MWAHA ONTHOKORORIWA 2
ETXIPO 19 Yoolya ya Ohiyu ya Apwiya
Nyuwo mohiireherera wa nihiku nootepa otthuneya na vayaakhani?
“Mpakeke iya mukùpuwelaka miyo.” — LUKA 22:19.
ELE NINKELA AHU OXUTTERA
Ninkela woona mwaha wa heeni wuupuwelela okhwa wa Yesu oraaya woothanleya, moota ninrowaahu wiireherera weera noonele muthukumano owo ni moota ninrowaahu waakhavihera atthu akina weera yoonele muthukumano owo.
1. Mwaha wa heeni wuupuwelela okhwa wa Yesu Kristu nraaya nihiku nootepa otthuneya na vayaakhani? (Luka 22:19, 20)
WA ATTHU a Yehova nihiku na wuupuwelela okhwa wa Yesu Kristu nihiku nootepa otthuneya na vayaakhani. Mwaha wooweera Yesu mwaneene aahimme weera atthareli awe epakeke eyo. (Mmusome Luka 22:19, 20.) Hiyo ninnaweherera nihiku nno moottuttha murima. Nave nnoorowa woona mathowa enneeriha woona hiiho.
2. itthu heeni sineeriha nihiku nna na wuupuwelela okhala nootepa otthuneya?
2 Muthukumano wa wuupuwelela, onnanikhavihera woona mwaha wa heeni mukuttho wa Yesu oraaya wootepa otthuneya. Nave-tho onnanikhavihera woona moota nneeraahu asantte mwaha wa mukuttho owo. (2 Akor. 5:14, 15) Opwaha mwa yeeyo, muthukumano wa wuupuwelela onnanikhavihera olipihana mukina ni mukhwaawe. (Arom. 1:12) Iyaakha sootheene asinna ale yaahiñye onvarela Yehova, ennoonela muthukumano ola woowuupuwelela. Ni akina mwaha woowaakheliwa ni nsivelo, ennalakela otthikela wa Yehova. Akina ennalakela omusoma Biblya mwaha wa etthu yiiwalaaya ni yonnaaya wa muthukumano wa wuupuwelela. Khaiyene ti wootikhiniha woona weera nihiku nno ti nootepa otthuneya wa hiyo!
3. Moota heeni hiyo ninkhalaahu oowiiraana nihiku na wuupuwelela okhwa wa Yesu? (Nwehe efootu.)
3 Nkuupuwelani moota ninkhalaahu oowiiraana asinna a elapo yootheene nihiku nna na wuupuwelela okhwa wa Yesu. Elapo yootheene Anamoona a Yehova ennapatxera muthukumano ola nsuwa niriki oneela. Nave ootheene hiyo ninniiwa mwaha yoowo ompakiwa voohima sa mukuttho. Hiyo ninneepa itxipo piili sa Omwene, ninnaviriha eviinyu ni epaawu nave ninneera “amen” ni murima wootheene wa mavekelo maxexe yaawo empakiwa. Mwa iwoora 24, miloko sootheene sinnapaka etthu emoha-moharu. Nkuupuwelani moota Yehova ni Yesu enhakalalaaya vaavo ennoonaaya nreene oowiiraana elapo yootheene vaavo nnoonelaahu muthukumano wa wuupuwelela okhwa wa Yesu.
Elapo yootheene, asinna ennakhala oowiiraana nihiku na wuupuwelela (Nwehe eparagrafu 3) f
4. Eheeni ninrowaahu woona mwa yoosoma ene yeela?
4 Mwa yoosoma ene yeela, nnoorowa woona makoho ala: Nnaareherere hayi mirima sahu weera noonele muthukumano wa wuupuwelela? Nnaakhavihere hayi atthu akina ottottela mureerelo muthukumano wa wuupuwelela? Nave nnaakhavihere hayi ale ehiñye onvarela Yehova? Waakhula makoho ala onoorowa onikhavihera okhala oowiireherera wa nihiku nno noothanleya.
NNAAREHERERE HAYI MIRIMA SAHU WEERA NOONELE MUTHUKUMANO WA WUUPUWELELA?
5. (a) Mwaha wa heeni nintthuneyaahu ophimelelaka mukuttho woowoopola? (Nsalmu 49:8, 9 [49:7, 8, NM]) (b) Eheeni muxuttenraanyu ni eviidiyu eneera Yesu akhwenle heeni?
5 Moota woopaka eyo, ori wuupuwelela moota mukuttho wa Yesu oraaya wootthuneya. Mwaha wooweera khanaarowa opaka etthu yeera enoopole wa yoottheka ni okhwa. (Musome Nsalmu 49:8, 9 [49:7, 8, NM]; nwehe-tho eviidiyu, Yesu akhwenle heeni?) a Yehova aamuruma Yesu weera avahe ekumi awe weera anoopole, Yehova ni Yesu aapaka etthu yootepa otthuneya. (Arom. 6:23) Navirelela ophimelela etthu Yehova ni Yesu enipakenlaaya, hiyo omuxukurela wahu oneereke waatxeerereya. Nrowe noone itthu sootepa otthuneya Yehova ni Yesu enipakenlaaya. Menento nihaakunve, mukuttho ti heeni?
6. Mukuttho woowoopola onhela mpuwa eheeni?
6 Mukuttho etthu enliviwa weera yoopoliwe etthu ekina. Mulopwana oopatxera Adamu, apattuxiwaka aari oomalela. Amutthekelakaru Muluku, owo ni osuulu awe aayeleela eparakha yookhala wa mahiku ootheene. Nto weera nikhaleno ekumi yoohimala, Yesu ooveleela ekumi awe yoomalela ntoko mukuttho. Emaara aaraawe elapo ya vathi, Yesu ‘khaapankiye soottheka naari mmwaanoni mwawe khayaaphwanyiwe’mo yoowootha.’ (1 Ped. 2:22) Emaara Yesu aakhwaawe, aari oomalela ntoko hiihaale Adamu aaraawe ahinaaye ottheka. Mwaha wa yeeyo, hiyo nnoorowa okhalano ekumi yoohimala Adamu ayelenlaawe. — 1 Akor. 15:45; 1 Tim. 2:6.
7. Emaara Yesu aaraawe elapo ya vathi maxupo heeni aavirinhaawe?
7 Emaara Yesu aaraawe elapo ya vathi, owo annamwiiwelela Yehova mwa itthu sootheene nnaamweera ikwaha ikina waakhala wooxupa. Yesu aari mwaana oomalela mene asitiithi awe yaari oohimalela, nnaamweera vareene hiiho, owo annawiiwelela. (Luka 2:51) Emaara Yesu aaraawe mmiravo, owo annatthuneya osepa itthu atthu yaapakaaya seera simweerihe ohiwiiwelela asitiithi awe naari Yehova. Emaara Yesu unnunwaawe, annatthuneya okhootta sooweerera sootheene Satana ampakelaawe, weera avirelele omwiiwelela Yehova. (Math. 4:1-11) Satana anneerera opaka etthu yeera emootxeelihe Yesu ovaha ekumi awe weera anoopole.
8. Maxupo heeni makina Yesu aavirinhaawe?
8 Mpuwa mwa muteko awe wa elapo ela ya vathi, Yesu aaviriha maxupo mantxipale. Amwiittani awe yannamutthara-tthara etthunaka omwiiva. (Luka 4:28, 29; 13:31) Opwaha mwa yeeyo, Yesu annatthuneya owanano ohimalela wa atthareli awe. (Mar. 9:33, 34) Emaara Yesu aathorihiwaawe, aahihasuliwa ni oveehiwa. Ni muhoolo mwaya, aahiiviwa mwa mukhalelo wooriipiha murima. (Aheb. 12:1-3) Nave owo aari meekhaawe omamaliheroni wa ekumi awe ahikosoopiwaka ni Yehova. b — Math. 27:46.
9. Muniisoonela hayi Vaavo mumphimelelaanyu mukuttho wa Yesu Kristu? (1 Pedru 1:8)
9 Moohihovela, Yesu oohaawa vantxipale weera avahe ekumi awe wa hiyo. Hiyo ninnamusivela vantxipale Yesu mwaha wooveleela ekumi awe wa hiyo. — Mmusome 1 Pedru 1:8.
10. Mwaha wa heeni waaraaya wooxupa Yehova onvaha mwanawe ntoko mukuttho?
10 Vanonto ankha Yehova? Etthu heeni apankaawe weera Yesu aveleele ekumi awe? Yehova ni Yesu aakhalano nsivelo nootepa olipa ntoko tiithi ni mwanawe. (Mir. 8:30) Vanonto muupuwele moota Yehova oonaawe ovoreya vaavo aamoonaawe Yesu avirihaka itthu sintxipale sooxupa elapo ela ya vathi. Moohihovela, Yehova wannanvoreya murima vaavo aamoonaawe mwanawe ahasuliwaka, akhoottiwaka ni akumanakano itthu sooxupa.
11. Eheeni enrowa onikhavihera woonelela moota Yehova aaisoonelaawe vaavo aamoonaawe Yesu akhwaaka?
11 Tiithi naari maaye onnasuwela moota onvoreyaaya vaavo ammuyeleelaawe mwanawe mookhwaani. Hiyo ninnaroromela ovinyerera wa atthu ookhwa, nnaamweera vareene hiiho, vaavo ankhwaawe mutthu nimmusivelaahu onnanivoreya murima. Nto eyo ennanoonihera moota Yehova iisoonelaawe vaavo aamoonaawe mwanawe ahaawaka ophiyera wiiviwa. c — Math. 3:17.
12. Etthu heeni nintthuneyaahu opaka mpuwa mwa wuupuwelela okhwa wa Yesu?
12 Munoonela hayi ovinyera viinaano va opatxera oxuttera vantxipale woohima sa mukuttho vaavo mumpakaanyu yoosoma anyu ya Biblya naari yoosoma ya veemusini? Weera musuwele vantxipale woohima sa mukuttho, mwaase va Guia de Pesquisa para Testemunhas de Jeová (emphwanyeya nnuulumo nanyu) naari epublicaçao ekina enuuluma sa mukuttho. d Nave mutthareke eprograma ya omusoma Biblya enkumiheriwa va Ekumi ni mutekwaahu wa makristau — Ekadernu ya vamweerini. Nave nihiku na wuupuwelela, muhittiwale woonela eviidiyu yeeyo enuuluma mwaha wootepa othanleya. Vaavo ninrehereraahu mirima sahu wa muthukumano ola, nniimwaakhavihera atthu akina ottottela mureerelo etthu enrowa wuulummwa omuthukumanoni iwo. — Ezra 7:10.
MWAAKHAVIHERE ATTHU AKINA OTTOTTELA MUREERELO
13. Etthu heeni nintthuneyaahu opaka weera naakhavihere atthu akina woonela muthukumano wa wuupuwelela?
13 Moota heeni nyuwo munrowaanyu waakhavihera atthu akina ottottela mureerelo muthukumano wa wuupuwelela? Moohihovela, etthu yoopatxera ori waawopa atthu akina. Ohiya paahi waawopa atthu munaaphwanyaanyu mmutekoni moolaleera, nyuwo pooti opaka eliista ya atthu munrowaanyu waawopa. Pooti waawopa amusi ahu, makoleega ahu oomutekoni, makoleega ahu oxikola naari atthu akina. Wakhala weera khimwaano nwopelo woowimprimiriwa mwintxipale, nyuwo pooti owinviyarelaka elink enrowa waakhavihera woona nwopelo owo. Nyuwo munoorowa otikhina owoona atthu mwaawompaanyu ewaaka woonela muthukumano woowuupuwelela! — Koh. 11:6.
14. Mwaha wa heeni oraaya wooreera onwopa mutthu mwaneene ahu?
14 Wakhala weera ninnanwopa mutthu mwaneene ahu, eyo enoorowa omukhavihera. Murokora mmoha aatutuxereya vantxipale vaavo aiyawe yaawo ehimmukokhorela Yehova yenraaya weera yaamurowa woonela muthukumano wa wuupuwelela okhwa wa Yesu. Mwaha wa heeni murokora ole aaraawe ootutuxereya? Mwaha wooweera owo aahaawopa ikwaha sintxipale, mene awo khiyaarowawo. Eheeni yeereñye ekwaha ela? Aiyawe yaahaakhela nwopelo ni mutokweene a mmulokoni yoowo yaamusuwelaaya. Ni aiyawe yaahoonela muthukumano wa wuupuwelela wa eyaakha ene yeele ni wa iyaakha saattharelana.
15. Etthu heeni nintthuneyaahu wuupuwelelaka vaavo nnanwopaahu mutthu weera oonele muthukumano wa wuupuwelela?
15 Musuweleke weera atthu ale nnaawopaahu pooti okhalano makoho, otepaxa wene wakhala weera khayintale ophiya empa ya Omwene. Waamurowa okhala wa miruku wuupuwelela makoho awo enrowaaya opaka ni wiireherera weera naakhule. (Akol. 4:6) Mwa ntakihero, akina pooti wiikoha ha: ‘Muthukumano owo onrowa opakiwa moota heeni?’ ‘Onrowa omala iwoora ikavi’ ‘Kiwareke moota heeni?’ ‘Neereke onnatthuneya oliva etthu?’ ‘Neereke ennavirihiwa ephatxe?’ Vaavo nnanwopaahu mutthu weera oonele muthukumano wa wuupuwelela, onnatthuneya omukoha ha, “Neereke nyuwo mookhalano nikoho?” Avinyaka hiyo pooti omwiiwelela vaavo onaakhulaawe. Nave pooti omoonihera eviidiyu eneera, Mupuwelele okhwa wa Yesu naari Eheeni eneereya empa ya Omwene ya Anamoona a Yehova? Mwapaka eyo munoomukhavihera mutthu osuwela moota sineettaaya mithukumano sahu. Opwaha mwa yeeyo, yoosoma ya 28 ya Mukhaleno ekumi yoohimala!, ennahima itthu nikhanlaahu oomoonihera mutthu owo.
16. Makoho heeni enkhalaayano ale enoonela muthukumano wa wuupuwelela?
16 Atthu ale ninrowaahu waawopa, wamala muthukumano pooti weeraka enookhalano makoho makina. Awo pooti wiikoha mwaha wa heeni atthu ehikhuuralaaya epaawu naari owura eviinyu naari mwaha wa heeni atthu vakhaani paahi epankaaya eyo. Nave awo pooti okoha mwaha wa heeni nimpakaahu muthukumano ola iyaakha sootheene. Nave-tho awo pooti otthunaka osuwela waari weera mithukumano sootheene sa Anamoona a Yehova sineettaka hiiha. Nnaamweera itthu ikina suulummwaka vaavo ompakiwaaya mwaha wa wuupuwelela, atthu awo pooti otthunaka osuwela itthu ikina. Mwaha oneera A Ceia do Senhor – porque é que as Testemunhas de Jeová a celebram de modo diferente?” pooti onikhavihera waakhula makoho makina atthu awo eraayano. Nintthuneya opaka ele ninweraahu ohinaaye ophiya muthukumano ola, naari ophiñyeene naari ovinreene, weera naakhavihere atthu ale entthuna okhalano ekumi ‘yoohimala’ moota woottottela mureerelo muthukumano ola. — Mit. 13:48.
MWAAKHAVIHERE ATTHU ALE YEEMEXENRE ONVARELA YEHOVA
17. Moota heeni asitokweene a mmulokoni enrowaaya waakhavihera ale yeemexenre onvarela Yehova? (Ezekiyeli 34:12, 16)
17 Vaavo onrowaaya opakiwaka muthukumano wa wuupuwelela okhwa wa Yesu, asitokweene enrowa woonihera moota heeni weera ennaapwattha ale yeemexenre onvarela Yehova? Nwoonihereke weera nyuwo munnaapwattha. (Mmusome Ezekiyeli 34:12, 16.) Ohinaaye ophiya muthukumano wa wuupuwelela, mpake ele munweraanyu weera muulume ni ale yeemexenre onvarela muteko Yehova. Nwoonihere weera nyuwo munnaasivela nave munnatthuna opaka ele munweraanyu weera mwaakhavihere. Nave mwaavahe nwopelo wa wuupuwelela okhwa wa Yesu. Wakhala weera enoophiya, nwaakhele ni nsivelo. Naari ovinreene muthukumano owo, nvirelele owoonihera asinna awo oosiveleya weera munnaasivela, nave mpake ele munweraanyu weera mwaakhavihere omutthikela Yehova. — 1 Ped. 2:25.
18. Moota heeni ootheene hiyo ninrowaahu waakhavihera ale yeemexenre onvarela Yehova? (Aroma 12:10)
18 Moota heeni asinna ootheene a mmulokoni enrowaaya waakhavihera asinna ale yeemexenre onvarela Yehova mpuwa mwa muthukumano ola woowuupuwelela? Hiyo nnoopaka eyo niwooniheraka nsivelo ni nttittimiho. (Mmusome Aroma 12:10.) Muupuwele moota asinna awo waaxumpaaya otthikela empa ya Omwene weera yoonele muthukumano owo. Apaale awo yannoova yuupuwelelaka weera khayaarowa waakheliwa nnene. e Muhuulume etthu enrowa owuulihiha muru naari waahiya ooxupeya. (1 Ates. 5:11) Asinna ni arokora awo ennamusivela Yehova ntoko hiyo. Hiyo ninnahakalala vantxipale vaavo nimmukokhorelaahu Yehova vamoha naawo! — Nsal. 119:176; Mit. 20:35.
19. Mareeliho heeni nimphwanyaahu Vaavo nnuupuwelelaahu okhwa wa Yesu?
19 Ti wa miruku Yesu oniruma wuupuwelela okhwa wawe iyaakha sootheene, ekhaikhai weera ootheene hiyo ninnattottela mureerelo naarowelaka muthukumano wa wuupuwelela. (Yes. 48:17, 18) Mwa ntakihero, nsivelo nahu ni Yehova ni Yesu ninnalipa. Nookhalano eparakha yoowoonihera oxukurela wahu mwaha wa etthu enipakenlaaya. Ninnakhala vakhiviru ni asinna ni opwaha mwa yeeyo, ninnakhalano eparakha yoowaaxuttiha atthu woohima sa mukuttho ni weera ekhaleno eparakha yoowaakhela mareeliho Yehova alaihenraawe. Nto nintthuneya opaka ele ninweraahu weera niireherere wa nihiku nno nootepa otthuneya na vayaakhani, ori wuupuwelela okhwa wa Yesu Kristu!
MOOTA HEENI NINROWAAHU . . .
-
oreherera mirima sahu wa nihiku na wuupuwelela?
-
waakhavihera atthu akina weera ettottele mureerelo wa nihiku nno?
-
waakhavihera ale yeemexenre onvarela Yehova?
ETXIPO 18 Ninnixukhurela Yowoopola
a Weera mphwanye nyaha ni iviidiyu sa yoosoma ene yeela, mukele va jw.org, mulepe muru owo va eparte empakiwa ipeskisa.
b Nwehe mwaha oneera “Makoho empakiwa ni ale ansoma irevista sahu” va Nwehereri a Abril a 2021.
c Nwehe eliivuru Achegue-se a Jeová, ekap. ya 23, eparag. 8-9.
d Nwehe ekwaadru eneera “ Miruku sa moota woopeskisari.”
e Nwehe ifootu ni ekwaadru “ Moota heeni muloko okaakhenlaaya?” Munna mmoha eemexenre onvarela Yehova annoova okela empa ya Omwene, menento onnawina woova iwo. Owo onnaakheliwa ni nsivelo ni onnakhala ootaphuwa.
f OTAPHULELA WA EFOOTU: Vaavo atthu a Yehova enoonelaaya muthukumano wa wuupuwelela okhwa wa Yesu elapo ekina, asinna ni arokora a elapo ekina, enniireherera weera yoonele muthukumano owo woothanleya.
