novo Mundo]) Hiyo pooti ovekela moowiiwanyeya naari vathi-vathi ehuhu eri yootheene ni mapuro ootheene. Nave khontthuneya okokhora, weemela naari okalaathi navekelaka. Nyuwo pooti ovekela mukokhonreene, mweemenleene, naari mukilantheene. Etthu yootthuneya ori woonihera nttittimiho wa Yehova.
3. Muluku onaakhula hayi mavekelo ahu?
Owo onnapaka eyo moohiyana-hiyana. Mwa ntakihero mBiblyani ninnaphwanya waakhuliwa wa makoho ahu. Omusoma Biblya pooti ‘omutatuxa òhisuwela akhala musuweli.’ (Nsalmu 19:8 [19:7, NM]; mmusome Yakobe 1:5.) Yehova thooni pooti omaaliha mirima sahu naavirihaka maxupo. Nave pooti waavarela muteko arumeyi awe weera enikhavihere.
WEERA MUXUTTERE SINTXIPALE
Moone etthu muneeraanyu mpake weera mavekelo anyu yiiwiwe ni Muluku. Moone tho moota mavekelo eneeraya yookhavihereni.
4. Nipakeke heeni weera Muluku iiweke mavekelo ahu
Itthu heeni siri sootthuneya weera Muluku iiweke mavekelo ahu Moone EVIIDIYU.
Yehova ontthuna weera ninvekeleke yoowo. Musome Nsalmu 65:3 [65:2, NM], avinyaka mutthekule ni epontu enttharelana:
-
Nyuwo munoona weera “ole oniwa mavekelo” onnitthuna weera nyuwo munvekeleke? Mwaha wa heeni munonaanyu hiiho?
Weera Muluku iiwe mavekelo ahu, ontthuneya okhala moovarihana ni malamulo awe. Mmusome Mikeya 3:4 ni 1 Pedru 3:12, avinyaka mutthekule ni epontu enttharelana:
-
Ninkela ororomela hayi weera Yehova onimwiiwa mavekelo ahu?
Igrupu piili sa anakhotto sivekelaka weera sawiive amwiittanaaya. Munoona weera Muluku onimwaakhulela mavekelo ene yaawo?
5. Mavekelo ahu antthuneya weera ekhumeke vamurimani vahu
Atthu akina exuttihiwe, onnatthuneya onvekela Muluku ehokoleelaka itthu imoharu-moharu ikwaha sootheene anvekelaaya. Neereke tiyeeyo Muluku ontthunaawe? Mmusome Matheyo 6:7, ni avinyaka mutthekule ni epontu enttharelana:
-
Eheeni muneeraanyu mpakeke weera “muhitthikeleke itthu imoharu-moharu ikwaha sootheene” mwaapakaka mavekelo?
Munoonela hayi wuupuwela mareeliho Yehova oovanhaaweni ni oxukurela yeeyo? Mwaapakaka eyo mahiku ootheene a vasemanani, munimoona weera muneereke ovekela itthu 7 vasemanani soovirikana muhitthikelaka masu mamoharu.
Tiithi onnasiveliwa vaavo mwanawe onuulumaawe nuuwo ni murima wootheene. Ni Yehova tho ti hiiho. Owo onnasiveliwa vaavo nninvekelaahu ni murima wootheene.
6. Nivekelo yoovaha ya Muluku
Nivekelo ninkela onivaha hayi ikuru otepaxa wene ehuhu ya maxupo? Moone EVIIDIYU.
Biblya onhima weera mavekelo enoonikhavihera okhalano murettele mmuupuweloni. Mmusome Afilipi 4:6, 7, avinyaka mutthekule ni epontu enttharelana:
-
Ekhaikhai weera mavekelo anyu khankela omaliha maxupo anyu. Vano naamwi vareene hiiho, heeni mavekelo eneeraya yookhavihereni?
-
Itthu heeni nyuwo mwaatthunaanyu weera nvekeleke?
Nyuwo mwaasuwela?
Masu oweera “amem,” antaphulela weera “yeereye hiiho” naari “mweekhaikhai.” Ehuhu aalempwaawe Biblya, masu ala anvareliwa muteko okhwipi wa mavekelo.—1 Sowereya 16:36.
7. Mukhalekeno ehuhu yoovekela
Emaara ekina ninnaatteliwa mpaka ottiwala ovekela. Neereke Yesu annoona okhala wootthuneya ovekela? Mmusome Matheyo 14:23 ni Marko 1:35, avinyaka mutthekule ni ipontu sinttharelana:
-
Yesu aapaka eheeni weera akhaleno ehuhu yoovekela?
-
Munkela opaka eheeni weera mukhaleno ehuhu yoovekela?
ATTHU AKINA ANEERA: “Nivekelo etthu enaapakiha atthu woona nnene, mene nihinvareleya muteko.”
-
Nyuwo mwaakela ohima hayi?
NYAHA SOOTTHUNEYA
Mavekelo a vamurimani vahu, annanikhavihera omwaattamela Muluku, onivaha murettele ni ikuru nintthunaahu weera nimuhakalalihe Yehova.
Wuuluula
-
Taani nneeraahu ninvekeleke?
-
Nivekeleke moota heeni?
-
Nivekelo ninkela onikhavihera hayi?
WEERA MUSUWELE ITTHU SINTXIPALE
Mphwanye waakhuliwa wa makoho mantxipale atthu anipakaaya voohima sa nivekelo.
“Itthu 7 muntthuneyaanyu osuwela voohima sa ovekela” (A Sentinela, 1.º a Outubro a 2010)
Muxuttere mwaha wa heeni oraaya woophwanelela opaka mavekelo anyu.
Taani nneeraahu ninvekeleke? Moone ele Biblya onxuttihaawe voohima sa mwaheene yoowo.
Mwa eviidiyu eene yeela moone, yaavirikanaka ewoora naari nipuro noovekela.
